Miscellaneous fee sa mga hindi magagamit na serbisyo sa mga unibersidad, dapat isauli!

ni Imee Marcos - @Imeesolusyon | September 11, 2021

Sa papasok na linggo na ang pasukan at mayroon nang pilot testing ng limited at restricted face-to-face classes sa ilang unibersidad at kolehiyo. Pero, limitado lang as in kaunti lamang ang pasilidad at serbisyong magagamit dahil restricted ang person-to-person classes.

Kaya naman sa ganang atin, hindi dapat siningil in the first place ang mga miscellaneous fee sa mga pasilidad at ibang serbisyo ng State Universities and Colleges o SUCs.

Tinutukoy dito ang bayarin sa library, internet, medical, energy physical education at iba pa. ‘Di ba, limitado lang ang magagamit na serbisyo at pasilidad ng eskuwelahan? Aba, dagdag-pahirap ‘yan sa gastusin at kakapusan ng kanilang mga magulang ngayong may pandemya, ‘di ba?

Eh, nasa 24 na higher education institutions (HEIs) sa buong bansa ang pinayagang magsagawa ng restricted face-to-face classes, pero ang bilang ng mga papapasuking estudyante ay depende sa COVID-cases kung nasaang lugar ang SUCs.

Tila, inihahalintulad ang paniningil ng miscellaneous fee noong wala pang pandemya at normal pa ang mga klase. Santisima! FYI, may pandemic pa rin tayo, ulitin natin, restricted ang face-to-face classes, kaya hindi rin makatuwiran na pabayaran lahat ng nasabing mga miscellaneous fee, okay?!

Hay naku, nadaragdagan pa naman ngayon ang mga magulang na walang trabaho dahil sa tila walang tigil na lockdown na hanggang ngayon naman, hindi pa makontrol ang nadadale ng virus. Juicekoday!

IMEEsolusyon natin d’yan, dapat silipin na ito ng Commission on Higher Education (CHED). Plis naman, para makabawas sa burden ng mga magulang ang gastusing ibinayad na noong enrollment, pasuyo lang pakisauli sa kanila ang naturang mga miscellaneous fee.

Malaking bagay ito at malaking kaluwagan sa mga magulang at mga estudyante kapag nai-refund ang nasabing miscellaneous fee. Agree?!

Mga magsasaka sa 'pinas, tumatanda na; young farmers, patulungin

ni Imee Marcos - @Imeesolusyon | September 08, 2021

Nababahala tayong habang umuusad ang panahon, patanda na nang patanda ang ating mga magsasaka. Paano na kaya ang mangyayari sa atin sakaling nanghina na sila at tuluyan nang hindi makapagbungkal ng lupang sakahan?

Kanin pa naman ang pangunahing pagkain nating mga Pinoy, eh, paano kung wala na ngang matirang magsasaka at magsitandaan na silang lahat. Ano na ang ating gagawin? May mga anak mang umaalalay sa kanilang mga magulang, pero karamiha'y nagsisisuko rin at naghahanap na ng ibang trabaho.

Ayon nga sa Department of Agriculture, mayorya ng mga kabataan, hindi na talaga interesado sa pagsasaka. Ang average na edad ng mga magsasaka ngayon mula 2018 ay 57 years old. Juicekolord, malapit na sa pagiging senior citizen!

Base nga sa tala ng DA, bumaba talaga ang bilang ng mga magsasaka o farm workers na nasa 1.5% mula noong 2007. Mula 11.84 million naman noong 2015, bumaba na lang ang mga farm workers sa 9.8 million nitong nagdaang taon. OMG talaga!

Eh, tayo pa naman, mahal natin ang mga magsasaka at bilang economic committee chair sa Senado, naku, ha? Hindi ko mapababayaan 'yan, kaya IMEEsolusyon natin, hikayatin ang kabataang magsasaka na pagyamanin ang mga lupang pansakahan sa Pilipinas sa pamamagitan ng programang "Young Farmer's Challenge".

Makatutuwang natin ang DA na magbibigay ng agribusiness grant sa sinumang magwawagi sa ating pa-contest para sa kabataang makapagpiprisinta ng mahusay na programang pang-agraryo o anumang related sa farming o fishing. Ito ay puwedeng pang-indibidwal o grupo ng mga kabataang magsasaka.

Sinumang mapipiling winner ay mabibigyan ng financial aid na nagkakahalaga ng kabuuang P74 million bilang panimulang pangkapital. Oh, 'di ba? Bongga! Saan ka pa? Kaya inaasahan nating lalahok ang mga kabataang Pinoy na edad 18 hanggang 30.

Ang mga kuwalipikadong aplikante ay kinakailangang makapagpadala ng kanilang Business Model Canvas (BMC) na potensyal na pagkakakitaan para sa Agribusiness at Marketing Assistance Service o AMAS.

Marami-rami na rin ang nagpakita ng interes at nag-apply at baka naman meron iba pang interesadong mga kabataang magsasaka dyan na may green thumb o interesado sa fishing, eh, ano pa ang hinihintay nyo, 'di ba!

Ibigay agad ang SRA at hazard pay…‘WAG HINTAYING MAG-RESIGN NANG SABAY-SABAY ANG MGA HEALTH WORKERS

ni Imee Marcos - @Imeesolusyon | September 03, 2021

Sa ikatlong pagkakataon, dismayado tayo sa pangakong napako ng Department of Health. Hindi pa rin naibigay ang Special Risk Allowance ng mga health workers at hazard pay na ipinangako nilang ipamamahagi sa lalong madaling panahon.

Aba, mahigit lang sa 20, 000 ang uunahing bigyan ng SRA, pero reklamo to the max pa rin ang ating mga kababayang health workers dahil hindi pa rin tumupad ang DOH sa itinakda nitong petsa. ‘Ika nga nila, marami pa rin ang hindi nakatatanggap, lalo na ang mga nasa LGUs.

Kaya naman, natuloy ang protesta ng mga health workers nationwide! Eh, kung hindi magmamadali ang DOH na gawan ng paraan ang hazard pay at SRA na binigyan naman ng bilyones na budget at matagal na nilang hinihingi, nagbanta silang magpapatuloy ang kanilang kaliwa’t kanang protesta.

Reminder natin sa DOH, nakakapangambang totoo kapag hindi maibibigay agad ang kanilang hirit na mga benepisyo, lalo na kung itutuloy nila ang bantang mass resignations! Juicekolord, ano na ang mangyayari sa mga COVID-19 patients? Biruin ninyong sumampa na sa mahigit dalawang milyon ang mga Pinoy na na-COVID!

Ano ba talaga ang dahilan na hindi mabayaran ang health workers? Saan na ang pondong inilaan sa inyo, DOH? Hihintayin n’yo pa bang tuluyan silang magsipag-resign nang sabay-sabay?

Plis lang, isama rin sa bibigyan ng mga hazard pay ‘yung mga janitress, guards ng ospital at iba pang hospital staff dahil lantad din sila sa virus, ha?

IMEEsolusyon sa problemang ito, unang-una ay ‘wag mangangako ng petsa ang DOH na hindi kayang panindigan. Never maging paasa sa mga frontliners na buwis-buhay ang pagseserbisyo sa mga pasyenteng na-COVID.

Ikalawa, IMEEsolusyon na gawin nang puspusan ang pagbibigay-prayoridad sa mga isyu ng mga benepisyo. Hingin na ang tulong ng iba pang ahensiya ng gobyerno na may kinalaman dito, tulad ng Department of Budget and Management, dahil baka may mahugutan pa ng pera.

IMEEsolusyon din na i-push lang ng husto sa mga kasamahan nating mambabatas ang need na suporta para sa dagdag-pondo, ngayong pinag-uusapan ang National Budget para sa susunod na taon. Pagtulung-tulungan na nating malutas ito, plis lang. Patotohanin ang awa sa pagbigay ng SRA at hazard pay ng ating mga healthcare workers, now na!