Nababastos na kultura ni Whang-Od at ibang IPs, tama na!

ni Imee Marcos - @Imeesolusyon | August 09, 2021

Kamakailan nabalot ng kontrobersiya ang ating world-famous tattooist na si Whang-Od at ang popular na vlogger na si Nas Daily. Inakusahan kasi si Nas Daily ng apo na inii-scam si Whang-Od.

Eh, ‘di ba nga napabalitang merong pinirmahang kontrata si Whang-Od kay Nas Daily para magturo ng “tattoo masterclass” online. Alegasyon ng apo ni Whang-Od na scam si Nas Daily na pinipilit namang nagpo-promote lamang siya ng naglalaho nang tradisyon at may ibabahagi naman sa kung ano’ng makalap sa Php750 na bayad ng bawat tatangkilik sa nasabing kurso.

At sabi pa ng apo ni Whang-Od, wala umanong maayos na consent o pagsang-ayon si Whang-Od sa nasabing kontrata dahil hindi ito buong naintindihan. Pero ang sabi naman ng kampo ni Nas Daily, nilagdaan ng thumbmark ang kontrata. Eh, ano ba talaga?

Malaki ang papel nating lahat bilang Pilipino na protektahan ang ating mga kalahing katutubo sa anumang uri ng pananamantala, o pagkaladkad sa kanila sa anumang kontrobersiya. Reminder hindi basta-basta ang 104-year-old nang Whang-Od, ha? Kinakatawan niya ang buong IPs.

At siyempre, bilang chairman ng Senate Committee on cultural communities, hinding-hindi natin mapapatawad ang anumang uri ng mga pananamantala o pagbalahura sa ating mga ‘national treasure’ na IPs. Take note, hindi ito first time sa ating mga IPs.

May mga dati nang reklamo na nababalewala ang halaga ng mga IPs, hindi lang nakakaladkad ang kanilang minanang kultura, kundi nanakaw pa ang kanilang kostumbre, tradisyong may spiritual value na dapat nating pinakakaingatan, pero tinatrato lang ng mga taga-lunsod na isang bagay at potensiyal na pagkakakitaan. Grabe!

Partikular dito ‘yung inireklamong New Era Cap Co. na gumawa ng koleksiyon ng Whang-Od t-shirts, ‘yung sandalyas ng Tribu Nation na ginamit ang pangalan ng Kankana-ey at dalawa pang ipinangalan rin sa Yakan ng Basilan at sa Manobo ng northern Mindanao, at nabastos din ang T’boli community sa southwestern Mindanao sa paggamit ng kanilang sagradong T’nalak textile para sa isang sapatos.

IMEEsolusyon dito ang pagbuhay sa inihain nating Senate Resolution 517 last year na kailangang imbestigahan ang mga paglapastangan sa ating mga IPs at gumawa ng batas para bigyang-depinisyon ang pagbabalahura sa cultural heritage at mapanagot ang mga guilty!

Need nating protektahan sila at pinakamatibay nga ditong IMEEsolusyon ang pagbigay-permiso na sa communal o pang-komunidad na intellectual property. Sa ngayon, pang-indibidwal lang ang tinatawag na intellectual property rights sa ating batas.

Para silyado ang proteksiyon sa mga IPs, dapat nakalagay din sa bagong batas na lifetime o pang-habambuhay na maaangkin ng mga IPs ang kanilang mga minanang kultura at hindi pansamantala lang. Agree?

Ayuda sa ECQ, i-house to house ; Oras at petsa, ianunsiyo sa socmed

ni Imee Marcos - @Imeesolusyon | August 04, 2021

Ilang araw na lang magsisimula na ang hard lockdown o ECQ sa National Capital Region (NCR) dahil sa banta ng Delta variant. Tulad noon, tiniyak ng ating pamahalaan na may kaakibat itong ayuda sa ating mga kababayan.

‘Ika nga ng Malacañang, walang ECQ kung walang ayuda, at sinigurong gagawan ng paraan na maibigay ang kakailanganing pondo para rito.

Aprubado na ni Pangulong Rodrigo Duterte ang tig-P1-K ayuda kada indibidwal hanggang P4,000 kada pamilyang kabilang sa low-income group. Saklaw nito ang nasa 10.8 million katao sa NCR na 80% ng 13 milyon na populasyon sa Metro Manila.

Pero, sumasagi sa isip natin kapag may ayuda, eh, ‘yung mga nagdaang kapalpakan sa distribusyon nito. Sana ay hindi na maulit, tulad ng pagka-delay, reklamong hindi nakarating ang pera, may mga nabigyan na hindi naman karapat-dapat, etsetera, etsetera na talaga namang nakakaloka!

Eh, ‘di ba nga dahil sa mga ayudang ‘yan, tila nawalan ng kumpiyansa ang ilan nating kababayan sa ilang ahensiya ng pamahalaan? And hoping this time, plis lang, ang mga pagkakamali noon ay ‘wag na sanang uulitin pa. Sa tingin natin, keri ito ng ating mga opisyal.

Kailangan lang ng maayos na paraan sa pamamahagi ng mga LGU ng nasabing mga ayuda sa mahihirap nating mga kababayan.

IMEEsolusyon dito, sa halip na papilahin pa, i-house to house na lang kada-barangay. Sa paraang ito, maiiwasang magkahawahan ng virus.

IMEEsolusyon din na i-post sa Facebook at iba pang socmed platform ang listahan ng mga nabigyan na para sa transparency.

IMEEsolusyon din na maglagay ng isang space kung saan puwedeng magbigay ng comment ang mga pamilyang hindi pa nakatatanggap.

IMEEsolusyon din na ilista daily sa FB ang mga pamilyang hahatiran ng mga ayuda, ano’ng petsa at oras para mapabilis ang pamamahagi at naka-ready na ang bawat pamilya sa kanilang mga gate.

Maging maayos lang ang sistema, makararating nang maayos ang mga ayuda on time na walang hassle, ‘di ba?

Panic buying bago ang ECQ, pigilan; DTI, maglabas ng bagong SRP

ni Imee Marcos - @Imeesolusyon | August 02, 2021

Balik na naman ang ECQ sa NCR mula August 6 hanggang August 20 dahil sa banta ng Delta variant. Nakakatakot!

At isang linggo bago ang ECQ, dagsa na naman ang mga mamimili sa mga grocery o supermarket at mga palengke para mag-stock ng pagkain sa buong panahon ng ECQ.

Kaya heto na naman ang panic buying. Nakapag-aalala ‘yan kasi isang linggo bago ang ECQ tiyak hindi mapipigil ang pagbaha ng tao sa mga pamilihan at mind you, mag-ingat ng todo-todo. Baka makalimutan na naman ang social distancing, eh, baka sa halip na makaiwas tayo sa Delta variant, sa ating pamimili pa tayo dapuan ng virus.

At kapag may panic buying, aba, kahit may pandemya, marami pa ring nakaabang na mga mapagsamantalang negosyante. Hindi na tayo magtataka kung biglang sisipa ng mas mataas ang presyo ng mga bilihin na dagdag-pahirap sa ating mga kababayan ngayong may pandemya.

Pero IMEEsolusyon d’yan, habang maaga-aga pa nananawagan tayo sa DTI. Plis naman, bantayan n’yo ang presyo ng mga bilihin, lalo na't may panic buying.

IMEEsolusyon, eh, agapan na at maglabas ng bagong Suggested Retail Price, para naman ‘yung mga switik na negosyante, hindi makaporma, ‘di ba? Magbabalak pa lang silang manamantala, nasopla agad ng DTI!

IMEEsolusyon din sa ating mga kababayan na kapag mamimili, ‘wag makipagsabayan sa dagsa ng tao, kung puwede, mamili tayo kapag patay na oras para makaiwas sa bulto ng mga naggo-grocery o rami ng tao.

IMEEsolusyon din — bumili tayo sa mga hindi naman kalakihang mga grocery store o supermarket na madalang ang bumibili. Kasi minsan ang bulto ng tao ay nasa malalaki at kilalang mga grocery o supermarket sa mga mall. At saka, puwede na naman mamili online, ‘di ba! ‘Yun na lang iwas na sa crowd, iwas pa sa virus.