Kuwestiyunableng brownout sa Luzon, binubusisi na!

ni Imee Marcos - @Imeesolusyon | June 14, 2021

Bakit ba kung kaian pa-tag-ulan na, eh, nakararanas pa tayo ng mga brownout? Kamakailan lang, naperwisyo ang sesyon namin sa Senado ng brownout na ‘yan.

Ano pa nga ba ang aasahan, sa halip na maisagawa na ang mga naka-pending na mga diskusyon sa iba’t ibang panukalang-batas, hayun, pumitik ang kuryente at kaming naka-work-from-home super-dilim ang screen, putol ang koneksiyon. Ano ba?!

Bakit ba nangyayari ang rotational brownout sa Luzon, eh, hindi ba sure raw noong Abril ang Department of Energy na hindi tayo magkukulang ng supply sa kuryente? So, ano ang mga brownout na ‘yan? Ano ba talaga?

Manipis umano ang supply ng kuryente sa mga generation plants, kaya may mga brownout! Ano naman ang ginagawa ng NGCP? ‘Di ba, tungkulin niyan na suplayan o punuan ang mga maninipis na reserba ng mga generation plants? Bakit hindi naman ito nasiguro ng DOE?

Ano nga ba ang paliwanang ni Energy Secretary Alfonso Cusi? Balita kasi natin, may inunang ibang bagay sa Cebu na kasabay rin ng mga brownout? Sana lang, unahin natin ang mga prayoridad sa ating trabaho, sir.

Mabuti sana kung iilang tao lang ang apektado. Pati ang mga eskuwelahan o ‘yung mga naka-online classes, at negosyo, naperwisyo ng brownout na ‘yan sa Luzon. Ang latest news, eh, magpapatuloy pa rin ang mga power interruptions hanggang sa katapusan ng Hunyo, Hulyo at Agosto. Kaya naman, medyo duda na kami riyan sa mga brownout na ‘yan. Kailangang maipaliwanag ‘yan!

IMEEsolusyon natin habang maaga, dapat mabusisi na ang problema ng kuryente at maremedyuhan. Mismong sa bibig ng DOE dapat nating malaman. Wika nga, direct from the horse’s mouth. Ipinatatawag natin sila sa Senado, kailangang malaman ang sanhi ng mga rotational brownout lalo na’t nabalitang pati sa ilang isla sa Visayas at sa Mindanao, zero reserve ang kuryente?

Remember, halos lahat ngayong new normal na, eh, gamit natin online. Kung maging madalas ang brownout, paano na?

Digital signatures, kering-keri ihabol sa 2022 elections

ni Imee Marcos - @Imeesolusyon | June 11, 2021

Kani-kanyang paramdam na ang mga tatakbong kandidato sa May 2022. Unti-unti na nilang ikinakasa ang kanilang target bilang paghahanda para sa eleksiyon.

Mabuti pa sila kumakasa na, eh, ang problema ‘yung mga magpapatakbo sa eleksiyon at mismong tauhan o gurong magtatrabaho sa eleksiyon, naihanda na ba nila?

Mismong ang gagamitin na mga panteknolohiyang kagamitan, kailangan pang dagdagan dahil pararamihin pa natin ang mga voting precinct para may social distancing dahil pa rin sa COVID.

Pati ba naman ‘yung mga teacher hindi pa rin naibibigay ang personal digital signatures! Limang taon na ang nakararaan, ano’ng petsa na?

Noon pang 2010 ginagamit ang “machine digital signatures” sa mga eleksiyon, kahit mandato sa Omnibus Election Code na dapat pirmado rin ng mga gurong nagbilang ng mga boto na galing sa mga vote counting machines.

Ipinangako ng DICT ang mga personal digital signatures para sa mga guro noon pang 2016 at 2019 elections, para bantay-sarado sa kababalaghang maaaring gawin ng mga makina ng Smartmatic. Hay naku!

Nagpapatagal pa kasi ang mga hard-copy requirements ng DICT o papeles-papeles sa mga guro para sila’y makarehistro na’t makakuha ng personal digital signatures. Eh, tila panuya o biro pa sa atin na ngayong Hunyo ay National ICT Month! Eh, meron ba tayong dapat na ipagdiwang?

Pero may IMEEsolusyon na ‘yan! I highly recommend na i-execute na ang panukala ng DepEd na gawing online na ang pagsumite ng mga biodata at iba pang mga datos ukol sa mga guro para mabilisan na nilang makuha ang kanilang mga personal digital signatures. Dapat nga ay DICT ang nangunguna sa mga digital na galaw.

Kapag ginawa ‘yan, bultu-bultong pagpoproseso ang makakayanang gawin. Nakasanayan din naman ito ng DepEd sa kanilang 900,000 na teachers at employees. Matatapos natin agad ang rehistrasyon ng personal digital signatures sa Hulyo, na mas maaga pa sa target na iskedyul ng DICT na Setyembre hanggang Enero 2022 pa.

Kaya wish ko, asikasuhin agad na ito ng DICT. Well, wala na naman silang lusot para hindi buuin ang rehistrasyon ng libu-libong guro na bibigyan ng personal digital signature. Sasakto sa panahon para sa national and local elections sa Mayo 2022. So, gora na, now na! Keriing-keri natin ‘yan!

Ipatupad nang maayos ang batas sa mga debriefing at neuropsych testing ng mga pulis!

ni Imee Marcos - @Imeesolusyon | June 07, 2021

Isa na namang police master sergeant ang nasabit sa pamamaril at nakapatay ng isang inosenteng sibilyan. This time, lasing ang suspek na pulis nang sabunutan at close-range niyang paputukan sa leeg ang singkwenta’y dos anyos na lola sa Quezon City. Juicekolord!

Eh, 'di ba nga ang unang police master sergeant na si Joel Nuezca ay nag-viral din sa pagpatay niya sa mag-inang taga-Paniqui, Tarlac noong Disyembre? Bakit ba tila mamera na lang sa iilang mga pulis ang buhay ng tao ngayon?

Napakasaklap! Dahil kung sino pa ang dapat na magbigay-proteksiyon sa atin, sila ang nauunang bantay-salakay sa mga inosenteng sibilyan. Parami nang parami ba ang mga trigger-happy na men in uniform? Huwag naman sanang dumami pa sila.

Hindi natin maiaalis na ang pagpupulis ang isa sa mga pinaka-stressful na uri ng trabaho at nasusubok ang tibay ng katinuan ng kanilang pag-iisip matapos ang alinmang madugo at marahas na operasyon. Pagkatapos nito, eh, mandato naman na sumailalim sila sa tinatawag na stress debriefing at neurological at psychological testing, pero hindi pa rin ito naipatutupad nang maayos!

Take note, naamyendahan naman ng R.A. 8551 ang pagrereporma sa police force, pero ang siste kasi, maluwag pa rin ito sa paggawa ng mga neuropsych tests. Kaya maraming may saltik na pulis ang nakalulusot at nagpapatuloy sa serbisyo.

Hindi gawain ng matinong pulis ang pamamaril ng mga inosenteng sibilyan, at hello, naka-off duty pa si police master sergeant Hensie Zinampan gamit ang kanyang service firearm. Super scary, ano ba 'yan?!

Ayon sa kinauukulan, isolated cases lang daw ang mga ito. Pero ang tanong ko lang, eh, hihintayin pa ba natin na maging karaniwan na lang ang ganitong mga insidente? At kapag nagkasala sila, nagiging untouchable, hindi napapanagot dahil sa padrino at frat system ng kanilang mga superior! Hello! Sir PNP chief Guillermo Eleazar, big challenge ito sa inyo.

Pero, me IMEEsolusyon pa rin 'yan, at ito nga, eh, lagyan ng ngipin ang batas at agad ipatupad ang taunang neuropscyh test ng mga pulis. Para hindi makalusot ang mga "bugok" sa inyong hanay! Pinanukala ito ng inyong lingkod sa Senate Bill 2005.

IMEEsolusyon din na pakisiyasat na rin ang immediate superior ni Zinampan para makita kung saan ang butas o kakulangan nito sa pamamalakad sa kanilang nasasakupan! Dapat automatic ito, ayon sa batas.

Kapag hindi naipatupad nang maayos ang batas sa mga debriefing at neuropsych testing ng mga pulis, inosenteng sibilyan at mga kapwa nila malilinis na pulis ang magbabayad sa kanilang kabalbalan!