3 nakasama ng OFW na positibo sa Indian variant, nagpositibo rin sa Covid

ni Mary Gutierrez Almirañez | May 15, 2021

Tatlo sa 32 close contacts ng overseas Filipino worker (OFW) na nagpositibo sa Indian variant ng COVID-19 ang kumpirmadong positibo rin sa COVID-19, ayon kay Department of Health (DOH) Undersecretary Maria Rosario Vergeire ngayong araw, May 15.

Aniya, “As to the case number 2, the 58-year-old male from UAE, meron po tayong verified na 32 close contacts doon sa eroplano at tatlo po sa kanila ay positive.”

Sa ngayon ay ipinadala na ng DOH sa genome sequencing ang test results ng tatlong nagpositibo sa COVID-19, upang malaman ang variant na kumapit sa kanila.

6 nakapasok sa 'Pinas mula India, positibo sa COVID-19

ni Lolet Abania | May 5, 2021

Anim na biyahero mula sa India na dumating sa Pilipinas bago pa man ipinatupad ang mahigpit na border restrictions ang nagpositibo sa COVID-19, ayon sa ulat ng Department of Health (DOH).

Ayon kay DOH Undersecretary Maria Rosario Vergeire, nasa 110 travelers mula sa India ang sumailalim sa COVID-19 testing. “Anim (Six) turned out to be positive and it is now submitted to the Philippine Genome Center for whole genome sequencing,” ani Vergeire sa online briefing ngayong Miyerkules.

“Meron pong anim na hanggang ngayon ay nilo-locate pa rin natin,” dagdag ng kalihim. Matatandaang nagpatupad ang pamahalaan ng temporary ban sa lahat ng mga biyahero mula sa India upang mapigilan ang pagpasok ng isang bagong coronavirus variant na unang na-detect sa nasabing bansa. Ipinatupad ang border restrictions noong April 29 habang magtatapos ito sa May 14.

Gayunman, hindi sakop o napabilang ang mga biyahero na in transit o dumating na sa Pilipinas bago ito naging epektibo. “That’s the hope, that we can prevent the entry of specific variants into the country,” sabi ni Vergeire.

Samantala, inirekomenda ng DOH na ang mga paparating na biyahero ay dapat sumailalim sa test sa COVID-19 matapos ang pito o walong araw nang dumating sa bansa, kung saan mataas ang viral load, upang maitaboy ang posibleng positibong kaso.

“Kahit ano pa pong variant… kailangan lagi po tayong protektado, so continue doing the minimum public health standards,” ani Vergeire. Sa ngayon, nakapagtala ang bansa ng 1,075 cases ng B.1.351 o South Africa variant, 948 cases ng B.1.1.7 o United Kingdom variant, 157 cases ng P.3 o Philippine variant, at 2 kaso ng P.1 o Brazil variant.

Pinoy galing India, bawal na rin sa ‘Pinas

ni Mary Gutierrez Almirañez | April 28, 2021

Hinimok ni Senator Risa Hontiveros ang Department of Health (DOH) at Inter-Agency Task Force on Emerging Infectious Diseases (IATF) na maglabas ng guidelines hinggil sa ‘automatic travel ban’ na ipinatutupad ng bansa sa mga biyaherong galing India dahil sa lumalaganap na kaso ng COVID-19.

Aniya, “Kesa mangolekta tayo ng COVID-19 variants, dapat matagal nang naglatag ng protocols at guidelines ang IATF sa pag-impose ng mga automatic travel ban base sa mga findings ng ibang bansa na available naman sa publiko.”

Dagdag pa niya, “Laging napakabagal kundi last minute ang desisyon. Kaya lahat na ng COVID variants sa mundo ay kumakalat na rito sa Pilipinas. 'Wag naman tayong maging welcoming committee ng bagong variants.”

Kaugnay ito sa pagbabawal ng ‘Pinas na makapasok sa bansa ang mga biyaherong galing India, buhat nang maitala sa nasabing bansa ang 350,000 na nagpositibo sa COVID-19 sa loob lamang ng isang araw, kung saan maging ang Indian variant ay laganap na rin sa halos 17 na bansa.

“Walang kalaban-kalaban ang mga bata sa double-mutation na ito, ni hindi sila puwedeng mabakunahan. May mga taong nakahiga na sa daan sa labas ng ospital. Are these not concerning to the Health Secretary? Hihintayin pa ba natin matulad sa India?” dagdag ni Hontiveros.

Sabi pa niya, “We should have learned from the very first COVID-19 cases of 2020, who were all travelers from China, that travel bans make all the difference. As long as COVID-19 is around, we have to remain vigilant and act fast.”

Samantala, maging ang mga Pinoy galing India ay pinagbabawalan na ring makapasok sa bansa, ayon kay Department of Health (DOH) Undersecretary Maria Rosario Vergeire.

Paliwanag pa ni Vergeire, “Napagdesisyunan that even our fellow Filipinos, hindi muna natin papapasukin for this temporary period. This is just so that we can be able to ensure na ma-guard natin ‘yung borders natin.”

Sa ngayon ay lumagpas na sa isang milyon ang kaso ng COVID-19 sa bansa, kung saan 71,675 ang active cases mula sa 7,204 na nagpositibo kahapon.