Suporta ni PBBM sa Israel, kinondena

ni Angela Fernando - Trainee @News | October 20, 2023

Kinondena ni Gabriela Rep. Arlene Brosas ang tahasang pagpapahayag ng suporta ni Presidente Bongbong Marcos, Jr. sa bansang Israel nitong nakaraang Oktubre 11.

Pahayag niya nu’ng nakaraang Huwebes, Oktubre 19, hindi raw dapat nagbibigay ng suporta ang gobyerno sa ginagawang karahasan ng Israel bagkus ay ang pagkakaisa ng dalawang bansa ang dapat nitong matulungang makamit.

Ikinalungkot ng marami ang pagbibigay ng suporta ng Pangulo sapagkat marami na ang nawala sa nangyaring sunud-sunod na pag-atake.

Dapat daw kondenahin ang karahasang ginagawa ng Israel ngayon na kumitil sa libu-libong buhay ng mga Palestinians at hindi dapat na tawaging terorista ang mga militanteng Hamas.

Ani Brosas, “Expressing sadness is not enough. While some world leaders express their condemnation against Israel’s actions, it is disheartening to see the Philippine government offering ‘moral support’ to apartheid Israel and declaring Hamas as a terrorist organization.”

“These relentless acts of violence perpetrated by the Israeli Defense Forces (IDF) are clear violations of international humanitarian law and must also be condemned by the international community,” saad nito.

16 OFWs sa Gaza, nakauwi na

ni Angela Fernando - Trainee @News | October 19, 2023

Ginunita ng ilan sa 16 overseas Filipino workers (OFW) mula sa Gaza sa kanilang pag-uwi nitong Oktubre 18 sa bansa ang nakakapanlumong dinanas magmula nu'ng Oktubre 7 matapos umatake ang Hamas sa Israel na nagresulta sa isang madugong giyera.

Saad ng isa sa mga OFWs na nakauwi sa bansa na kinilalang si Catherine Tolentino, dahil sa takot para sa kanyang buhay ay nagpaalam na rin siya sa kanyang pamilya at mga mahal sa buhay.

Pero nitong Miyerkules, dahil sa tulong ng gobyerno ay nakalapag ang labing-anim na Pilipino at naiuwi sa kani-kanilang pamilya.

May umaabot sa 100 Filipinos sa Gaza ang makakauwi ng bansa kapag matagumpay na nakatawid sa Egypt.

Ayon naman sa officer in charge na si Undersecretary Hans Leo Cacdac ng Department of Migrant Workers (DMW), tiyak na ang kaligtasan ng umaabot sa 30,500 OFWs sa Israel.

Pinoy na namatay sa Israel, 4 na

ni Eli San Miguel - Trainee @News | October 19, 2023

Nasawi ang isang Pilipino sa kaguluhan sa pagitan ng Israel at Hamas, ayon kay Foreign Affairs Secretary Enrique Manalo ngayong Huwebes.

Dahil dito, umabot na ang bilang ng mga namatay na Pilipino sa apat.

“I regret to inform the nation that we have received confirmation from the Israeli government of another Filipino casualty in Israel,” ani Manalo sa kanyang tweet.

“Out of respect for the wishes of the family, we shall be withholding details on the identity of the victim. But we have assured the family of the Government’s full support and assistance,” dagdag niya.

Ang namatay ay isang Pinay na caregiver na nasawi sa atake ng Hamas sa Israel noong Oktubre 7, ayon kay DFA Undersecretary Eduardo De Vega.

“She is one of the three missing Filipinos. Israel has confirmed. According to their record or testing, she is one of those who died due to the attack on October 7. She works in the Kibbutz as a caregiver,” sabi ni De Vega sa Radyo 630 ngayong Huwebes.

Dalawang iba pang Pilipino ang nananatiling nawawala, ayon kay De Vega.