Taylor Swift at Post Malone, pasabog ang mga new version ng collab song

ni Eli San Miguel @Entertainment News | July 11, 2024

Tila hindi nauubusan ng pasabog para sa mga fans ang global pop star na si Taylor Swift dahil naglabas din siya ng mga new version ng kanyang collaboration song kasama ang sikat na "Sunflower" singer na si Post Malone.

Inilabas ng Grammy-winning pop star ang acoustic version at additional remix ng kantang "Fortnight." Tampok sa acoustic version ng lead single ni Swift mula sa kanyang album na "The Tortured Poets Department" ang simple at mabagal na tugtog ng gitara, na swak para sa malamig at malumbay na gabi.

Ipinakita nina Swift at Malone ang kakayahan nilang bigyan ng pagkakataon na madama ang kanta sa mas emosyonal at bagong perspektibo. Sa kabilang banda, ang additional remix ng indie pop duo na Cults para sa "Fortnight" ay nagdagdag ng mas masigla at mabilis na tempo sa kanta.

Maaari nang mapakinggan ang mga new version sa lahat ng pangunahing streaming platforms. Unang inilabas noong Abril 19 ang "Fortnight" bilang lead single mula sa “The Tortured Poets Department,” isang sorpresang double album na inilabas ni Swift sa parehong araw.

Ang standard edition ng kanyang pinakabagong album ay mayroong 16 na kanta. Sa pagdadagdag ng dalawang version, mas marami nang pagpipilian ang mga fans sa kung ano'ng version ng "Fortnight" ang mas swak sa kanilang mood.

Joe Alwyn, feeling lucky na nakasama uli si Emma Stone

ni Angela Fernando @Entertainment News | June 21, 2024

Pinuri ni Joe Alwyn ang aktres at kaibigan ng ex niyang si Taylor Swift na si Emma Stone matapos silang magsama sa pelikulang “Kinds of Kindness.”

Matatandaang sa production notes nu'ng 2022 para sa nalalapit na pelikula kung saan co-stars sina Alwyn at Stone, inamin ng aktres na humanga siya sa aktor.

“I love Joe. We had to do some pretty dark stuff on this one, so it was extremely comforting to be with him because he's one of the sweetest people you'll ever meet,” saad ni Stone tungkol kay Alwyn.

Ginawa ni Stone ang komento bago pa pumutok ang hiwalayan nina Alwyn at Swift ngunit kamakailan lang ay inamin ni Alwyn na swerte siyang makatrabaho ang kilalang aktres na tila naging tugon ni Joe sa naunang pahayag ni Emma tungkol sa kanya.

"I'm so lucky to be close to her, she's just the best. She's obviously wildly talented and she's just the best,” saad ni Alwyn.

Ang Kinds of Kindness ay ang pangalawang pagkakataon kung saan nagsama sina Alwyn at Stone sa trabaho. Dati na silang lumabas sa pelikula ng direktor na si Yorgos Lanthimos nu'ng 2018 na The Favourite.

Donald Sutherland ng ‘Hunger Games,’ pumanaw na sa edad na 88

ni Eli San Miguel @International News | June 21, 2024

Pumanaw na sa edad na 88 ang Canadian actor na si Donald Sutherland, na kinumpirma ng kanyang anak nitong Huwebes.

“With a heavy heart, I tell you that my father, Donald Sutherland, has passed away,” saad ni Kiefer Sutherland sa X. “I personally think (he was) one of the most important actors in the history of film. Never daunted by a role, good, bad or ugly.

He loved what he did and did what he loved, and one can never ask for more than that. A life well lived,” dagdag pa ni Kiefer.

Kilala si Donald sa kanyang mga papel bilang anti-hero at villain, na kamakailan ay naging matunog dahil sa kanyang karakter sa pelikulang 'The Hunger Games.'

Sa ngayon, inihayag lamang ng talent agency ni Donald na siya ay nakaranas ng ‘long illness’ at hindi pa malinaw na tinutukoy sa publiko ang dahilan ng kanyang pagpanaw.