Sinehan, parke, video arcades, bubuksan na

ni Ronalyn Seminiano Reonico | February 12, 2021

Inaprubahan na ng Inter-Agency Task Force on Emerging Infectious Diseases (IATF) na taasan sa 50% mula sa 30% capacity ang mga religious gatherings sa mga lugar na nasa ilalim ng general community quarantine (GCQ).

Pahayag ni Presidential Spokesperson Harry Roque, “Starting February 15, pinapayagan na po ang religious gatherings up to 50% of the seating or venue capacity.”

Ayon din kay Roque, sa mga GCQ areas ay maaari na rin umanong magbalik-operasyon ang mga sumusunod:

• Driving schools

• Traditional cinemas

• Video at interactive-game arcades

• Libraries, archives, museums, cultural centers

• Meetings, incentives, conferences at exhibitions

• Limited social events sa mga credited establishments ng Department of Tourism

• Limited tourist attractions katulad ng mga parke, natural sites at historical landmarks

Saad ni Roque, “These businesses/industries shall comply with the strict observance of minimum public health standards set by the Department of Health."

Aniya pa, "Alinsunod ito sa katotohanan na kailangan nating magbukas pa ng ekonomiya dahil kinakailangang magkaroon ng karagdagang hanapbuhay ang ating mga kababayan.

"Iyong mga nabuksan nating industriya, marami pong nagtatrabaho r'yan na matagal nang walang hanapbuhay. Ngayon po magkakahanapbuhay na silang muli."

Bukod sa Metro Manila, ang Cordillera Administrative Region (CAR), Batangas, Tacloban City, Davao City, Davao del Norte, Lanao del Sur at Iligan City ay isinailalim din sa GCQ ngayong buwan ng Pebrero.

Solo sa sasakyan, oks nang walang mask

ni Lolet Abania | February 3, 2021

Nilinaw ng Land Transportation Office (LTO) na hindi nila huhulihin o pagmumultahin ang mga pasaherong nakasakay sa isang sasakyan nang walang suot na face mask, magkasama man o hindi sa bahay.

Bagama’t, ayon kay LTO chief, Transportation Assistant Secretary Edgar Galvante, pinag-aaralan na ng Inter-Agency Task Force on COVID-19 (IATF) at Department of Health (DOH) ang nasabing polisiya.

“Pero pansamantala po kung kayo ay masisita hindi naman pagmumultahin agad o whatever. Ipaliliwanag lang ang kahalagahan ng pag-observe ng protocol,” ani Galvante.

Matatandaang sa isang radio interview kahapon, binanggit ni LTO Director Clarence Guinto na ang mga pasahero na nasa loob ng pribado o pampublikong sasakyan ay kinakailangang magsuot ng face mask upang maprotektahan ang sarili laban sa COVID-19.

Ayon kay Guinto, ang mga lalabag na may-ari ng mga private vehicles ay papatawan ng P2,000 multa habang sa mga public vehicle violators ay P5,000.

Samantala, ipinahayag ni Cabinet Secretary Karlo Nograles na ang mga drivers na nag-iisa sa kanilang sasakyan ay hindi na kailangan pang magsuot ng mask habang nagmamaneho.

Ayon kay Nograles, co-chairperson ng IATF, naglabas na ng advisory ang DOH patungkol dito at sinasabing, “those driving alone may remove their masks while inside their vehicle." "I think that is only logical; if there is no one in the vehicle with you, you cannot infect anyone else,” ani Nograles.

Metro Manila, game na game na sa COVID vaccine sa Pebrero

ni Lolet Abania | January 27, 2021

Naglabas ng pahayag ang Metropolitan Manila Development Authority (MMDA) ngayong Miyerkules na ang lahat ng alkalde sa 17 local government units (LGUs) sa National Capital Region ay handang-handa na para sa isasagawang COVID-19 vaccination rollout.

Sa isang statement ni MMDA General Manager Jojo Garcia, nakipagpulong na ang lahat ng mayors online sa Inter-Agency Task Force on Emerging Infectious Diseases (IATF) kagabi.

Ayon kay Garcia, tinalakay ng mga alkalde at ni IATF chief implementer at vaccine czar Secretary Carlito Galvez, Jr., ang mga plano sa gagawing vaccination habang nalalapit na ang pagdating ng unang batch ng COVID-19 vaccines.

"Secretary Galvez assured that the initial batch of COVID-19 vaccines will arrive before the end of February. I think they can finalize it in the next few days,” sabi ni Garcia.

Sinabi naman ni Galvez na mahigit sa 1 milyong doses ng COVID-19 vaccines ang inaasahang maide-deliver sa bansa para sa pagsisimula ng vaccination rollout sa Pebrero.

Ang mga COVID-19 vaccines na gagamitin ay galing sa AstraZeneca, Pfizer, at Sinovac.

Ayon pa kay Garcia, nakatuon din ang vaccination program sa mga business districts sa mga rehiyon at iba pang lungsod gaya ng Cebu at Davao para maiangat ang ekonomiya ng mga naturang lugar.

Kasabay nito, sinabi ni Garcia na ang National Task Force against COVID-19 ay bibisita sa mga LGUs sa Metro Manila upang alamin ang ginagawang preparasyon at plano ng mga ito para sa vaccination rollout.

“We all know that these vaccines are sensitive and will require proper handling and storage,” sabi ni Garcia.

Ngayong araw, binisita ng mga opisyal ng gobyerno na itinalaga sa COVID-19 response ang Taguig City para inspeksiyunin ang proseso ng kanilang vaccination habang pinuntahan nila kahapon ang Pasig City.