Pondo para sa MIF, kinuwestiyon ni Sen. Imee.. 'Pinas, walang pera, utang meron

ni Mylene Alfonso | May 30, 2023

Nagbabala si Senadora Imee Macos laban sa agarang pagpasa ng Maharlika Investment Fund (MIF) kung saan sinasabing malabo pa rin ang layunin at pagkukuhanan ng pondo para sa nasabing sovereign fund.

Sa isang panayam, sinabi ni Marcos na "ideal" ang pag-apruba sa panukalang batas bago ang sine die adjournment sa Hunyo 2, ngunit ang problema ay ang mismong bersyon ng Senado dahil wala pa rin aniyang "final language" at ang pinapasok na mga pag-amiyenda mula sa Department of Finance.

"Ako, kung saka-sakaling minamadali, hindi ako papayag kasi malaking pera ‘yan.

Mababaon ang ating mga anak. At hindi dapat minamadali 'yung ganyan," diin ni Imee.

Muling iginiit ni Imee na dapat malinaw ang pagmumulan ng pondo para sa MIF kasabay ng pagdiin na ang pagtatag ng sovereign fund ay dahil sa sobrang kita ng gobyerno, na aniya ay wala sa Pilipinas sa kasalukuyan.

"When you get a windfall, that is usually the beginning of a sovereign fund. I don't feel any windfall. Right now, I feel utang," hirit pa ng kapatid ni Pangulong Ferdinand Marcos, Jr., kung saan maging ang foreign sovereign funds na nagsisilbing modelo ng MIF ay kasalukuyang nasa panganib

Smuggling, hoarding at panloloko, talamak.. DA, Customs at DTI, dedma! — Imee

ni Mylene Alfonso | February 8, 2023

Inamin kahapon ni Senador Imee Marcos na hindi niya maipagtatanggol ang kontrobersyal na Regional Comprehensive Economic Cooperation (RCEP) na isinusulong ng Malacañang dahil sumasalungat umano ito sa kanyang paninindigan kaugnay sa naturang usapin.

“My conscience is not clear to defend the controversial RCEP on the Senate floor as chairman of the Senate foreign relations committee,” sabi ni Sen. Imee.

Ito ang binigyang-diin ni Marcos sa kanyang pakikipag-usap sa liderato ng Senado nang ipagpatuloy ang deliberasyon ng sub-committee hinggil sa RCEP Agreement kahapon.

Ayon kay Imee, mayroon umanong puwersa na nag-uudyok na madaliin ang RCEP kung saan idinidikdik ito na para aniyang Pilipinas na lang ang hindi pa pumipirma.

“Bilang Chairperson ng Foreign Relations Committee — ginawa ko ang lahat ng pagsasaliksik, konsultasyon at pagdinig para sa sektor ng agrikultura at maliliit na negosyo,” diin ng Senadora sa kanyang inilabas na opisyal na mensahe.

“Nababahala sila na walang aalalay sa kanila sa pandaigdigang kalakalan, hindi na nga sila makahinga sa malawakang smuggling, hoarding at panloloko, hindi pa rin naibibigay ang mga pangangailangan ng mga magbubukid pansagot sa mass importation,” punto pa nito.

Sa kasamaang palad naman aniya nabibigo ang Department of Agriculture, Bureau of Customs at Department of Trade and Industry sa pagsagot sa mga naturang isyu.

“Bilang isang probinsyana, anak ng agrikultura, hindi kaya ng aking konsensya na tayuan ang RCEP kung padadapain nito ang ating mga kababayan; iminungkahi ko na bumuo ng isang subcommittee na mas hihimay sa mga saloobin ng mga magsasaka, mangingisda at mga maliliit na negosyante,” hirit ni Imee.

“Lahat ng ito ay dulot ng aking paninindigan hindi bilang kapatid ng nasa kapangyarihan, kundi bilang anak ng legasiya ng aking ama na laging unahin ang nakararami at mas nangangailangan,” diin pa ng Senadora.

Hirit ng mga magsasaka sa Dept. of Agriculture.. BBM out, Imee in

ni V. Reyes | February 5, 2023

Nais ng grupong Samahang Industriya ng Agri-kultura (SINAG) na maitalaga ni Pangulong Ferdinand ‘Bongbong’ Marcos, Jr. bilang kalihim ng Department of Agriculture (DA) ang kapatid nito na si Senador Imee Marcos.

Ayon kay Rosendo So, presidente ng SINAG, nakita ng kanilang samahan ang pagsisikap ni Imee na matulungan ang sektor ng agrikultura.

“Sa tingin natin si Senator Imee ang puwedeng umupo as Secretary of Agriculture.

Nakita ng aming samahan ang hardwork at pagtulong niya sa agricultural sector,” pahayag nito.

Natawa lang si Senador Marcos sa suhestiyon ngunit kanyang iginiit na dapat magpatuloy ang imbestigasyon laban sa mga agricultural smuggler.

“2016 pa ‘yung batas laban sa agricultural smuggling pero wala pang nakakasuhan na tuluy-tuloy na kulong. Sana matapos na ito,” diin ng Senadora.