Global artist na si Sean 'Diddy' Combs, kinasuhan ng pang-aabuso ng 120 katao

ni Eli San Miguel @Entertainment | Oct. 2, 2024

Nahaharap ngayon sa kasong sexual misconduct ang global artist na si Sean “Diddy” Combs, isa sa pinakasikat na music executives, producers, at hip-hop performers, matapos sampahan ng 120 katao na diumano'y biktima niya.

Inihayag ng abogadong si Tony Buzbee ngayong Martes na siya ay kumakatawan sa 120 katao na nag-aakusa ng sexual misconduct laban kay Combs. Inaasahan ni Buzbee na ihahain ang mga demanda sa loob ng susunod na buwan.

Iniulat ni Buzbee na binubuo ang mga biktima ng 60 lalaki at 60 babae, kung saan 25 ang mga menor de edad nang maganap ang naturang misconduct. Isang biktima ang nagbunyag na siya ay inabuso sa edad na 9.

Ang mga paratang ay sumasaklaw mula 1991 hanggang sa kasalukuyan. “This type of sexual assault, sexual abuse, sexual exploitation should never happen in the United States or anywhere else. This should have never been allowed to go on for so long. This conduct has created a mass of individuals who are injured, scared and scarred,” ani Buzbee sa isang news conference.

Matapos ilabas ang mga akusasyon sa Texas, sinabi ng abogado ni Sean “Diddy” Combs na si Erica Wolff na, "[Combs] cannot address every meritless allegation in what has become a reckless media circus.

“That said, Mr. Combs emphatically and categorically denies as false and defamatory any claim that he sexually abused anyone, including minors,” pahayag ni Wolff. “He looks forward to proving his innocence and vindicating himself in court, where the truth will be established based on evidence, not speculation,” dagdag pa niya.

Sinabi ni Buzbee na higit sa 3,280 indibidwal ang nakipag-ugnayan sa kanyang firm na nagsasabing naging biktima sila ni Sean “Diddy” Combs. Matapos suriin ang mga alegasyon, pinili ng kanyang firm na kumatawan sa 120 tao, habang ang ibang mga kaso ay patuloy pang sinusuri.

Ayon pa kay Buzbee, naganap ang karamihan sa nasabing pang-aabuso sa mga party sa New York, California at Florida, kung saan ang mga indibidwal ay binigyan ng mga inuming may halong droga.

Si Sean “Diddy” Combs, 54, ay nasa kustodiya ng Metropolitan Detention Center sa Brooklyn mula nang mag-plead ng 'not guilty' noong Setyembre 17 sa mga paratang ng paggamit ng kanyang kapangyarihan at kasikatan upang hikayatin ang mga babaeng biktima na makilahok sa mga 'drugged sexual performance' kasama ang mga lalaking sex workers sa mga kaganapang tinawag na “Freak Offs.”

Rebel Wilson, ikinasal sa partner na si Ramona Agruma sa Italy

ni Angela Fernando @Entertainment News | Sep. 29, 2024

Iniulat ng mga United States media na ikinasal na ang kilalang "Pitch Perfect" star na si Rebel Wilson sa kanyang partner na si Ramona Agruma sa Sardinia, Italy.

Ayon sa People.com, binanggit ng kanilang source na nagpakasal sina Rebel at Ramona sa nasabing lugar dahil dito sila nagbakasyon nu'ng una nilang isinapubliko ang kanilang relasyon.

Nilinaw din ng source ng US magazine na ang kasal ay maliit at pribadong seremonya lang kung saan tanging pamilya at malalapit na kaibigan ng dalawa ang dumalo. Matatandaang kinumpirma nina Rebel at Ramona ang kanilang relasyon nu'ng Hunyo 2022.

Selena Gomez, pinalagan ang mga bashers na nagsasabing nagpapaawa siya

ni Angela Fernando @Entertainment News | Sep. 21, 2024

May matapang na tugon ang international singer na si Selena Gomez sa mga bumabatikos sa kanya dahil sa pagkukwento niya patungkol sa mga sakit niyang bipolar disorder at ang kawalan niya ng kakayahang magdalang-tao.

Dumalo kamakailan si Selena sa isang Women in Film event sa California kung saan nagbigay siya ng pahayag tungkol sa lakas ng pagiging tapat at bukas sa sarili.

Binahagi rin niya kung paano niya hinaharap ang pagiging totoo sa gitna ng mga hamon sa industriya. Ayon kay Gomez, hindi siya 'biktima' kahit pa ibinabahagi niya ang kanyang personal na mga pinagdaraanan at mga sakit na dinadala.

Matatandaang matapos na ibahagi ng singer ang ilan sa kanyang mga sakit, may mga bashers na nagsasabing ginagamit niya lang ito upang magpaawa sa madlang pipol.

"I truly believe that there is power in being vulnerable and telling people when you need help or when you want help — that is not shameful. [...] So yeah, I shared that I can't carry a child. Yeah, I shared that I have bipolar… f**k off," saad ni Selena sa isang viral video mula sa nasabing event.

Binigyang-diin din ng singer ang kanyang kagustuhang maging advocate para sa mga kababaihan at i-empower ang mga ito na inulan ng suporta mula sa marami niyang tagahanga.