DOH: 14 Omicron subvariant BA.2.12.1 cases, natuklasan sa NCR at Palawan

ni Lolet Abania | May 13, 2022

Nasa kabuuang 14 kaso ng Omicron subvariant BA.2.12.1 ang na-detect sa bansa mula sa National Capital Region (NCR) at Palawan, ayon sa Department of Health (DOH).

Sinabi ni DOH Undersecretary Maria Rosario Vergeire, ang dalawang kaso ay na-detect sa NCR habang 12 naman sa Puerto Princesa City, kung saan 11 ay mga dayuhan at isang local case.

“We have detected 14 individuals with BA.2.12.1. Twelve galing sa Puerto Princesa, dalawa galing sa NCR,” pahayag ni Vergeire sa media briefing ngayong Biyernes.

Ayon kay Vergeire, ang dalawang kaso ng Omicron subvariant BA.2.12.1 sa NCR ay nakatanggap na ng kanilang booster shot habang nakaranas ng mild symptoms. Sa ngayon, itinuturing na silang nakarekober matapos na makumpleto ang kanilang home isolation.

Aniya pa, ang naturang dalawang kaso sa NCR ay may kabuuang 39 asymptomatic close contacts na kasalukuyang asymptomatic din.

“Inaalam natin ngayon ang kanilang vaccination status at saka ang kanilang status sa kanilang quarantine,” sabi ni Vergeire.

Matatandaan noong Abril, na-detect ang kauna-unahang kaso sa bansa ng Omicron BA.2.12, mula sa isang babaeng turista na Finnish national, sa Baguio City.

“In totality, itong dalawang ito pareho silang more transmissible than the original Omicron variant at saka pareho silang may possibility ng immune escape based from the experts or the studies that are coming out,” paliwanag ni Vergeire.

Sinabi pa ni Vergeire na parehong ang subvariants ay na-detect sa United Kingdom, United States, at Canada.

2nd booster shots para sa immunocompromised sa Abril 25 na – DOH

ni Lolet Abania | April 22, 2022

Nakatakda ang pagbabakuna ng second COVID-19 booster para sa immunocompromised na mga indibidwal sa Abril 25 sa buong bansa, ayon sa Department of Health (DOH).

Sa ginanap na media forum ngayong Biyernes, sinabi ni DOH Undersecretary Maria Rosario Vergeire na mga immunocompromised individuals lamang na edad 18 pataas ang papayagan na makatanggap lang ng kanilang second booster shot nang maaga sa tatlong buwan matapos ang kanilang first booster.

“Magtuturok na po tayo ng second booster shots para sa mga 18 years old and above na immunocompromised. Nationwide po ang ating rollout na nakadepende sa kahandaan ng kani-kanilang lokal na pamahalaan,” saad ni Vergeire.

Ang mga brands na gagamitin sa second booster shot ay AstraZeneca, Moderna, Pfizer, Sinopharm, at Sinovac.

Una nang sinabi ni DOH Secretary Francisco Duque III na inaprubahan na niya ang pagbabakuna ng second COVID-19 booster para sa mga immunocompromised na mga indibidwal.

Ayon kay Duque, kabilang sa mga nasabing pasyente ay 'yung may cancer, recipients ng organ transplants, at HIV/AIDS patients, at iba pa.

Giit naman ni Duque na ang mga frontline healthcare workers at senior citizens ay hindi pa covered ng inaasahang rollout ng second booster shots sa susunod na linggo.

8 Pinoy, positibo sa Delta variant

ni Ronalyn Seminiano Reonico | July 20, 2021

Walong Pinoy ang nagpositibo sa COVID-19 Delta variant matapos sumailalim sa RT-PCR retesting, ayon sa Department of Health (DOH) ngayong Martes.

Ayon kay Health Undersecretary Maria Rosario Vergeire, asymptomatic ang mga ito at sa naturang bilang, 4 ang mula sa Cagayan de Oro, isa sa Manila, 1 sa Misamis Oriental, at dalawa ang returning overseas Filipinos.

Saad pa ni Vergeire, “Lahat sila ay walang sintomas. Sila ay mino-monitor ngayon hanggang matapos nila ang 14-day quarantine.”

Sa ngayon ay 35 na ang naitatalang kaso ng Delta variant sa bansa kung saan 3 ang naiulat na nasawi habang ang iba pa ay nakarekober na.