Swab swap program, magpapabakuna na ang tao, makakabawi pa ang mga negosyo

ni Imee Marcos - @Imeesolusyon | April 19, 2021

Hanggang ngayon, marami pa rin tayong mga kababayan na takot magpa-COVID-19 test. Ewan ko ba kung bakit marami ang natatakot, samantalang "early prevention is better than cure", di ba?

Whether we like or not, kapag tayo'y pumapasok sa trabaho o mga opisina, naoobliga tayong magpa-swab test. Kapag pupunta naman tayo sa malalayong probinsiya, bago tayo papasukin ay may nanghihingi rin ng swab test result.

Pero hopefully, ang ating mga kababayan ay makita ang kagandahan na ma-testing nang maaga para magkaalaman kung nahawahan na nga tayo ng COVID-19 para magka-tsansa na gumaling agad.

IMEEsolusyon ng inyong lingkod para maibsan ang mga takot at pag-aatubili, ma-incentivize ang mga magpapa-swab test at 'eto nga 'yung "Swap Swap program" na parehong pakikinabangan ng ating gobyerno, pribadong sektor, local government units o LGUs at taumbayan.

Paano ito? Eh, sa halip na food-dole outs lang ang ibigay para mahimok na magpa-COVID-test ang ating mga kababayan, sa "Swab Swap", ang magpapa-swab test ay mabibigyan ng voucher na may petsa kung kailan magagamit kapalit ng iba't iba pang produkto at serbisyo.

Tulad ito ng programa sa atin sa Ilocos Norte, kung saan iniaalok namin sa Ilocos ang mga voucher hindi lamang para sa pagkain kundi pati na rin sa pagbiyahe at pamamasyal, 'di ba, bongga?

Itong Swab Swap para sa COVID-19 test ay hindi hamak na malaking tulong din sa mga naghihingalo nang negosyo na malalaanan ng stimulus funding kung voucher ang gagamitin. And 100% sure na hindi rin magiging ganun ka-demanding ang gagawing pamamahagi ng mga voucher.

Puwedeng i-iskedyul ng mga LGU ang kanilang swabbing program base sa family name, alphabetical at may takdang oras para maiwasan ang pagdagsa ng mga tao.

Well, mga friendship, mas may appeal itong "swab swap vouchers" sa mga advocacy ng mga pribadong sektor at maging ng mga corporate social responsibility programs nila na tiyak na makatutulong sa gobyerno na mas maparami ang magpapa-COVID-19 test.

Oh, 'di vah! Nagpa-COVID-19 test ka na, may voucher ka pa, at makatutulong ka pa para makabawi ang maraming negosyong nalugi dahil sa pandemya!

Dapat ‘matik na ang insurance sa mga local hog industry

ni Imee Marcos - @Imeesolusyon | April 16, 2021

Tulad ng adbokasiya ng ating Pangulo, kapag magbibigay ng tulong sa ating kapwa Pilipino, hindi na dapat patumpik-tumpik at marami pang rekisitos lalo na kapag kagyat ang pangangailangan ng tulong.

Pero dahil may tradisyunal na sistema para makakuha ng ayuda, kailangan muna nilang maghintay ng deklarasyon ng state of calamity bago mailabas ang pondo at matulungan sila, kaya naman nganga pa rin ang lagay ng ating mga lokal na magbababoy o hog raisers na piniperwisyo ng African Swine Fever.

Ang problema natin ngayon, patuloy ang pagkalat ng ng nakahahawang ASF sa mga baboy sa 12 rehiyon, 40 probinsiya, 466 na mga lungsod at munisipalidad gayundin ang 2,425 na mga komunidad na ayon rin ‘yan sa April 1 report ng Food and Agriculture Organization ng United Nations.

Need na nating i-rescue ang paunti-unting bumabagsak na local hog industry, kaya IMEEsolusyon natin, gawing awtomatik ang Agri Insurance Pay-out sa magsasaka at magbababoy na nakapaloob sa inihain nating Senate Bill 883 o ang “index-based insurance system”.

Nangangahulugan itong hindi na kailangan pa ng anumang disaster declaration o assessment ng insurance company para mailabas ang tulong-pinansiyal sa mga magsasaka at magbababoy.

Nakapaloob din dito ‘yung panawagan natin sa Philippine Crop Insurance Corporation o (PCIC) na paglikha ng “index-based insurance products” para mapalawak ang proteksiyon sa mga hindi inaasahang pangyayari.

Kabilang ang “acts of God” o mga gawa ng Diyos, natural na pangyayari, pati na rin ang mga kagagawan ng mga tao, tulad ng pagnanakaw, riot o gulo, welga o giyera at pagbabawal ng gobyerno na maaaring mauwi sa mga kakapusan ng pagkain.

Kapag bumagsak ang lokal na hog industry, tiyak na food security din natin ang mawawasak, kaya bago pa mahuli ang lahat, gawa na tayo ng paraan. Agree?

Pagbili ng bakuna kontra COVID ng private sector, ‘wag gawing pahirapan

ni Imee Marcos - @Imeesolusyon | April 14, 2021

Ano ba talaga ang problema ng Department of Health? Aba, bumabanat na naman sa mga private sector at pinahirapan bago makabili ng COVID vaccine.

Pinayagan na nga ni Pangulong Rodrigo Duterte ang mga private sector na makabili ng bakuna para makatuwang na ng gobyerno, bakit itong DOH ay may panibagong pahirap na naman sa kanila? May bagong requirement daw! Ano ‘yan, para-paraan lang para mangharang? ‘Kalokah!

Tinutukoy natin, eh, itong bagong requirement o obligasyon ng mga pribadong kumpanya na mag-isyu muna ng Certificate of A4 Eligibility sa ilalim ng National Vaccine Development Plan o NDVP sa pagbili ng bakuna.

Eh, ang bagong patakarang ito ang mag-aalis sa ilang empleyado na mabakunahan kahit pa ang produkto o serbisyo ng kanilang kumpanya ay mahalaga o essential tulad ng pagkain, pharmaceutical at transportasyon. Ano ba ‘yan!

Ang A4, eh, ang mga grupong prayoridad na mabakunahan kasunod ng health workers, senior citizens at mga taong may commorbidities o mga sakit na maaaring magpalubha sa impeksiyon ng COVID-19.

FYI, may 13 subclasses ito para sa A4 na binubuo ng frontline workers mula sa private sector at gobyerno, OFWs na may kaparehong trabaho at bago rito ang mga religious leaders. Santisima!

Juicekoday! Eh, lantarang diskriminasyon lang ang hatid nito, kalituhan at sama ng loob hindi lang sa kumpanya kundi sa LGUs na magbabakuna.

Tanong natin sa DOH, gusto n’yo ba talagang mabuksan ang ekonomiya, magbukas ang mga negosyo ng maayos at mabilis na makarekober?

IMEEsolusyon d’yan, plis lang alisin na ang mga pahirap na requirements sa private sector at maging LGUs, plis lang ‘wag n’yo na rin obligahin ang OFWs na magprisinta ng nasabing certificate bago makakuha ng bakuna. Magtulungan na lang para lahat mabakunahan!