Kahit may GF na buntis noon… PABBY NG HOUSE OF COLLAB, RAPE VICTIM SA EDAD NA 18

ni Melba R. Llanera @Insider | May 10, 2024

File photo: The House of Collab / Pabby

Nakapasok kami kamakailan sa House of Collab mansion at dito ay nakilala namin ang mga content creators na naglalaban-laban para sa Season 7 ng House of Collab. 

Mahigit dalawampu ang naglalaban-laban dahil hindi lang brands ang mapapanalunan ngayon, kundi tumataginting na isang milyong pisong cash. 

Sa dami ng mga sumali, ang isa sa mga nakaagaw ng atensiyon namin ay ang LGBTQ member na si Princess Aguas Bartolome o mas kilala bilang Pabby sa social media world. 

Kasintahan niya ngayon ang kapwa content creator at dating kasama sa House of Collab na si Cassy Beltran na isa ring miyembro ng LGBTQ. 

Masaya at kuntento raw siya sa itinatakbo ng kanilang relasyon sa ngayon. Isa sa mga ipinagpapasalamat ni Pabby ay tanggap at mahal nito ang pitong taon na anak niyang babae, si PaoPao.

Sa naturang interview namin kay Pabby ay inamin nito na isa siyang rape victim at ang anak na si PaoPao ay bunga ng panghahalay sa kanya nu’ng labingwalong taong gulang pa lang siya nu’ng year 2017. 

Pagbabalik-tanaw ng content creator, buntis ang girlfriend niya noon at dahil walang trabaho ay naisipan nilang ibenta at i-post sa Facebook ang cellphone nito na nagkakahalaga ng P38,000. 

May isang lalaki ang nag-message sa kanila at dahil sa pangangailangan at tiwala ay pumayag si Pabby na makipagkita rito. 

Inalok daw siya ng P5,000 bilang tulong na lang at hiniling na kumain na lang sila sa labas. Nu’ng nasa sasakyan na, nagulat siya nu’ng nagsalita ito na gusto nitong makita ang pribadong parte ng kanyang katawan. 

Gustuhin mang tumakas ay ‘di niya nagawa dahil naka-child lock ang sasakyan at nadala siya sa motel at napagsamantalahan. 

Pagkahatid ay binigyan siya nito ng P15,000 para palabasing binayaran siya nito.

Walang pinagsabihan si Pabby hanggang sa magdalantao siya at wala na siyang choice kung hindi ipagtapat sa pamilya at kasintahan ang nangyari sa kanya.

Binalak mang magdemanda ng rape ay hindi na niya naituloy, dahil sinabihan na siya na hindi aakyat ang kaso dahil kusa siyang sumama. 

Nagsampa rin siya ng kaso para sa financial support pero hindi na rin niya itinuloy dahil kaya na naman nilang buhayin ng current girlfriend ang anak.

Naikuwento rin sa amin ni Pabby na dapat ay ipi-feature ang buhay niya sa

Magpakailanman, pero hindi ito natuloy dahil nalaman ng management ng GMA-7 na humingi ng cut na nagkakahalaga ng P10,000 ang researcher ng programa. 

Na-interview na siya ng host ng show na si Mel Tiangco pero dahil nga sa nangyari ay hindi na ito natuloy ipalabas.

CARLA, PATUNG-PATONG ANG SAKIT

ni Melba R. Llanera @Insider | July 1, 2023

“Forgiveness? Oo naman, importante ‘yun, pangit na nagbibitbit ka ng anger, resentment, bitterness, kasi ikaw pa rin ang talo ‘pag dala-dala mo ‘yun. Okay lang naman na ‘di siya madaliin, it takes time, ‘di siya agad-agad naa-acquire.

“'Yang forgiveness, medyo matagal na proseso, ‘di ipinipilit. Forgiveness is for you and for yourself, not for whoever should you given your forgiveness," ang naging pahayag sa amin ni Carla Abellana nang tanungin namin kung napatawad na ba niya ang taong nakasakit sa kanya na ‘di man diretsahin ay klaro naman na patungkol ito sa ex-husband niyang si Tom Rodriguez.

Nakapanayam namin ang Kapuso actress sa nakaraang presscon ng PAWS (The Philippine Animal Welfare Society) para sa enactment ng Circular 5 for protection of animals in media and entertainment industry kung saan si Carla ang tumatayong ambassador nito.

Nobyembre, 2022 nang maghiwalay sina Carla at Tom. Masalimuot at masakit ang naging proseso nito. Ang Kapuso actress pa nga ang nag-file ng annulment at humingi rin ito ng ‘temporary restraining order’.

Nag-celebrate si Carla ng kanyang 37th kaarawan nu’ng nakaraang June 12. Ayon pa sa Kapuso actress ay masaya ang naging celebration niya kasama ang pamilya at nag-sleepover din sa bahay niya ang mga pamangkin.

Nang tanungin kung binati ba siya ni Tom, agad na humindi si Carla at sinabing wala na silang komunikasyon pa ng ex-husband mula nang maghiwalay sila at mas mabuti na rin ito para sa kanilang dalawa.

Tinanong din kung bukas ba siyang makasama uli sa isang proyekto si Tom, lalo’t iisa lang ang network na kanilang pinagtatrabahuhan.

Nagpakatotoo naman si Carla at sinagot kami na sa ngayon ay hindi pa siya ready, pero kung dumating ang pagkakataong okay na siya at may magandang offer ay titingnan niya.

Consistent pa rin ang Kapuso actress sa pagsasabing wala na talaga siyang balak na mag-asawa uli. Biro pa nga sa 'min ni Carla, ‘di lang pinto ang nakasarado, kundi pati na rin bintana at may mga bakod na rin ito.

Pero sa kabila nito ay bukas din naman ang isipan ng Kapuso actress sa reyalidad ng buhay natin na walang sigurado at may mga maaaring mangyari na ‘di natin inaasahan.

Aminado rin si Carla na marami siyang natutunan sa kinauwian ng relasyon nila ni Tom, katulad ng pagmamahal at pag-aalaga sa sarili.

At nang hingan siya ng payo para sa mga kababaihan na balak nang mag-asawa, ang sey ng Kapuso actress ay ‘wag na ‘wag pababayaan ng isang babae ang sarili niya.

Dagdag pa niya, dapat ay laging mag-reflect ang isang babae kung masaya ba ito sa ginagawa niya, kung may mga bagay ba na labag sa kalooban nila at kung ibinabalik ba ng kanilang partner ang ibinibigay nilang pagmamahal.

Nang tanungin din kung anu-ano ba ang mga katangian ng lalaki na maaaring susunod niyang mamahalin, ayon sa Kapuso actress, ang mahalaga ay mabait ito, tapat, maalaga at may paniniwala sa Diyos.

Balik-teleserye na si Carla, bibida siya sa GMA-7 series na The Stolen Life kung saan makakasama niya rito sina Gabby Concepcion at Beauty Gonzalez. Naghahanda na rin siya sa isa pa uling serye at sa isang pelikula na entry sa 2023 Metro Manila Film Festival.

Aktibo muli sa kanyang showbiz career si Carla, pero dapat din itong maghinay-hinay dahil sa kanyang kalusugan sa ngayon.

‘Di pa pala tuluyang nagagamot ang thyroid problem ng Kapuso actress, at lumipat na nga raw siya ng bagong endocrinologist. Nalaman din niyang may dalawang health problems pa pala siya na kasalukuyan na ring ipinapagamot.

Ang dalawang health problems ni Carla ay ang tachycardia (irregular heartbeat) at neurocardiogenic syncope, kung saan umaakyat ang dugo sa utak pero nahihirapan itong bumalik kaya’t prone siya na mahilo at mahimatay.

Sinusunod naman ng Kapuso actress ang bilin sa kanya ng cardiologist at endocrinologist niya. Bukod dito ay pinapahalagahan na rin ni Carla ang pagkakaroon ng tamang oras ng pagtulog, kung kailan dapat magpahinga at umiiwas na rin siya sa mga stress sa trabaho sa showbiz.

Sa huli ay pabirong natanong si Carla kung sino o ano ba ang mas pipiliin niyang mahalin sa ngayon, ang mga tao o hayop?

Walang pagdadalawang-isip na sumagot ang Kapuso actress na mas pipiliin niya ang mga aso dahil ang mga ito ay hindi marunong manghusga, nagbibigay ng unconditional love, at ‘di marunong magtanim ng galit o sama ng loob.

Itinuring pa naman daw na kuya, Julia… JOSHUA, TINEXT SI GERALD PARA MAG-USAP SILA, DINEDMA LANG

ni Melba R. Llanera - @Insider | August 30, 2020

Eksklusibong nakapanayam ng Cinema News At Home Edition si Joshua Garcia na ipinalabas nu'ng nakaraang Biyernes hosted by Bianca Gonzales at dito'y inamin ng Kapamilya actor na kung may isa siyang tao na gusto niyang makausap na "no holds barred" ngayong lockdown, ito ay si Gerald Anderson.

Ayon kay Joshua, tinext niya si Gerald kung puwede ba silang mag-usap para maayos ang lahat pero hindi pa siya nakatanggap ng reply mula rito.

Paliwanag ni Joshua, ngayong lockdown ay mahirap na may taong 'pinangingilagan' niya lalo na't itinuring niya ito na parang kuya dahil iisa lang ang handler nila at maliit ang mundo ng showbiz at nasa iisang network lang sila.

Tinanong din si Joshua kung ano ba ang isang bagay na pinaka-na-miss niya kay Julia Barretto mula nang mag-break sila, at agad niyang sagot, ito ay ang presensiya sa buhay niya ng ex-girlfriend.

Inamin din niyang iba rin kasi sa pakiramdam na alam mong may kasama ka sa lahat ng bagay lalo't sila na ang magkasama mula nang nagsisimula siya sa showbiz.