Ilocos Sur, niyanig ng magnitude 5.3 na lindol

ni Lolet Abania | June 16, 2022

Niyanig ng magnitude 5.3 na lindol ang Candon City sa Ilocos Sur ngayong Huwebes ng hapon, ayon sa Philippine Institute of Volcanology and Seismology (PHIVOLCS).

Naitala ang lindol ng alas-2:08 ng hapon na tectonic ang pinagmulan at may lalim na 10 kilometro.

Ang epicenter nito ay matatagpuan sa layong 53 kilometro timog-kanluran ng Candon City. Naramdaman ang pagyanig ng Intensity I sa Baguio City at Itogon, Benguet.

Gayundin, naitala ang Instrumental Intensity III sa Vigan City, Ilocos Sur; Intensity II sa Sinait, Ilocos Sur; San Antonio, Zambales; Bolinao at Dagupan City, Pangasinan; at Intensity I sa Infanta, Pangasinan; Pasuquin at Laoag City, Ilocos Norte.

Ayon sa PHIVOLCS, wala namang nai-report na pinsala subalit asahan na ang mga aftershocks matapos ang lindol.

2 mangingisda, palutang-lutang, nasagip sa Ilocos Sur

ni Lolet Abania | March 6, 2022

Dalawang mangingisda ang nasagip ng mga kapwa nila mangingisda, matapos na makitang palutang-lutang sa karagatan sa bahagi ng Barangay Nalvo sa bayan ng Sta. Maria, Ilocos Sur, ngayong Linggo ng umaga.

Namataan ang mga ito ng mga mangingisda rin mula sa nasabing barangay at sila ay tinulungan.

Ayon kay Mariano Servanio Jr., isa sa anim na mangingisda na sumagip sa dalawa, habang sila ay nasa laot natanawan nila na mayroong nagwawagayway ng tila damit sa kanila at humihingi ng tulong.

Agad naman nila itong nilapitan at tumambad sa kanila, ang dalawa na palutang-lutang habang nakagabay sa sirang bangka.

Sa salaysay ng dalawang mangingisda, nanggaling sila sa Bolinao, Pangasinan habang nabangga umano ang kanilang bangka ng isang barko nitong Biyernes.

“Ang kuwento nila, ala-una y media ng madaling-araw, dahil sa pagod sila sa pangingisda, nakatulog sila sa kanilang bangka at nang magising sila ay barko na ang nasa kanilang harapan,” sabi ni Servanio.

Sinabi pa ng mga nailigtas na mangingisda, dalawang gabi silang nagpalutang-lutang habang nakagabay-gabay sa sira nilang bangka.

Agad na dinala sa ospital ang dalawang mangingisda para itsek ang kanilang kondisyon at suriin.

Ipinaalam na rin sa kanilang pamilya ang naganap sa dalawa at sinabing ligtas na ang mga ito.

Carcar City ng Cebu at SanVicente ng Ilocos Sur, idineklarang Heritage Zones ni P-Du30

ni Lolet Abania | January 17, 2022

Idineklara ni Pangulong Rodrigo Duterte ang Carcar City ng Cebu at San Vicente town ng Ilocos Sur bilang Heritage Zones para maprotektahan ang kanilang historical at cultural integrity.

Ito ang nakasaad sa ilalim ng Republic Act 11644 at 11645, na nilagdaan ng Pangulo na naisabatas noong Enero 14, 2022, subalit ibinaba lamang ngayong Lunes, Enero 17.

Nakapaloob dito, “The measure mandates the DOT (Department of Tourism), in coordination with the respective host local government, the NCCA (National Commission for Culture and the Arts) and its affiliated cultural agencies, and the Department of Environment and Natural Resources (DENR) to prioritize a development plan involving the preservation, conservation, restoration, and maintenance of cultural and historical sites and structures for the enhancement and sustainability of tourism in the said areas, provided that the NCCA will only approve methods and materials compliant with international standards of conservation in undertaking conservation and restoration work under relevant laws, including the National Integrated Protected Areas System Act.”

Isasama sa Heritage Zones ang mga cultural properties na idineklara bilang National Cultural Treasures and Important Cultural Properties, gayundin, ang mga National Historic Landmarks, Shrines, Monuments, at Sites, at gaya ng iba pang tinatawag na immovable, movable o intangible cultural properties, ito man ay pampubliko o pribadong pag-aari, na maaaring itinalagang isama rito ng NCCA at ng kanilang affiliated cultural agencies, sa koordinasyon ng naturang lokal na pamahalaan.

Samantala, itinalaga ni Pangulong Duterte si Oscar Casaysay bilang National Commission for Culture and the Arts (NCCA) executive director.

“We wish Executive Director Casaysay all the best in his new undertaking as he leads NCCA in the preservation, development, and promotion of Philippine arts and culture,” ani acting presidential spokesperson Karlo Nograles sa isang statement.

Si Casaysay ay naglingkod sa Davao City government noong mayor pa si Pangulong Duterte.