Chef Jose Andres, kumantang inatake ang mga aid workers ng Israel

ni Angela Fernando - Trainee @News | April 4, 2024

Nagsalita na ang kilalang chef na si Jose Andres sa isang emosyonal na panayam sa Reuters nu'ng Miyerkules na isang Israeli attack ang pumatay sa kanyang mga manggagawa sa food aid sa Gaza.

Pagbabahagi ni Andres, sistematiko at kotse-kotse ang dumating para gawin ang nasabing pag-atake.

Sinabi rin nitong ang World Central Kitchen (WCK) charity group na kanyang itinatag ay may malinaw na komunikasyon sa Israeli military, na aniya'y alam ang galaw ng kanyang mga manggagawa sa pagtulong.

"This was not just a bad luck situation where ‘oops’ we dropped the bomb in the wrong place," saad ni Andres.

"This was over a 1.5, 1.8 kilometers, with a very defined humanitarian convoy that had signs in the top, in the roof, a very colorful logo that we are obviously very proud of," dagdag pa nito.

Iginiit nitong alam at kilala kung sino sila at ano ang kanilang ginagawa para sa kanilang misyon.

Inihirit din ni Andres ang isang imbestigasyon para sa insidente mula sa pamahalaan ng United States at mula na rin sa mga bansang pinagmulan ng bawat aid workers na nasawi.

Barkong 100 yrs. nang nawawala, natagpuan

ni Angela Fernando - Trainee @News | April 1, 2024

Natagpuan ang isang barkong lumubog higit isang daang taon na ang nakararaan sa baybayin ng Michigan.

Inihayag ng Michigan Shipwreck Research Association ang pagkakita dito nu'ng Marso 23 sa Holland, Michigan, ayon sa isang post sa Facebook mula sa nasabing samahan.

Isang grupo ng mga eksperto mula sa organisasyon ang nakatuklas sa katawan ng sinasabing kakaiba at buong-buo pang barkong pandagat ng Milwaukee na lumubog nu'ng Hulyo 1886 dahil sa pagkakabangga.

Ang pagkakahanap sa nasabing barko ay nagmarka ng ika-19 na lumubog na barko na natuklasan sa baybayin ng West Michigan ng nasabing grupo.

US at Japan, ikakasa ang malalim na kooperasyon sa AI

ni Angela Fernando - Trainee @News | March 31, 2024

Ikakasa ng Japan at United States (US) ang mas malalim na kooperasyon sa mga high-tech na teknolohiya tulad ng artificial intelligence (AI) ayon sa pahayagang Asahi Shimbun.

Ito ay magaganap sa pagkikita ng Punong Ministro na si Fumio Kishida at Pres. Joe Biden sa susunod na buwan.

Nakatakda ang pagkikita ng dalawa sa Abril 10 kung saan si Biden ang magiging host sa pagbisita ni Kishida sa U.S.

Tinawag na "global partnership" ang magiging ugnayan sa pagitan ng dalawang bansa patungkol sa itinataguyod na mas malakas na kooperasyon sa AI at semiconductors ngunit walang binanggit na sources ang nasabing pahayagan.

Bilang bahagi ng kasunduan, magtatatag ang Japan at U.S. ng isang framework para sa pananaliksik at pagpapaunlad ng AI, kasama ang Nvidia, Arm, at Amazon.