Wa’ pakels ang ICC sa sistema ng hustisya ng ‘Pinas!

ni Imee Marcos - @Imeesolusyon | June 25, 2021

Bakit nakikialam ang International Criminal Court (ICC) sa mga internal na issue sa ‘Pinas? Hello? Pinoy ba kayo? Ano’ng meron?

Aba, nakapagtataka na basta na lang bago magretiro last week, mega-push ang dating prosecutor ng ICC na si Fatou Bensouda na imbestigahan si Pangulong Rodrigo Duterte sa umano’y human rights abuses sa war on drugs. Sa kasagsagan pa man din ng pag-aanunsiyo ng ating Pangulo na palalawigin pa ang suspensiyon ng Visiting Forces Agreement (VFA)!

Naku ha, I smell something fishy! FYI, isiniwalat ng Washington-based think tank na American Enterprise Institute for Public Policy Research o AEI na maraming powerful na bansa ang nagbubuhos ng pondo sa ICC habang kapos ito. Hindi malayong may pakinabang na pinayagang magpapuwesto ng “bata” nila para maging hukom d’yan!

Kabilang sa mga bansang nagpondo ang United Kingdom, France, Italy, Spain, Croatia, Mexico, Australia at Japan, at sampol nga ‘yan sa unang nakinabang, eh, ang Japan!

Ang kuwento riyan, noong sumali ang Japan sa mga bansang sumasang-ayon sa proseso ng ICC at magbuhos ng napakalaking pondo noong panahong ‘yun, binigyang-lugar ang kanilang kababayan na si Fumiko Saiga bilang isang hukom kahit wala pa itong karanasang legal?

Sumunod d’yan, noong siya’y mamatay, pinalitan siya nang wala ring karanasan bilang abogado at pagiging hukom na si Kuniko Ozaki, ayon na rin sa librong “Justice Denied: The Reality of the International Criminal Court.”

Ang ganyang pabor sa international politics ay maaaring makaapekto sa atin, partikular ang ating VFA kung saan nakasalalay ang galaw ng mga sundalong Amerikano sa ating bansa. Lumalala pa man din ang sigalot ng U.S. at ang ating kapitbahay na China.

Kayang brasuhin ng U.S. ang maliliit na bansa na umaasa sa depensang-militar nito, na mga miyembro rin ng ICC. Bantayan ang pagpili ng mga hukom, kung uusad man ang kaso ni P-Duterte!

Sinabi rin ng isa pang Washington-based think tank na Center for Strategic and International Studies na puwedeng gamitin ng U.S. ang dalawang klase ng diskarte para madagdagan pa ang presensiya ng mga sundalo at armas nito sa Pilipinas. Ito ay sa pamamagitan ng dagdag-probisyon sa VFA at pagdidiin sa mga isyu ng human rights.

Buking! Interes-military ang isinusulong ng Amerika habang didiinan si P-Duterte. Kitang-kita na kapag natuloy ang ICC probe na ‘yan, obviously na mapupulitika ang ating Pangulo.

Ang IMEEsolusyon d’yan, kailangang palagan ng Pinoy legal community ang ICC at hindi nila dapat payagan ang pang-aagaw eksena sa ating mga abogado, hukom at korte sa ilalim ng ating sariling sistema ng hustisya. Aba, insultong malaki ‘yan ha? Puwede ba ICC, isyung Pinoy ito, wapakels kayo sa hustisya sa aming bansa!

Kinakapos na supply ng hiringgilya, agapan!

ni Imee Marcos - @Imeesolusyon | June 23, 2021

Good news na may 40 million doses ng bakunang Pfizer na paparating sa ating bansa sa mga susunod na buwan. Pero nakababahala naman ang shortage ng mga hiringgilyang pang-iniksiyon sa buong mundo.

Knows n’yo ba na mismong Amerika, kung saan nagmula ang Pfizer vaccine, eh, kapos na sa low dead space o LDS syringe? Harinawa’y hindi ito sapitin ng ating bansa at hindi ito makasagabal sa vaccination program natin.

Lalo na’t 75% ng mga hiringgilya na ginagawa ng pinakamalaking manufacturer sa Pilipinas, eh, ini-export sa North America at heto nga ang domestic supply natin inaasa sa importasyon. Aba, eh, malaking hamon talaga ito sa DOH.

Eh, ang mas marami ngayon ay mga tradisyunal na hiringgilya, pero hindi ‘yun ang mas kailangan natin para makatulong sa pagpapabilis na makamit ang herd immunity, kundi ang LDS syringe na may shortage na nga.

‘Yung LDS syringe kasi ay kayang gawin ang 40 million Pfizer doses sa 48 million, dahil nababawasan ang espasyo o puwang sa pagitan ng syringe plunger at dulo ng karayom, kaya’t nababawasan din na maaksaya ang bakuna.

Alam n’yo bang nakahihigop ang LDS syringe ng pang-anim na dose mula sa vial na pang-limahan lang. Pati sa Moderna vaccine nakahihigop ito ng isa pang dose sa vial na pang-sampuan. ‘Di ba! Kaya ito ang mas akma sa vaccination program ng ating bansa.

Para sa kaalaman ng lahat, noong wala pang pandemya, ginagamit ang LDS syringe sa mga partikular lamang na sakit kaya limitado lang ang produksyon nito kumpara sa tradisyunal na hiringgilya.

Pero dinaragdagan na ng mga manufacturer nito ang paggawa ng LDS syringe, kaya lang kung US nga kinakapos na, aba, eh, kung magkasabay-sabay na ulit na naman ang paglobo ng COVID-19 at magkaroon ng panibagong wave ng mga impeksyon, juicekolord paano na tayo?

IMEEsolusyon sa ganyang sitwasyon, eh, maging maagap na habang hindi pa nangyayari sa atin. Paano? Gawa na tayo ng mga advance order para hindi tayo kapusin at hindi magkaaberya ang ating vaccination program. Bilisan pa ang pagbabakuna sa mas maraming tao at sabayan ng puspusang information campaign laban sa pag-aatubiling pabakuna, para makamit natin ang herd immunity ngayong taon.

‘Ika nga sa motto ng mga girl scout, palaging handa! Reminder, ang pagsisisi palaging nasa huli! Kaya kumilos na!

Pagsisisihan problema sa blackout, ubos oras lang

ni Imee Marcos - @Imeesolusyon | June 18, 2021

Lumuluwag na ang mga community quarantine, isa-isa na ring binabawasan ang mga curfew, at dumarami na ang nababakunahan, kaya inaasahan na ang unti-unting pagbalik ng ating ekonomiya. Pero kung may mga umeeksenang blackout, paano tayo uusad?

Reminder, mangangailangan ng mas malaking supply ng kuryente ang iba’t ibang negosyo, pabrika man o micro, small and medium enterprises dahil hahaba na ang oras ng kanilang operasyon.

Mabuti kung poproblemahin na lang natin kung ano ang puwedeng remedyo. Pero ang kaso, may problema na nga sa blackout, nagsisisihan pa ang National Grid Corporation of the Philippines (NGCP) at Department of Energy (DOE). Ubos oras ‘yan, ano ba?! Kung may problema, dapat IMEEsolusyon ang pagtuunan ng pansin, hindi ang kung sino ang may kasalanan.

Take note, hindi kakayanin ng bumabangon pa lang nating ekonomiya ang “now you see it, now you don’t” na supply ng kuryente. Iwas muna tayo sa mga turuan, okay? Unahin ang trabaho at paghahanap ng solusyon.

Lalo na’t posibleng magtuluy-tuloy ang mga blackout ngayong Hunyo hanggang sa mga susunod na buwan dahil sa mga preventive maintenance ng mga power plant at kawalan ng bagong kontratang magdaragdag sa energy capacity ng bansa.

Dagdag pa ang nakaambang pagkaubos ng power generating capacity sa 2024 ng Malampaya gas field, na supplier ng 30% kuryente sa Luzon. Kundangan kasi itong NGCP, nagtitipid ba kaya hindi kumukontrata ng power reserve, walang makontrata o atubili ang sana’y mga investors sa mga power plant dahil hindi nila inaasahng kokontratahin sila? Ano ba talaga?

Kung may sabwatan naman ang mga industry players kaya may blackout, kahit busisiin ‘yan ng DOE, mahirap patunayan at masupil agad-agad dahil sa umiiral na guidelines, at wala ang agaran maitutulong sa mga pangambang blackout sa ngayon.

Ilan sa IMEEsolusyon na inilatag natin, amyendahan ang Republic Act 10667 o Philippine Competition Law, para mapangasiwaang mabuti ng Energy Regulatory Commission at Philippine Competition Commission ang presyuhan sa Wholesale Electricity Spot Market, bilang proteksiyon sa manipulasyon ng kuryente ng power generation companies.

IMEEsolusyon din na ayusin ang depinisyon sa batas ng mga tinatawag na power reserves o reserbang kuryente, na sa ngayon ay nakatakda lamang sa 40% ng peak demand o pinakamataas na lebel ng paggamit. Dapat nang itaas ito para makaagapay sa tumitinding pangangailangan ng bansa sa enerhiya.

At isa pang IMEEsolusyon, mabilis sanang ipasa ang amyenda sa Foreign Investment Act sa pagbabalik ng sesyon ng Senado sa Hulyo. Magbibigay-daan ito sa pagpasok ng puhunan para sa mga alternatibo sa Malampaya, kabilang ang green energy at nuclear power. Bilisan na ang kilos para makabawi na ang ating ekonomiya! Now na!