Intramuros, para sa "World's Leading Tourist Attraction"

ni Eli San Miguel - Trainee @News | October 31, 2023

Hinihikayat ng Department of Tourism (DOT) ang mga Pilipino na bumoto para kilalanin ang Intramuros bilang World’s Leading Tourist Attraction sa 2023 World Travel Awards (WTA).

Huling nakuha ng Intramuros ang titulo noong 2020 at kasalukuyang naglalayon na muling makuha ang pagkilala ngayong taon.

“Come together and lend your support as Intramuros once again competes for the World Travel Awards as the world’s leading tourist attraction,” paghihikayat ng DOT.

Maaaring puntahan ng mga boboto ang opisyal na website ng WTA o sa pamamagitan ng pag-scan ng QR code na naka-post sa Facebook account ng DOT.

Bukod sa titulo para sa "World’s Leading Tourist Attraction," nominado rin ang Pilipinas sa mga sumusunod na kategorya:

•World’s Leading Beach Destination

•World’s Leading Dive Destination

•World’s Leading Island Destination

•World’s Leading Tourist Board

“Click on THE PHILIPPINES in each nominated category to show your full love and support until November 17, 2023 [United Kingdom time],” sabi ng DOT.

Itinatag noong 1993 ang WTA bilang isang award-giving body na nakabase sa London. Ipinararangal nito ang kahusayan sa larangan ng turismo sa tatlong antas: pambansa, rehiyonal, at pandaigdig na mga parangal sa iba't ibang mga kategorya.

Binondo-Intramuros Bridge, bukas na

ni Lolet Abania | April 6, 2022

Binuksan na ang Binondo-Intramuros Bridge sa mga motorista matapos na pangunahan ni Pangulong Rodrigo Duterte ang inagurasyon nito kahapon.

Batay sa ulat, mayroong apat na lane ang Binondo-Intramuros Bridge, kung saan kaya nito ang may 30,000 motorista na papasok at lalabas ng Intramuros at Binondo kada araw.

Gayundin, mayroong bike lanes at sidewalk ang nasabing tulay. Sa ginanap na pasinaya nitong Martes, pinasalamatan ni Pangulong Duterte ang China sa paglalaan nila ng pondo para mabuo ang naturang proyekto.

Dumalo sa nasabing event si Chinese Ambassador Huang Xilian. “I also thank and with gratitude the People’s Republic of China for the confidence and for being a partner in enhancing key infrastructure projects in our country,” pahayag ni Pangulong Duterte.

“As my administration comes to a close, we remain committed to providing a comfortable life for every Filipino through various opportunities for growth and success,” sabi pa ng Punong Ehekutibo.

Ayon naman kay Ambassador Huang, ito ang ika-16 na proyektong nakumpleto ng gobyerno ng Pilipinas sa China sa ilalim ng administrasyon ni Chinese President Xi Jinping.

Kahit pa nasa alert level 4…Ilang pasyalan sa Maynila, bukas na

ni Jasmin Joy Evangelista | September 16, 2021

Muling magbubukas ang ilang pasyalan sa Maynila gaya ng Intramuros at Luneta Park, sa kabila ng pagsasailalim sa Metro Manila sa alert level 4.

Papayagan na rin ang pamamasyal ng mga taga-NCR patungo sa mga tourist destination kahit pa sa labas ng rehiyon.

"Puwede nang pumunta as long as yung lugar ay naka-GCQ o MCQ or pumapayag yung LGU na tumanggap ng turista, puwede na," paliwanag ni Tourism Secretary Bernadette Romulo-Puyat.

“As of now ang puwede ay Boracay, El Nido... Ang maganda dito ay i-check nila yung LGU, kasi pabago-bago rin sila. In the case of Baguio, nag-announce si Mayor Magalong na no leisure travel kahit galing saang lugar up to the 19th”, dagdag niya.

Nagpaalala rin si Puyat na mula 18 hanggang 65-anyos lamang ang pinapayagang lumabas.

Bawal din muna ang mga indoor museum at ang staycation sa ilalim ng alert level 4.

Samantala, magbubukas ang Rizal Park simula alas-5 ng madaling araw hanggang alas-9 ng umaga at ang papayagan lang muna ay hanggang 500 bisita.

Mas kaunti naman ang papayagang turista sa loob ng mga pasyalan sa Intramuros na hanggang 150 tao lang.