DOH: 500K healthcare workers, nakatanggap na ng SRAs

ni Lolet Abania | January 18, 2022

Halos kalahating milyong healthcare workers ang nakatanggap na ng kanilang special risk allowances (SRA) sa gitna ng pandemya, ayon sa Department of Health (DOH) ngayong Martes.

“For SRA ho, for December 20 (2020) to June 30, 2021, we were able to provide 496,314 healthcare workers amounting to around P8 billion po,” ani DOH Assistant Secretary Maylene Beltran sa isang congressional hearing.

Ang data, ayon kay Beltran ay hanggang nitong Enero 14, 2022.

Sa kanyang presentasyon, sinabi ni Beltran na ang DOH ay may karagdagang hiling na mahigit sa P3 bilyon halaga para maibigay ang mga SRAs ng 184,799 pang healthcare workers.

Sa usapin naman ng actual hazard duty pay, binanggit ni Beltran na may kabuuang 390,662 healthcare workers ang nakatanggap nito. Ang halagang nailabas para sa Active Duty Hazard Pay (AHDP) ay may kabuuang P6,555,957,185 hanggang nitong Enero 17.

Matatandaang noong nakaraang linggo, ang DOH ay nakipagpulong sa Department of Finance (DoF) at Department Budget and Management (DBM) upang talakayin ang pondo para sa SRA ng mga healthcare workers para sa taong 2022.

Una nang sinabi ni DOH Secretary Francisco Duque III na para sa taong 2022, hinihingi ng ahensiya ang tinatayang P50 bilyon para pondohan ang SRAs ng mga healthcare workers.

DOH: MAT allowance ng 426K health workers, matatanggap na

ni Lolet Abania | December 10, 2021

Nasa tinatayang 426,000 health workers ang hindi pa nakatatanggap ng kanilang meals, accommodation and transportation (MAT) allowance sa gitna ng COVID-19 pandemic, ayon sa Department of Health (DOH).

Gayunman, ayon kay DOH Undersecretary Leopoldo Vega, ang MAT benefits para sa health workers ay popondohan na mula sa Office of the President ng P1.5 million contingency fund.

“Ito po hinahabol namin ngayon. Nakikipag-usap kami sa Office of the President tungkol sa P1.5 million contingent fund na hinihingi namin na ma-repurpose. Pumayag po si President [Rodrigo Duterte],” ani Vega sa Laging Handa briefing ngayong Biyernes.

“Anytime next week, ipapamahagi na namin ang makukuha namin from the Office of the President para sa 426,000 health workers na hindi pa nakakakuha ng MAT allowance,” sabi pa ni Vega.

Matatandaang noong Nobyembre 26, sinabi ni St. Luke’s Medical Center Employees Union Benjie Foscablo sa mga senador sa budget hearing para sa panukalang 2022 budget, na hindi pa nila natanggap ang MAT benefits na inilaan ng Bayanihan laws sa loob ng huling limang buwan.

Binanggit naman ni Melbert Reyes ng Philippine Nurses Association sa pareho ring hearing na ilan sa mga nurses ay nakatanggap lamang ng P900 benepisyo, simula pa lang ng pandemya noong Marso 2020.

Sa isang statement na inisyu noong Nobyembre 28, ayon sa DOH ang mga health workers na hindi pa nakatatanggap ng kanilang benepisyo na nakalaan para sa kanila ay dapat na mag-file ng isang written complaint sa DOH-Complaints Handling Unit sa dohpau.chu@gmail.com, kasama ang pangalan ng partikular na health facility, ang insidente at supporting evidences para ang kanilang reklamo ay agad na matugunan ng ahensiya.

Payo ng eksperto... Homologous booster vaxx sa mga buntis na health worker

ni Lolet Abania | November 17, 2021

Ipinayo ng isang infectious disease expert na dapat piliin ng mga buntis na healthcare workers na magpabakuna ng isang homologous booster laban sa COVID-19 para mabawasan ang posibilidad na idudulot ng adverse reaction.

Ang homologous booster dose ay pagbabakuna sa isang indibidwal ng parehong vaccine brand na ginamit sa unang mga seryeng natanggap nito habang ang heterologous booster dose naman ay pagbabakuna sa isang indibidwal na ang gamit ay ibang vaccine brand kumpara sa unang natanggap nito.

Sa ginanap na DOH Town Hall briefing ngayong Miyerkules, sinabi ni Dr. Anna Ong-Lim na kahit na wala siyang nakikitang problema sa pagtanggap ng mga buntis ng booster shots, ipinapayo niyang piliin na lamang ng mga ito ang isang homologous vaccination.

“Coming from the perspective na ang prino-protect natin dito is occupational risk and considering na inactivated vaccines naman itong pinag-uusapan natin, I would not expect any issues with pregnant women receiving a boost,” ani Ong-Lim, chief ng Infectious and Tropical Disease Section ng Department of Health (DOH).

“On a personal note, I would probably advise homologous rather than a heterologous platform just to decrease the variables and decrease the likelihood of any adverse reactions,” dagdag ni Ong-Lim.

Pinayuhan din ni Ong-Lim ang publiko na patuloy na sumunod sa mga guidelines at iwasan ang tumanggap ng boosters sa loob ng anim na buwan matapos na makumpleto ang kanilang unang dalawang doses ng COVID-19 vaccine.

“Ang basis kasi ng booster is really naka-base siya sa understanding ng anti-body responses. And there is such a thing as optimizing these responses, and from what we know right now, the data supports boosting on the six months onwards,” paliwanag ng opisyal.

“Siguro dahil the state of knowledge that we have for these vaccines is so recent, let’s try to stay within the guidelines para hindi rin tayo masyadong magkaroon ng unforeseen consequences,” dagdag pa ni Ong-Lim.

Ngayong Miyerkules, sinimulan na ng gobyerno ang pagbabakuna sa mga fully vaccinated healthcare workers ng booster doses. Ayon kay DOH Undersecretary Maria Rosario Vergeire, ang pagbabakuna sa mga senior citizens at immunocompromised individuals ang kanilang isusunod sa booster shot.