‘Flying coffin’ sa mga sundalo, itigil na!

ni Imee Marcos - @Imeesolusyon | July 07, 2021

Nitong nagdaang mga linggo, dalawang aksidente sa chopper ang nangyari, at nito namang weekend, isang C-130s Hercules military cargo plane ang sumunod. Nakalulunos ang kanilang sinapit. Hindi natin maubos-maisip kung paano nangyari ang huling aksidenteng ito, gayung sinigurado naman ng ating awtoridad na walang problema sa eroplano.

Nakalulungkot ang insidenteng ito dahil hindi basta-basta ang mga sakay na mga mahal nating sundalo. Sa 52 na namatay, 49 ang mga sundalo na kasama ang tatlong ekspertong piloto at limang crew, habang tatlo naman ang mga nasawing sibilyan. Ang mga sugatan ay 47 na sundalo at 4 na sibilyan, Ilan sa kanila ay malubha ang kalagayan.

Karamihan sa kanila’y kamakailan lang nagtapos o kaga-graduate lang at pawang army private pa lang. Sila dapat ang kinabukasan ng Armed Forces of the Philippines (AFP).

Mga beterano nang sundalo ang kasama nila sa nasabing flight na buwis-buhay na naasahan sa paghahatid ng mga relief goods, medisina at iba’t ibang pangangailangan ng ating mga kababayang nadadale ng mga sakuna at mga kalamidad.

At nang sila naman ang nangailangan ng ating tulong, nasunog sila doon sa bumagsak na eroplano, hindi natin sila agad masaklolohan na talagang nakadidismaya. Ano ba talaga ang dahilan ng ganyang aksidente? OMG!

Sa ganang akin, IMEEsolusyon d’yan na itigil na ang mga ‘flying coffin’, plis lang. ‘Wag naman nating pasakayin ang mga sundalo sa mga pipitsugin o mga secondhand na aircraft. Baka naman puwedeng brand new na equipment ang bilhin?

Itodo na natin sa magandang klase ang mga kailangan ng ating mga sundalo, buhay nila ang nakataya araw-araw. Deserve nilang makagamit ng primera klase at plis pag-ipunan pa natin para sa mas mga high-end na equipment ang mai-supply sa kanila.

At praktikalidad din bilang konsiyumer, ‘yung mga kapos sa badyet na mamimili, minsanan lang bumili ang mga ‘yan, pero pinipili nila ‘yung mas mahal dahil matagal ang buhay ng mga nasabing gamit.

‘Ika nga, kung bibili na rin lang, ‘yung pangmatagalan ang kalidad at tibay, hindi ‘yung nakamura nga, ilang linggo lang ang gamit, wasak na. Oh, ‘di ba, mas magastos ‘yun, at nasa peligro pa ang buhay kung pipitsugin ang gagamitin!

Super-laking pondo sa BARMM, isapubliko kung saan napunta

ni Imee Marcos - @Imeesolusyon | July 05, 2021

Huling sona na ni Pangulong Rodrigo Duterte ngayong July, pero mukhang napag-iiwanan na ang kaunlaran sa Bangsamoro Autonomous Region in Muslim Mindanao (BARMM). Why, oh, why?

Juicekolord, binuhusan ng malaking pondo ang BARMM, pero bakit tila nangungulelat pa rin ang madlang pipol at kababayan nating Muslim doon pagdating sa improvement ng rehiyon?

Eh, ano na nga ba ang nanyayari? Isa-isahin ulit natin ang laki ng pondong inilaan ng ating gobyerno para sa kaunlaran ng BARMM.

Una, noong General Appropriations Act of 2020, inilaan ang BARMM ng P7 billion, Annual Block Grants (ABG) na nasa P63.6 billion, at Special Development Fund (SDF) na P5 billion. At dagdag pa rito ang 2021 GAA na P8.6 billion, AGB na nasa P71.6 bilyon at P5 bilyon ulit na SDF.

Hindi lang ‘yan, bago pa naging BARMM at Autonomous Region in Muslim Mindanao o ARMM pa lang ‘yan, may pondo pa sila na nasa P32.4 bilyon, adjustment na nasa P7.2 bilyon at total available na appropriations o laang pondo na P39.7 bilyon.

Oh, ‘di ba?! Ang lalaki ng mga pondong ‘yan! Pero ang tanong, kumusta naman ang hitsura ng BARMM, hello! Eh, hindi nga halos umusad ang pag-unlad ng rehiyon. Naku, saan ba at paano ba ginastos ang pondo ng BARMM?

Aba, eh, mag-eeleksiyon na, ilang buwan na lang din magpa-Pasko na. Ano na nga ba ang status ng mga proyektong ginagawa na raw sa BARMM? Eh, wala man lang tayong nababalitaang pag-unlad d’yan. Dapat malaman natin kung saan napunta ang super-laking mga pondo para sa BARMM.

IMEEsolusyon dito, dapat malaman ito at mabusisi ng ating mga kapwa mambabatas, para naman hindi nakapanghihinayang ang napakalalaking pondong inilaan, natutulog lang ang pera. Anyway, para mas maliwanagan tayong lahat, ipabubusisi natin ‘yan.

Oobligahin din nating maipakita sa ating mga mambabatas ang status ng mga proyekto. Dapat i-report mismo sa atin at maiklaro kung paano ginagamit ang pondo at dahilan ng mga pagka-delay ng mga proyekto.

Nakakaawa ang ating mga kababayan sa BARMM na inabot na lang ng pandemya, tila ang pag-unlad din nila, eh, nakatengga. ‘Wag namang ganyan. ‘Wag patulugin ang pondo, gastusin ng maayos at maging transparent kung paano ito ginastos. At plis lang, pabilisin na ang mga proyekto sa BARMM.

Baka naman abutin pa talaga ‘yan ng 2022 Elections, ano ba?! Bago man lang sana matapos ang termino ni Pangulong Duterte, eh, may nangyari nang improvement sa BARMM. Agree?

PhilHealth, ‘wag hintaying magsara ang mga ospital!

ni Imee Marcos - @Imeesolusyon | July 02, 2021

Nasa kalagitnaan na tayo ng taon, hanggang ngayon pa ba naman, PhilHealth pa rin ang ating pinoproblema?

Noong wala pang pandemya, nakaladkad na ang PhilHealth sa pagiging delingkuwente sa perang kontribusyon ng bawat miyembro. At ano’ng petsa na ngayong 2021, ospital naman ang namumroblema sa ahensiya dahil hindi pa sila binabayaran o pautay-utay ang pagbayad sa kanila ng PhilHealth!

Dahil sa dami ng mga kaso ng COVID-19, umaaapaw ang mga pasyente sa mga ospital, kinakapos ang mga kama at kung anu-ano pang hospital equipment. Eh, paano na ngayon ‘yan, may panibago at mas nakahahawang anyo ang COVID-19 na tinatawag na Delta variant?

Ayon sa idinulog sa aming tanggapan, nasa Php26 bilyon pa ang utang ng PhilHealth sa mga pribadong ospital at sa mga government hospital naman, eh, daan-daan pang milyon. Nakadidismaya dahil ang mga perang ‘yan ay hindi magamit kahit pandagdag lamang sa mga kama sa mga ospital, napupurnada pa.

Hindi kasi buo ang ibinabayad ng PhilHealth. Kung naglabas man ito ng P6.3 bilyon at idinaan sa ipinagmamalaking Debit Credit Payment Method o DCPM, hindi naman binayaran ng ahensiya ang paggamot sa mga kaso ng COVID-19 noong nagdaang taon. Ano’ng mangyayari niyan, paano makakalaban ang ating mga ospital sa banta ng Delta variant?

Sampol nga niyan, eh, ‘yung PGH na Php2.56 milyon lang sa kabuuang Php615.7 milyong utang ang binayaran. Sa Philippine Heart Center naman, Php99.47 milyon lang ang bayad at may utang pa silang lampas Php100 milyon, habang sa Lung Center may utang pa silang Php304 milyon.

And take note, reklamo ng mga ospital nakalista sa online Reconciliation Summary Module o RSM na bayad na ang PhilHealth pero hindi pa nadedeposito sa kanilang bank account. Hello, ano ‘yun? Laru-laro lang ang mga numero?

Isa pang reklamo ng mga ospital ay nakasentro lang ang pagbayad ng PhilHealth sa National Capital Region (NCR) Plus bubble ng Metro Manila at karatig-probinsiya. Natatakot naman ang mga ospital na magsalita sa delayed na PhilHealth claims, baka raw kasi buweltahan naman ang kanilang mga ospital. Hay naku!

IMEEsolusyon natin ay dapat magsumite ang PhilHealth ng mas detalyadong report sa status o kalagayan ng mga sinasabing nabayaran na nila, pati ang mga hindi pa bayad, mga ipinadala nilang pera at ang aktuwal na natanggap ng mga ospital.

At plis, IMEEsolusyon naman PhilHealth para makapaghanda ang ating mga ospital sa iba’t ibang mas deadly virus, bayaran n’yo na! Bakit pa ba iniipit ang pondo? Dahil kung hindi n’yo babayaran ang mga ospital, mawawalan sila ng kakayanan na i-accept ang mga COVID-patients kung lolobo at kakalat ang mas mabagsik na Delta variant.

Kapag naubos naman ang pondo ng mga ospital, hindi malayo ang posibilidad na tuluyang silang magsipagsara! Domino-effect niyan, marami ang mamamatay at babagsak ang ekonomiya! Kaya PhilHealth ano na, kilos na! Magbayad na!