Mga lokal na maggugulay, isalba sa panibagong pananamantala ng mga importer at smuggler!

ni Imee Marcos - @Imeesolusyon | October 04, 2021

Heto na naman tayo. Matapos ang isda at bigas, gulay naman ngayon ang ini-import natin? Bakit? Aber, pakipaliwanag nga? Reminder, nasa gitna pa tayo ng pandemya, ha? Pero heto na naman ang pamamayagpag ng mga mapagsamantalang negosyanteng importer? Ano ba!

Hindi ko talaga maintindihan ang sistemang ito na import nang import, eh, ang malaking tanong, kapos ba ng gulay, 'di ba hindi? Nakapagtataka naman at napapalusot ito ng Department of Agriculture. Nasa walong metriko

toneladang mga kamatis mula Ifugao ang itinapon na lang, ibinenta ng palugi sa mga hog at duck raisers, o ibinalik na lang sa kanilang mga taniman dahil sa hindi man lang ito binibigyang-pansin ng DA.

Nakakapikon talaga, eh, 'di ba nga, sobra-sobra ang supply ng mga lokal na gulay natin sa Benguet at iba pang taniman sa Cordillera at nabubulok na nga lang sila? At palugi nang ibinebenta ito ng ating mga lokal na maggugulay?! Ano ba naman kayo, DA! 'Wag naman magbulag-bulagan na naman!

Hello! Namamayagpag na rin maging ang smuggling ng mga gulay mula China, nasaan kayo? Aba, pananabotahe na ito sa ating ekonomiya, nasa kasagsasagan pa tayo ng pandemya, remember! Juicekolord!

Eh, 'di ba nga kamakailan lang nakakumpiska ang BOC ng nasa Php4.7 milyong imported na mga repolyo, carrot, broccoli at iba pang gulay sa isang raid sa Divisoria at iba pang parte ng Tondo, Manila.

Awang-awa tayo sa ating local farmers, biktima na naman sila ng mga mapagsamantalang negosyante. Hindi natin palulusutin ang mga 'yan. IMEEsolusyon natin d'yan, paiimbestigahan natin 'yan sa pamamagitan ng resolusyon.

Ipahahanting din natin ang mga importer at opisyal sa DA at taga-Bureau of Customs na sangkot sa agricultural smuggling. Grabe kayo, ha? 'Wag ganyan, mga bantay salakay na pesteng dapat nang masampulan!

At, para naman sa walang kasusta-sustansiyang pamamalakad ng DA, aba, magkakain nga kayo ng lokal na gulay! Tanong ko lang nasaan na ang mga Kadiwa trucks, lulubog-lilitaw lang ang peg niyan, ha? Ano'ng silbi niyan, panakip-butas lang kapag may problema? Dapat tuluy-tuloy ang pagtakbo niyan! Plis naman DA, gising! Pagaanin n'yo naman buhay ng ating mga local farmers at ating mga kababayan! Now na!

Presyo ng palay, sadsad na naman; mga magsasaka, pakialalayan naman ng DA

ni Imee Marcos - @Imeesolusyon | September 27, 2021

Sadsad na naman ang presyo kada kilo ng palay sa P10 hanggang P13 dahil sa paparating na panahon ng anihan. Kawawang mga magsasaka.

Pero ang higit na masaklap, mga friendship, inihayag ng grupong Samahang Industriya ng Agrikultura (SINAG) na wala umanong ganang mamili ng palay ang mga local miller para hindi raw sila malugi! Ano ba ‘yan? Eh, kasi nga raw dahil ito sa dami ng mga imported rice na dumarating sa bansa.

At tinaya pa ng SINAG na siguradong babagsak pa ang presyo ng palay dahil magsisimula pa lang ang bulto ng anihan sa loob ng isa hanggang dalawang linggo mula ngayon. Juicekoday!

Naalala na naman natin bago pa sumiklab ang COVID-19 pandemic, eh, talagang palugi nang ibinibenta ng mga magsasaka ang kanilang mga aning palay. At heto na naman ngayon. Hay kaawa-awa na naman ang ating farmers.

Ang malaking problema ngayon, paano na ang mga inaning palay at aanihin pang palay ng mga magsasaka?

IMEEsolusyon lang dito, eh, pakiusapan ulit natin ang Department of Agriculture na bilhin ang palay ng mga lokal na magsasaka sa P16 kada kilo kung basa at P19 per kilo naman kung tuyo.

At harinawa ang NFA, eh, panatilihin ang P19 na pagbili ng tuyong palay na may 14% moisture content bilang tulong na sa ating mga magsasaka kahit sumadsad na naman ang presyo nito kada kilo.

Sa kuwenta ng SINAG, nasa P15 ang ginagastos ng mga magsasaka para makaani ng isang kilong palay. Ngayong nangangailangan ang mga magsasaka ng suporta mula sa pamahalaan, hoping tayo na aalalay sa kanila ang DA at ang economic team ng ating pamahalaan.

Hirit naman natin sa ating mga kasamahan d’yan sa DTI, pakibantayan ang mga bentahan ng bigas sa merkado. Baka naman kasi kahit bagsak-presyo na ang mga palay, eh, may ilang mga negosyante pa ring matututong magsamantala at magtaas ng presyo ng bigas, ‘di ba?! Mabuti nang maagapan kaysa maunahan na naman ng mga mapagsamantalang trader!

Malaking bagay ang face-to-face classes sa mga estudyante, magulang at guro

ni Imee Marcos - @Imeesolusyon | September 23, 2021

Noon pa man, go tayo sa ideyang limidatong face-to-face classes. Dahil unang-una, pare-parehong makatutulong ito sa pagbalanse ng buhay ng mga guro at estudyanteng nabuburo na lang sa bahay, at doble-pahirap naman sa mga magulang na abala na sa gawaing bahay, tumatayo pang titser din sa online classes.

Kaya naman, suportado natin ang pilot testing ng face-to-face classes ng nasa 120 paraalan. Tinitingnan ngayon ng DepEd at CHEd, ang mga lugar na kakaunti lang ang kaso ng COVID-19.

Pasalamat tayo kay Pangulong Rodrigo Duterte at aprubado na niya ito at nakita ang pangangailangang simulan na ang paunti-unting panunumbalik ng mga face-to-face classes. Eh, ‘di ba nga, ayon sa World Bank, ang pagsasara ng mga eskuwelahan na tumagal ng limang buwan ay magreresulta sa pagkawala ng 0.6 na taon ng pag-aaral.

Ikalawa, bagama’t nakababahala ang sitwasyon ngayong may pandemya, kailangan na itong isagawa dahil mawawalan na ng interes sa pag-aaral, ambisyon at pagiging positibo ang mga mag-aaral, ‘di ba?! Whether we like it or not, new normal na tayo at kailangan nating yakapin ang sitwasyon na may COVID-19 sa ating paligid.

Ikatlo, ang mental health ng mga bata, magulang at guro ay dapat ring isaalang-alang. Huwag natin hayaang ang pagkaburo sa online classes ang maging daan para mauwi sa depresyon ang pag-iisip ng mga batang bagot na bagot na sa bahay! Kahit ang tibay ng loob ng mga nanay at guro may hangganan din.

Basta marunong lang sumunod sa health protocols ang mga school administrators, titser, mag-aaral at iba pang school staff, mairaraos natin ang face-to-face classes.

IMEEsolusyon sa pilot testing na ito, eh, dapat doble ang pag-iingat para hindi magmintis. Maraming proseso pa ang daraanan nito bago tuluyang maisakatuparan. Para sureball ang pagiging epektibo nito, kailangan munang sumang-ayon ang mga LGUs kung nasaan ang mga paaralang lalahok sa pilot testing at ang lahat ng mga magulang kailangan din hingan ng permiso.

Dahil hindi compulsory o pipilitin ang mga magulang, kailangan pang masiguro ng bawat paaralan kung ilang estudyante ang lalahok, tapos aayusin pa ang scheduling ng mga klase, pati ang bagong paglatag ng mga classroom.

Ang mga teacher na above 65 kailangan namang mahanapan ng gagawin kung hindi sila papayagan makalahok sa face-to-face classes. Maiiwasan ang peligro sa kanilang kalusugan kung hahawakan nila ang mga online classes na itutuloy pa rin naman, kasi paiikliin ang oras ng sa face-to-face.

Kung susundin natin lahat ng factors at bagay na dapat nating bigyang-konsiderasyon bago ipatupad ang pilot testing ng face-to-face classes, siguradong magtatagumpay ito. Kaya plis lang, ang suporta ng mga magulang sa kanilang mga anak at konsiderasyon sa mga guro ang susi ng maayos na implementasyon nito. Agree?