Karl Yulo at junior teams umani ng medalya sa Bangkok

ni VA @Sports News | Nov. 7, 2024

Photo: Si Khylem Progella ng Philippines laban sa Australia sa Asian Beach Volleyball Championship-Philippines vs. Australia.

Humakot si Karl Eldrew Yulo at ang Philippine pre-junior at junior gymnastics teams ng maraming medalya sa idinaraos na 3rd JRC Artistic Gymnastics Championships sa Bangkok, Thailand.

Pinangunahan ng nakababatang kapatid ni two-time Olympic champion Carlos na si Karl Eldrew ang kampanya ng national team nang sumungkit ng gold medal sa Men's Artistic Gymnastics Junior Individual All-Around Event.

Sa nakaraang taon na edisyon ng torneo, nakapag-uwi si Yulo ng 6 na medalya nang manguna sa parallel bars, vault, floor exercise at silver sa still rings apparatus. Nakapagbulsa siya ng dalawang medalya mula sa all-around at pommel horse events, silver at bronze ayon sa pagkakasunod.

Ngayong taon, umangat si Yulo sa dalawang medalya, matapos ding manguna sa Philippine junior men's team sa silver medal ng team all-around event. Samantala, nanguna si Jacob Alvarez sa pre-junior division nang kumulekta siya ng 5 gold medals mula sa unang dalawang silvers.

Nanguna si Alvarez sa individual all-around, vault, floor exercise, horizontal bars at events still rings. Nakasungkit siya ng 2 silvers matapos na sumegunda sa pommel horse at parallel bars. Sa mga kababaihan, nalagay sa 4th place ang Philippine pre-junior team. Si Yulo at iba pang national team ay nanatiling sumasagupa pa para sa medalya habang isinusulat ito kahapon.

PHL Women's Gymnastics sumuko na sa Paris Olympics

ni Anthony E. Servinio @Sports | July 29, 2024

Photo: POC

Isa-isang nagpaalam ang mga pambato ng Pilipinas sa Paris 2024 Women’s Artistic Gymnastics Linggo ng gabi sa Accor Arena. Magiting na hinarap nina Aleah Finnegan, Levi Ruivivar at Emma Malabuyo ang napakataas na kalidad na mga kalaro kabilang ang ilang mga dating kampeon at alamat.

Unang sumalang ang tatlong Pinay sa Vault kung saan lumabas na pinakamataas si Finnegan sa 13.733, sapat para sa ika-10 puwesto at hihintayin matapos ang iba pang kalahok. Limitado sa hanggang dalawang atleta ang bawat bansa sa finals kaya ang tanging pag-asa ni Finnegan na umangat sa unang walo ay mangyari ang tulad ng kaso ng Estados Unidos na kinuha ang unang tatlong puwesto kaya kailangang gawing reserba ang isa. Nagtala ng 13.600 si Ruivivar at 13.266 si Malabuyo.

Numero uno si Simone Biles ng Amerika na may 15.300 at determinado na mabawi ang ginto na huli niyang hinawakan noong Rio 2016. Sumunod ang Uneven Bars at bigo muli ang tatlo na makapasok. Pumuntos si Ruivivar ng 13.200 para ika-26, Finnegan na 12.566 para ika-37 at Malabuyo na 12.500 para ika-39. Lalong sumadsad sa Balance Beam ang koponan at hanggang ika-36 si Malabuyo na 12.233.

Nasa ika-40 si Ruivivar na 11.866 at ika-43 si Finnegan na 11.466. Sinikap nilang tapusin ang gabi ng positibo sa Floor Exercise subalit 13.100 lang ang nakayanan ni Malabuyo para maging ika-20. Ika-27 si Finnegan sa 12.733 at ika-36 si Ruivivar sa 12.433. Sa gitna ng mga kabiguan ay may nabuong maliit na pag-asa na mapabilang si Ruivivar at pati na rin si Malabuyo sa All-Around Finals.

Tumatakbong ika-28 at ika-29 ang dalawa at maaaring makasingit sa listahan na 24 matapos alisin ang mga atleta galing sa mga bansa na may higit sa dalawang kinatawan.

Titingnan kung makakalaro din ang mga Pinay sa Team finals kung sasapat ang kanilang ipinagsamang 152.696 puntos na medyo may kalayuan sa ika-pitong Netherlands na 159.096. Walo lang ang papasok at hindi pa tapos magtanghal ang ilan pang bansa.

Gymnast Elaiza Yulo, 2 ginto, NCR Girls Tankers, tig-5 golds

ni Gerard Arce @Sports | July 15, 2024

Medal Tally (as of 4:40pm)   G          S           B 

1.  National Capital Region    48        37        45       

2. Western Visayas                  34        24        27

3. Calabarzon                          33        29        33 

Namayagpag ng husto ang National Capital Region sa elementary girls swimming event matapos ang tig-limang gintong medalya na sinisid nina Sophia Rose Garra ng Malabon City at Alessandra Therese Martin ng Muntinlupa City, habang tig-2 gold medal ang nasungkit ng isang student-athlete mula sa taekwondo, table tennis at gymnastics na kinatampukan sa secondary girls ng nakababatang kapatid ni 2-time Olympian Edriel Carlos “Caloy” Yulo na si Elaiza Andriel Yulo para sa 2024 Palarong Pambansa sa Cebu City.

Solong nilangoy ng De La Salle Araneta University swimmer na si Garra ang 3 gold medal sa 50-meter backstroke, 100m backstroke at 200m individual medley, habang nakipagtulungan ito kina Gabrielle Gayle Ocampo, Adrienne Reese Tacuboy, Rielle Aislyn Antonio at kapwa golden girl na si Martin sa 4x100 at 4x50 medley relay.

Bukod sa dalawang ginto kasama ang mga nabanggit na swimmers, kumarera ang estudyante ng Paref Woodrose School na si Martin ng ginto sa 100-meter butterfly, 50m butterflystroke at 200-meter freestyle para maging pinakamaraming student-athlete na nagwagi ng ginto para sa powerhouse na NCR Region.  

Nakipagsanib-puwersa naman si Carlos Gabriel Docto ng University of Santo Tomas kina Christine Golez at Emmanuel Chris Josh Yamson sa Mixed doubles at doubles sa secondary boys, ayon sa pagkakasunod para sa dagdag na dalawang gintong medalya sa table tennis, habang ang kapwa Thomasian na si Eljay Marco Vista ay sumipa ng mga ginto sa Individual Poomsae Category A (below 59kgs) at Team Poomsae Boys (Group Boys) kasama sina Ateneo Junior High School Jose Lucas Llarena ng QC at John Paul Soriano ng ADT Montessori ng Pasig City.

Nagpamalas ng angking husay ang mga gymnasts ng NCR sa pangunguna ng 14-anyos na si Yulo mula sa Adamson University sa secondary girls sa Individual All Around (C3) at Team Championship.