891 empleyado ng SPMC sa Davao, may COVID

ni Lolet Abania | January 29, 2022

Halos 900 empleyado ng Southern Philippines Medical Center (SPMC) sa Davao, ang nagpositibo sa test sa COVID-19 ngayong buwan.

Ito ang kinumpirma ng medical chief ng SPMC na si Dr. Ricardo Audan na karamihan sa 891 empleyado na tinamaan ng virus ay sumailalim sa home isolation, habang 30 lamang ang na-admit sa healthcare facility. “I think it’s the work of Omicron.

Ang mabuti lang dito, ’yung lahat ng nag-positive, fully vaccinated. And I think, karamihan din, naka-booster na,” sabi ni Audan sa isang interview. Sinabi ni Audan na dahil sa kakulangan ng mga staff ng ospital, binawasan ng SPMC ang quarantine period ng mga infected na empleyado na mula sa 7 araw ay ginawang 5 araw na lamang.

“Bale sinunod din namin ’yung guidelines ng IATF na 7 days fully vaccinated, ginawa na naming 5 days (ang quarantine) kasi talagang medyo ma-paralyze ang operation. But then, hindi kami nag-close, patuloy pa rin ‘yung serbisyo namin sa mga tao,” sabi ni Audan.

Gayundin, humingi na ang pamunuan ng ospital ng karagdagang personnel mula sa Department of Health (DOH), subalit ani Audan, ang ahensiya ay wala ring sapat na staff para ibigay sa kanila.

Ayon kay Audan, sumulat na rin ang ospital kay National Task Force Against COVID-19 chief implementer Carlito Galvez Jr., hinggil sa request nila na mga health workers na mula sa Armed Forces of the Philippines (AFP) at sa Bureau of Fire Protection (BFP).

Una nang natugunan ng mga naturang ahensiya ang kakulangan ng staff sa SPMC nang maitala ang unang surge ng COVID-19 sa Davao Region noong nakaraang taon. Subalit, bumalik din ang mga personnel na ito matapos na lumuwag ang sitwasyon sa lugar.

Samantala, parehong ang ICU at ward bed utilization rates sa SPMC ay umabot na sa 100 percent, kung saan ang lahat ng kanilang 87 ICU beds at 473 ward beds ay okupado na.

“Wala kaming problema mag-expand. In fact, mayroon kaming waiting na another 60 beds for expansion. The problem is ’yung staffing talaga,” sabi pa ni Audan.

Ang SPMC, isa sa pinakamalalaking mga ospital sa bansa, ay pangunahing ginagamot ang mga moderate hanggang critical COVID-19 cases dahil na rin ito sa pagdami ng mga pasyenteng tinatamaan ng coronavirus.

Gayundin, pansamantalang isinara ng ospital ang kanilang outpatient department na face-to-face services, habang pinayuhan ang mga pasyenteng mag-virtual consultation na lamang sa ngayon.

`Di malalang COVID-19, bawal sa malaking ospital

ni Mary Gutierrez Almirañez | March 22, 2021

Nananawagan ang Philippine Hospitals Association (PHA) sa mga pasyenteng may mild symptoms ng COVID-19 na pumunta na lamang sa maliliit na ospital upang maiwasan ang ‘overloaded capability’ ng malalaking ospital, ayon sa panayam kay PHA Head Dr. Jaime Almora ngayong umaga, Marso 22.

Aniya, "Nananawagan tayo sa mga pasyente na may mild symptoms na sa maliit na ospital na kayo pumunta kasi overloaded na 'yung capability, it's not actually the capacity but the capability ng malalaking ospital.

Ordinarily, itong malalaking ospital na ito, nakakapag-expand naman 'yan kaso sa sitwasyon na ito, kulang sila sa manpower. So, hindi sila makapag-expand ng kanilang capacity."

Iginiit din niya na hindi timeout ang solusyon, kundi reinforcement, partikular na sa mga nurse sapagkat pagod na sila dahil sa dami ng pasyenteng naka-confine sa ospital.

Paliwanag niya, "We are requesting na reinforcement sana manggaling sa agencies na health-related po. Ironically, ang reinforcement na kailangan ngayon ng health services ay manggagaling sa military at sa police, kasi sila na ang pinakamalaking employer ng mga nurses."

Dagdag pa niya, “'Yung benefits sa health workers, wala pa ring natatanggap. Pahirapan po 'yan. Kahit na mag-positive ka, ang dami nilang hinihingi to the point na ayaw mo na lang mag-claim… Sa tagal, hindi pa rin natin na-perfect 'yung tamang proseso.

'Yung contact tracing, ‘di pa rin malawak. 'Yung mass testing sa posibleng pasyente, hindi pa rin accessible sa ordinaryong tao. Wala tayong karagdagang quarantine facilities.” Sa ngayon ay nanganganib nang mapuno ang mga ospital sa Metro Manila.

Nauna nang sinabi ng Philippine General Hospital (PGH) at St. Luke's Medical Center (SLMC) na hindi na sila tatanggap ng pasyenteng may severe case ng COVID-19 sapagkat anila, naabot na ng ospital ang kanilang buong kakayahan.

Kaugnay nito, nagbabala naman ang OCTA Research Group na posibleng mapuno ang mga ospital sa unang linggo ng Abril dulot ng patuloy na pagtaas ng reproduction rate ng virus sa National Capital Region.