Dagdag-pasahero sa mga private shuttle services, aprub

ni Ronalyn Seminiano Reonico | November 27, 2020

Inaprubahan ng Inter-Agency Task Force (IATF) ang pagdagdag sa bilang ng mga pasahero sa commissioned shuttle services para sa mga empleyado ng ilang opisina at establisimyento.

Ayon kay Presidential Spokesperson Harry Roque, puwede na ang one-seat apart arrangement o ang full seating capacity ng mga empleyado ng ilang opisina sa shuttle services ngunit nilinaw niyang kailangang maglagay pa rin ng mga dividers at sumunod sa health and safety measures katulad ng pagsusuot ng face mask at face shield.

Saad ng IATF, “Private establishments are enjoined to commission their own shuttle services for the benefit of their own employees.”

Foreign Service Officer Exams, BSP survey, puwede na!

ni Lolet Abania | November 20, 2020

Pinayagan na ng Inter-Agency Task Force for the Management of Emerging Infectious Diseases (IATF) ang pagsasagawa ng onsite 2020 Foreign Service Officer Examinations sa susunod na buwan.

Gayunman, magpapatupad pa rin ng minimum public health standards at pagkakaroon lamang ng 30 porsiyentong seating capacity sa nakalaang examination venue.

Itinakda ang nasabing exams mula December 15 hanggang 17.

Inaprubahan din ng IATF sa buong bansa ang pagsasagawa ng isang Consumer Payments Survey ng Bangko Sentral ng Pilipinas (BSP) at pagkakaroon onsite ng mga guidelines, written, oral at practical specialty, at subspecialty examinations na inisyu ng Philippine Medical Association (PMA).

Voter registration, pinauurong sa Enero, 2021

ni Lolet Abania | September 2, 2020

Inoobserbahan ng technical working group (TWG) ng Inter-Agency Task Force for the Management of Emerging Infectious Diseases (IATF) ang sitwasyon sa mga voter registration sites matapos na imungkahi na ipagpaliban muna ito dahil sa banta ng COVID-19, ayon kay IATF Vice-Chairperson at Dept. of Interior and Local Government Secretary Eduardo Año.

Ayon kay Año, magbibigay ang TWG ng rekomendasyon sa IATF base sa kanilang naging obserbasyon.

"Bukas, sa magaganap na meeting ng IATF ay magre-report ‘yung technical working group kung ano 'yung findings nila, kung ano ‘yung observation nila,” sabi ni Año.

Sa pagbubukas ng voter registration kahapon, Miyerkules, ayon kay Presidential Spokesperson Harry Roque, nais ng Metro Manila mayors na ang aktibidad na ito ay iurong at gawin sa January 2021.

Gayunman, sabi ni Año, hihingin pa rin ng IATF na aprubahan ng Commission on Elections (Comelec) ang naturang kahilingan.

"Ang Comelec ay isang constitutional body. Meron silang sariling calendar, schedule. Pero inire-request ng mga mayors kung pupuwede… para maiwasan ‘yung mga mass gathering sa ngayon,” sabi ni Año.

“Titingnan natin kung ano 'yung magiging sagot ng Comelec, kung pupuwede sanang i-postpone muna to January kung hindi naman madi-derail ‘yung kanilang schedule,” dagdag niya.

Gayundin, sabi ni Comelec Spokesperson James Jimenez, nakatakdang mag-usap ngayong araw ang mga kawani ng ahensiya para talakayin ang hiling ng mga alkalde.

Ayon pa kay Año, layon din ng mga Metro Manila mayors na patuloy na mabawasan ang kaso ng tinatamaan ng COVID-19 at makapag-focus sa implementasyon at paglaban sa virus.

Samantala, nagkaroon ng voter registration noong January 20 subali't sinuspinde ito noong March 9 hanggang March 31 dahil sa banta ng COVID-19. Pinalawig din ng Comelec ang suspensiyon ng voter registration nang maraming beses dahil sa quarantine restrictions.

Muling nagpatuloy ang registration kahapon (Sept. 1), subali't nagbigay ito sa iba ng kalituhan. Magtatapos ang voter registration sa September 30, 2021, bilang paghahanda sa May, 2022 elections.