2 yrs. na-depressed… RHIAN, KUMOKONSULTA PA RIN NG PSYCHIATRIST

ni Melba R. Llanera @Insider | Apr. 14, 2025

Photo: Rhian Ramos - Instagram

Sa nakaraang guesting ni Rhian Ramos sa Fast Talk with Boy Abunda (FTWBA), ipinagtapat ng Kapuso actress na dalawang taon siyang nakaranas ng depresyon dahil sa mga isyu at intriga na ipinukol sa kanya na kahit ang sarili niya ay naniwala na totoo ang mga ito. 

Ayon nga kay Rhian, ito ang itinuturing niya na lowest point ng kanyang buhay kung saan umabot sa puntong muntik na niyang sukuan ang kanyang showbiz career at kahit ang kanyang buhay. 

Pagbabalik-tanaw ng Sinagtala lead actress, pakiramdam niya noon ay nag-iisa siya at kahit nga malapit siya sa kanyang ina na napaka-supportive sa kanya ay hindi niya magawang tumawag, kausapin, at buksan ang pinagdaraanan niya rito. 

Wala siyang ginawa noon kundi umiyak mag-isa, magkulong sa kuwarto at magmukmok. Nagulat na lang siya na isang araw ay naramdaman niya na magaan na ang pakiramdam niya at kaya na niyang maging masaya. 

Aminado si Rhian na bukod sa musika, pamilya at mga malalapit na kaibigan na nagsilbing support system niya ay malaking tulong ang mga psychiatrists na nakausap niya noon at paminsan-minsan ay bumabalik siya at kumokonsulta pa rin sa mga ito.  

Heto nga’t excited siya sa pagsisimula ng Sang’gre, kung saan ipinagmamalaki niya hindi lang ang mga naggagandahang costumes kundi mas higit ang takbo ng istorya at action scenes na talagang pinaghirapan nila. 

Isa rin sa mga nakalinyang gawin ni Rhian ay ang GL (girl’s love) movie na pagtatambalan nila ni Glaiza de Castro na may titulong I Feel, It’s Okay (IFIO). Sa tanong namin kung bukas ba siya kung magkakaroon sila ng kissing scene o intimate scene sa pelikula, agad naman kaming sinagot ni Rhian na walang magiging problema sa kanila lalo’t nagkaroon na sila ng kissing scene noon ni Glaiza sa seryeng Richman’s Daughter (RD) pero hindi lang ito naipalabas dahil ‘di pa noon bukas ang mga manonood sa ganitong klase ng mga eksena. 

Pagkukuwento sa amin ni Rhian, sa ilang beses na rin nilang pagsasama ni Glaiza sa mga proyekto ay gamay na nila ang isa’t isa at kaya na nilang magpasahan ng enerhiya at magsaluhan.  

Gumaganap bilang June sa pelikulang Sinagtala kasama sina Rayver Cruz, Glaiza de Castro, Matt Lozano at Arci Muñoz sa ilalim ng direksiyon ni Direk Mike Sandejas, memorable para kay Rhian ang nasabing pelikula dahil bukod sa nasa puso niya talaga ang musika mula pa pagkabata ay nakakita siya ng totoong mga kaibigan at pamilya sa mga nakasama niya sa naturang pelikula. 

Bukod sa regular screening ay may mga block screenings daw sa Sinagtala at masasabi naman na maganda ang pelikula, mahuhusay ang mga gumanap at may mga aral at inspirasyon kang makukuha rito.  

Masaya at kuntento rin si Rhian sa relasyon nila ng kasintahan na si Sam Verzosa na ngayon ay abala rin sa kampanya kung saan tumatakbo ito bilang alkalde ng Maynila. 

Paminsan-minsan ay sumasama si Rhian sa pag-iikot kung saan bigla na lang siyang sumusulpot kapag kaya ng kanyang schedule at nami-miss niya ang kasintahan. 

Tinanong namin kung handa na ba siyang mag-level-up ang relasyon nila ni Sam at mauwi na sa engagement at kasalan ang lahat. 

Para kay Rhian, ang lahat ay nakadepende kay Sam dahil ito ang magtatanong at mag-aalok ng kasal. Pero siniguro sa amin ni Rhian na oo ang isasagot niya dahil ‘di naman siya tatagal sa relasyon nila ni Sam kung hindi siya sigurado sa nararamdaman niya para rito.  

---

MARAMI ang nagtatanong at nag-aabang kung hanggang saan daw kaya aabot ang reklamong grave threat na isinampa ni Jojo Mendrez laban kay Mark Herras. 

Kung saka-sakaling aakyat ang reklamo at maging kaso, mananatili raw kaya ang kagustuhan ng Revival King na magpatuloy ang kaso o lalambot din ang puso nito at papatawarin din ang Kapuso actor? 

Sa ngayon nga na malayo na ang loob ni Jojo kay Mark, kataliwas naman ito sa namumuong closeness sa pagitan nila ni Rainier Castillo kung saan spotted sila na magkasamang nagsa-shopping at kumakain sa labas. 

Samantala, nagpahayag na rin ng suporta kay Jojo at galit kay Mark si Claudine Barretto dahil sa mga nangyari. 

Marami ang nag-aabang kung sino pa raw kaya ang mga susunod na artista na magpapakita ng suporta at simpatya kay Jojo.  

Sa ngayon ay nakapokus ang Revival King sa The Boy 2025 Nationwide Search para makahanap ng ka-collab ni Jojo sa kantang I Love You Boy na unang pinasikat ni Timmy Cruz at isinulat ni Mon del Rosario. 

Mag-uuwi ang mananalo ng P1 million cash prize. Para makasali, puwedeng magpadala ng sample video online at thru on-ground audition.

May mga ‘pitik’ daw kaya uminom ng gamot… ZEINAB, NAGPA-PSYCHOTHERAPY DAHIL SA DEPRESYON

ni Melba R. Llanera @Insider | Apr. 1, 2025

Photo: Zeinab Harake - Instagram

Dumaan pala sa matinding depresyon si Zeinab Harake nu’ng 2022-2023 kung saan nagdesisyon siyang sumailalim sa psychotherapy at medications. 

Sa press conference ng OK2B Empowered Together, Women's Month VIP Event By OKBet kung saan isa si Zeinab sa mga ambassadors, inamin nito na nakaramdam siya na may mga pagkakataon na pumipitik siya kaya napagdesisyunan niyang magpagamot. 

Ayon nga sa sikat na content creator, ito ang panahon na marami siyang pinagdaraanan at kabi-kabila ang mga pamba-bash sa kanya na nakaapekto nang malaki sa mental at emotional health niya.

Ipinagpapasalamat na nga lang niya na nu’ng panahon na ito ay dumating sa buhay niya ang fiancé na si Bobby Ray Parks, Jr. na nu’ng una nga ay iniiwasan niya dahil pakiramdam niya ay hindi pa siya handang pumasok sa isang panibagong relasyon at alam niya na may iniinda siyang sakit na hindi dulot ng ibang tao kundi nanggagaling sa sarili niya. 

Pagbabahagi pa ni Zeinab, nag-exert ng extra effort para makapasok sa buhay niya si Ray at ipinagpapasalamat niya ito dahil ang fiancé ang naging daan para maging mas malapit siya sa Diyos. 

Siniguro rin niya sa fiancé na hindi niya ito ginamit o ginawang rebound lang, kundi minahal niya talaga ito nang totoo. 

Masaya si Zeinab na nalagpasan na niya ang nasabing mental health problem na wala siyang idinamay na ibang tao at nagawa niya ang parte niya sa kanilang pamilya. Sa ngayon nga ay hindi na siya umiinom ng gamot.  

Kinumpirma rin ng content creator/vlogger na ngayong taon magaganap ang kasal nila ni Ray at isa itong outdoor Christian wedding, kung saan ang gusto nina Zeinab at Ray ay magbigay-puri sa Panginoon na siyang sentro ng kanilang relasyon. 

Gusto rin sana nilang gawin ito abroad pero pinili na lang nila sa bansa dahil nahihirapan siyang ilipad ang mga anak. 

Nagkaroon na rin sila ng mga prenup shoot kung saan lahat ng konsepto ay galing mismo kay Zeinab. 

Hindi naman magiging pribado ang kasal gaya ng ginawa ng ibang showbiz couples. Ayon kay Zeinab ay hindi ito gagawing pribado pero hihingi lang siya ng private time dahil mayroon siyang binabalak. 

Bumili na nga sila ng phone na pang-sim blocked dahil ang gusto nina Zeinab ay lahat ng mga larawan at videos ay manggaling sa kanila at sila ang mag-e-edit. 

Nagkaroon na kasi ng karanasan ang vlogger na nu’ng prenup ay inilabas ng isa nilang supplier ang ilang larawan, kung kaya’t umiyak siya at nataranta. 

Ayaw na itong maulit muli ni Zeinab kung kaya’t hands-on siya sa kanyang video team. 

Pakiusap lang ng vlogger ay labas muna ang social media sa araw ng kanyang kasal at ang mahalaga lang ay ang presensiya ng mga taong totoong nagmamahal sa kanila.  

Samantala, isa sa mga umagaw-pansin sa nakaraang Bench Body of Work ay ang ginawang pagrampa ni Zeinab habang nagba-baton twirling, isang pangarap na natupad dahil bata pa lang pala si Zeinab ay dream na talaga niyang rumampa. 

Bench ang nag-suggest na mag-baton twirling siya pero na-disappoint nga lang siya nu’ng ‘di niya nasalo ‘yung baton. 

Pinaliwanagan lang siya ng fiancé na hindi dapat malungkot sa nangyari. Dapat pala ay kasama si Ray na rarampa nang gabing iyon pero natiyempo na may laro ito sa labas ng bansa.

---

BUKAS ang puso para magpatawad pero isinasarado na ni Jojo Mendrez ang pinto para magkatrabaho silang dalawa muli ni Mark Herras pagkatapos siyang pagbantaan diumano nito na susunugin ang bahay niya. 

Ang huling pagkikita nila ni Mark ay du’n sa 38th Star Awards for TV, nagpaalam lang na magsi-CR ang aktor pero iniwanan siya at hindi na bumalik para makasama sanang mag-present ng isang special award sa naturang awards night. 

Sa press conference ng Revival King, ramdam namin ang lungkot at sama ng loob nito sa StarStruck alumnus, kaya’t nagdesisyon na ito na tuldukan kung anuman ang kaugnayan nila ni Mark. 

Ang tanging hiling na lang niya para sa aktor ay pagbutihan nito ang mga trabahong ipinagkakatiwala sa kanya at matutong mag-ipon, lalo’t may babayaran pa itong bahay sa loob ng mahabang panahon.  

Sa ngayon ay mas lumapit ang loob ni Jojo kay Rainier Castillo, na ayon sa una ay may sariling pera dahil may sarili palang negosyo si Rainier bukod pa sa aktibo rin naman ito sa kanyang showbiz career. Huling napanood ang aktor sa seryeng Black Rider (BR) ng GMA-7.  

Hindi natin alam kung saan hahantong ang tampuhan na ito nina Mark at Jojo pero ang sigurado lang ay tuluy-tuloy ang singing career ng Revival King, kung saan pagkatapos ng matagumpay na revival niya ng kantang Somewhere In My Past (SIMP) at ng original niyang kanta na Nandito Lang Ako (NLA) na composed ni Jonathan Manalo, nakalinya niyang i-revive ang mga kantang Tamis Ng Unang Halik (TNUH), Pare, Mahal Mo Raw Ako (PMMRA) na una namang pinasikat ni Michael Pangilinan at I Love You Boy (ILYB) na lalagyan daw niya ng twist.

Aktres, sobrang happy sa bagong BF… ECHO, TANGGAP NG PAMILYA NI JANINE

ni Melba R. Llanera @Insider | Mar. 29, 2025

Photo: Jericho Rosales at Janine Gutierrez - Instagram

Solo flight na dumalo si Janine Gutierrez sa 38th Star Awards for Television kung saan itinanghal siya bilang Best Drama Supporting Actress para sa seryeng Lavender Fields (LF). 

Nang tanungin namin kung nasaan ang rumored boyfriend na si Jericho Rosales, agad naman kaming sinagot ng Kapamilya actress na gusto nga sana nitong sumama pero nasa shooting ng Quezon si Echo at nag-congrats ito sa kanya.

Exclusively dating at wala pa mang pinal na pag-amin sa relasyon nila ng aktor, marami naman ang naniniwala na sila na talaga ni Echo. 

Bukod kasi sa maraming pagkakataon na spotted ang dalawa, nag-post si Janine sa kanyang vlog ng Japan trip nila ng aktor at ang kanilang Valentine’s date kung saan nag-swimming naman sila. 

Tinanong din namin kung ano ang reaksiyon niya na boto ang mga magulang na sina Lotlot de Leon at Ramon Christopher kay Echo. 

Ani Janine, okey si Jericho sa pamilya nila at kahit naman dati pa ay chill at hindi nanghihimasok sa pakikipagrelasyon niya ang mga magulang. 

Masaya rin si Janine na may taong tulad ng rumored boyfriend sa buhay niya na nagtitiwala sa kanyang kakayahan dahil mas madali ngayon ang sumugal sa mga roles at magtiwala sa kanyang kakayahan.  

Hindi naging madali para kay Janine na gampanan ang role bilang Iris Buenavidez-de Vera na kontrabida sa LF. Ito ang role na akala niya ay hindi niya magagampanan, pero dahil sa tiwala at tulong ng namayapang Dreamscape head na si Sir Deo Edrinal, ng sumakabilang buhay na rin na manager na si Leo Dominguez, at mga big bosses ngayon ng Dreamscape na sina Kylie Balagtas, Rondel Lindayag at Joel Mercado ay nagampanan niya ang nasabing role nang buong epektibo.  

---

ISA si Alexia Nuñez sa mga dayuhan na nakita naming iba man ang lahing tinataglay ay ramdam na ramdam mo ang pagmamahal sa bansa natin, lalo na sa mga katutubo gaya ng T’boli na nakilala niya nang bumiyahe siya sa Lake Sebu, South Cotabato. 

Sila ang naging inspirasyon ni Alexia sa kanyang mga fashion designs na Eon Collection by Alexia Nuñez, na kahit sabihin mang walang background sa fashion designing ay bibilib ka sa ganda at galing ng mga nagawa niyang disenyo na galing sa mga recycled materials. 

Sinariwa nga ni Alexia kung paano siya pinaalalahanan noon ng ilang tao na huwag bumiyahe pa-Mindanao dahil delikado roon. Pero dala ng pagiging adventurous at sinusunod pa rin ang kanyang sarili, tumuloy pa rin siya at dito ay nakita niya ang higit na ganda ng Pilipinas.  

Isang Brazilian model si Alexia at napanood na rin siya sa FPJ Batang Quiapo (BQ) bilang guest. 

Sa ngayon ay maligaya siya sa piling ng kanyang partner na Pinoy na si Billy James Cash. 

---

Sa nakaraang 38th Star Awards for Television ng Philippine Movie Press Club (PMPC), tinanong namin si Barbie Forteza kung babatiin ba niya ang ex-boyfriend na si Jak Roberto kung saka-sakaling magtagpo ang landas nila. 

Agad namang umoo ang Kapuso actress at siniguro na wala siya ni anumang tampo o sama ng loob kay Jak. 

Pinarangalan ang BarDa o Barbie Forteza-David Licauco love team bilang Power Tandem of the Year sa 38th Star Awards for TV at ka-tie nila ang KimPau o Kim Chiu-Paulo Avelino tandem. 

Pahayag ni Barbie, sobrang ikinatataba ito ng puso niya at labis ang pasasalamat niya sa mga tagahanga na hindi bumitiw sa kanila at laging buo ang suporta at pagmamahal sa kanila ni David, kahit meron silang kani-kanyang mga proyekto.

Ngayong pareho na silang single, kung saan nauwi sa breakup ang 7 taong relasyon nila ni Jak, at balita rin na naghiwalay na si David at ang kanyang non-showbiz girlfriend, marami ang umaasa na mauuwi na sa totohanan ang BarDa tandem. 

Para kay Barbie, nangangahulugan lang ito na ganu’n kaepektibo ang kanilang tambalan ni David kaya may ganitong iniisip ang mga tagahanga nila. 

Aminado siyang mas naging malapit sila ng kapareha sa isa’t isa. Papuri pa ni Barbie kay David ay isa itong mabuting tao at kaibigan.  

Sabi ni Barbie, sa ngayon ay ine-enjoy niya ang pagiging single. Marami siyang nadidiskubre sa sarili gaya ng kaya pala niyang maging morning person, tumakbo at mag-exercise, at mas minamahal daw niya ang sarili sa paglipas ng bawat araw.  

After Pulang Araw, may gagawing serye si Barbie at may naka-line-up ding pelikula. Si David naman ay parte ng movie na Samahan ng mga Makasalanan (SNMM). 

Hiwalay man sa ngayon sa mga ginagawa nilang proyekto, balitang may pelikula na inihahanda sa ngayon para sa muling pagtatambal ng dalawa.