Pasok sa Guinness... 3 lalaki, kayang bumuhat ng tao, humila ng kotse at tren, gamit ang balbas

ni Mabel G. Vieron @Gulat Ka 'No?! | September 13, 2023

Kilalanin natin ang tatlong lalaki na kinilala ng Guinness World Record bilang “World’s Strongest Beards” na kayang bumuhat ng tao at humila ng kotse at tren.

Maaaring hindi kapani-paniwala para sa iba ang ganitong kwento, dahil biruin mo ba naman kasi hindi nila kinakailangan gumamit ng kamay o magpatulong sa ibang tao.

Noong taong 2012, si Kapil Gehlot, 24-anyos, ay humila ng kotse na may bigat na 2,205 kg (4,861.193 lbs). Ang kanyang hindi kapani-paniwalang tagumpay ay pinanood ng taumbayan sa Jodhpur, Rajasthan, India. Makikita sa isang video clip na ibinahagi ng Guinness, gumamit lang sila ng isang metal plate na mayroong mga bolts at inilagay sa balbas ni Gehlot at matapos nu’n ay buong lakas niya itong hinila na may haba ng 68 meters.

Bago ‘yun, noong taong 2001, si Ismael Rivas Falcon ay nagpakitang gilas din sa paghila ng pinakamabigat na tren sa isang set ng El Show de los Récords sa Madrid. Maniwala man kayo o hindi, kinayang hilain ni Falcon ang isang tren na may bigat na 2,753.1kg (6,069 lb) at may layong 10 meters, para mas maging challenging, pinuno pa ito ng mga pasahero. May isang lalaki rin na kaya namang bumuhat ng tao gamit din ang balbas.

Ang tinutukoy naman natin ngayon ay walang iba kundi si Antanas Kontrimas. Kinaya niya lang namang bumuhat ng isang tao na may timbang na 63.80 kg (140 lb 10 oz).

Nagawa pang magpapiktyur ni Kontrimas habang nakalambitin ang isang babae mula sa mga strap na nakalagay sa kanyang balbas habang nakataas ang kanyang mga braso.

Grabe, di ba?!! 'Ika nga nila, balbas lang sakalam.

Buhay at gumagalaw pa... Bulate na may 3-pulgada ang haba, nakita sa utak ng tao

ni Jenny Rose Albason @Gulat Ka 'No?! | September 10, 2023

Bulate sa tiyan, oo, pero sa utak at buhay pa, talaga ba?!!

Nagulat ang mga doktor sa Australia sa natuklasang buhay na bulate sa utak ng isang babaeng pasyente.

Simula taong 2021, ginagamot na ng mga doktor ang 64-anyos na babae gamit ang steroid at iba pang gamot para sa pneumonia, pananakit ng tiyan, pagtatae, tuyong ubo, lagnat at pagpapawis tuwing gabi.

Pagsapit ng 2022, nagpakita rin siya ng mga sintomas ng depresyon at pagiging makakalimutin, kaya nagsagawa ang mga doktor ng isang MRI scan sa kanyang utak, at may nakitang abnormalities na naging dahilan upang magrekomenda ang mga doktor ng operasyon.

Hanggang sa madiskubre ng surgical team ang 3-pulgada at mapulang bulate o Ophidascaris robertsi na karaniwang makikita sa ahas, at hindi sa tao. Posible umanong ito ang unang pagkakataon.

Ang partikular na roundworm na ito ay matatagpuan sa mga carpet python, isang malaking species ng constrictor na endemic sa Australia, Indonesia at Papua New Guinea.

Hindi pa matiyak ng mga doktor kung paano nakapasok ang bulate ng ahas sa katawan ng babae. Wala umano siyang direct contact sa mga ahas, bagama't naninirahan siya malapit sa isang lawa kung saan maraming ahas.

Ayon sa mga eksperto, posibleng ang mga itlog ng bulate ay nasa ilang halaman na nakakain o kilala bilang New Zealand spinach na kinokolekta ng babae para sa pagluluto.

Dahil wala pang taong na-diagnose na may ganitong parasitic infection, kinailangan ng mga doktor na i-adjust ang gamutan ng pasyente sa loob ng ilang buwan upang gamutin ang kanyang mga sintomas.

Ang kauna-unahang impeksyon na ito ay nagpapakita kung paano ang mga sakit na dating matatagpuan lamang sa mga hayop ay mabilis na lumilipat sa mga tao.

PhilHealth kinilala sa pagpapalawig ng benepisyo sa dialysis

by Info @Brand Zone | September 11, 2023

Kinilala kamakailan ng Cebu Provincial Board ang PhilHealth dahil sa pagpapalawak ng

benepisyo nito para sa dialysis sa 156 mula dating 90 sessions kada taon.

Alinsunod sa Provincial Board Resolution No. 1759-2023, nagpasalamat sila sa PhilHealth sa pagpapalabas ng Circular No. 2023-0009 nito na nagbibigay sa mga pasyenteng may Chronic Kidney Disease 5 ng benepisyo hanggang 156 hemodialysis sessions kada taon.

Ayon sa PhilHealth, kasamang makagagamit ng naturang benepisyo ang kani-kanilang qualified dependents na dapat ay nakarehistro rin sa PhilHealth dialysis database at ang pagda-dialysis ay rekomendado ng lisensiyadong nephrologist.

Dapat ding accredited Ng PhilHealth ang dialysis center na kanilang pupuntahan.

Nagpasalamat naman si PhilHealth President Emmanuel R. Ledesma Jr. sa Cebu Provincial Board sa panguguna ni Vice Governor Hilario Davide III sa pagkilalang ito.

Ayon kay Ledesma, ipagpapatuloy ng PhilHealth ang pagbibigay ng sapat na financial risk protection sa mga miyembro sa pamamagitan ng pagpapabuti at paglulunsad ng mga bagong benepisyo.

Hinikayat din ni Ledesma ang mga miyembrong mayroong sakit sa bato na ikonsidera muna ang kidney transplantation o peritoneal dialysis bago ang hemodialysis ayon na rin sa rekomendasyon ng mga eksperto.

Ang Kidney Transplantation ay binabayaran ng PhilHealth ng P600,000 samantalang

P270,000 naman kada taon ang suporta nito sa peritoneal dialysis sa ilalim ng Z Benefits

packages nito.