Mga opisyal ng PNP, pasok din sa psychological exam

ni Lolet Abania | June 27, 2021

Tinatapos na lamang ng Philippine National Police (PNP) ang mga dapat na nakapaloob hinggil sa kanilang rekomendasyon na pagsasagawa ng Psychiatric-Psychological Exam (PPE) sa lahat ng PNP personnel sa gitna ng mga kaso ng grave misconduct sa ilang pulis.

Sa isang briefing kamakalawa, binanggit ng PNP ang tungkol sa tinatawag na police abuse – ito ang kaso ng isang police sergeant na walang habas na namaril sa loob ng Manila Police District (MPD) headquarters – na lalong nagpaigting na magkaroon ng periodic psychiatric exam hindi lamang sa mga ordinaryong pulis kundi maging sa lahat ng may mga ranggo.

Sinabi naman ni PNP Chief Police General Guillermo Eleazar na makakasama rin dito ang mga rekomendasyon ng Health Services sa pagbuo ng guidelines na isasagawa para sa regular na assessment ng emotional at mental health state ng mga pulis.

“This recent incident at MPD, along with the previous ones, highlights the need for us to closely look into the overall state of our men. Hindi nagtatapos sa kung paano nila ginagawa ang kanilang trabaho, kasama dito ang pagtingin sa kanilang physical, emotional at lalo na ang kanilang mental state,” ani Eleazar.

Matatandaang sinabi ni Eleazar na kinokonsidera niya na magkaroon ng PPE na gagawin tuwing tatlong taon bilang bahagi ng pagsisikap nilang mapabuti ang kalagayan at estado ng PNP personnel, lalo na ang mga nasa ground operations.

Samantala, tiniyak ni Eleazar sa publiko na nagsasagawa na ng malalimang imbestigasyon sa naganap na pamamaril ng isang pulis sa MPD headquarters nitong Biyernes.

“The investigation I ordered on the unfortunate incident goes beyond the shooting as this includes other aspects such as possible mental health issues of all our personnel,” sabi ni Eleazar.

Pulis na namaril sa 52-anyos na ginang, sinibak na!

ni Lolet Abania | June 24, 2021

Pirmado na ni Philippine National Police (PNP) chief Police General Guillermo Eleazar ang dismissal order ng pulis na nahuli sa video ng pagbaril sa isang 52-anyos na ginang na ikinamatay nito sa Quezon City noong May 31.

Sa isang statement, sinabi ni Eleazar na titiyakin ng PNP na masusunod ang mga proseso para sa summary dismissal proceedings upang maiwasan ang mga technicalities na maaaring mag-reinstate sa akusadong police officer sa kanilang organisasyon.

“Today, I signed the dismissal order of Police Master Sergeant Hensie Zinampan who was found guilty of Grave Misconduct and Conduct Unbecoming of a Police Officer,” ani Eleazar.

Una rito, nag-waive si Zinampan na magsumite ng isang counter-affidavit para sa naihaing administrative case.

Ayon kay Eleazar, si Zinampan ay kasalukuyang nakadetine habang kinakaharap ang kasong pagpatay.

Ipinunto ng PNP chief na ang pagkakasibak kay Zinampan ay pagpapakita lamang na hindi kinukunsinte ng PNP ang mga mapang-abuso at masamang gawain ng kanilang personnel, habang nagpapatunay ito na nananatili ang mekanismo ng disiplina sa kanilang hanay.

“Let this incident be a warning to all PNP personnel that I will not tolerate wrongdoings in our beloved organization, and a constant reminder for each and everyone of us to live up to what the three important and meaningful words in the PNP Seal — Service, Honor and Justice,” sabi ni Eleazar.

Matatandaang noong May 31, ang biktimang si Lilibeth Valdez ay nasa isang tindahan nang lapitan ng lasing umano na pulis, hinila ang buhok at pinaputukan ng baril sa leeg.

Bago ang insidente, ang anak ng biktima at ang police officer ay nagkaroon ng suntukan.

Una nang itinanggi ni Zinampan ang pagpatay sa biktima kahit pa kitang-kita sa video ang nangyaring insidente ng pamamaril.

Lalabag sa guidelines sa operasyon ng PNP at PDEA, lagot!

ni Lolet Abania | June 21, 2021

Mahaharap sa kaukulang parusa ang mga pulis at agents na mabibigong sumunod sa ilalatag na uniform guidelines para sa mga operasyon ng Philippine Drug Enforcement Agency at Philippine National Police (PNP).

Ayon kay PNP Chief Guillermo Eleazar ngayong Lunes, “I would like to stress that those who will not follow the unified rules will face sanctions.” Layon ng PDEA-PNP unified operation guidelines na maiwasan ang anumang susunod pang misencounter at miscoordination sa lahat ng law enforcers.

Binuo ang nasabing guidelines matapos ang fatal shootout sa pagitan ng mga operatiba ng PNP at PDEA sa isang mall sa Commonwealth, Quezon City noong February 24. Kaparehong insidente rin ang nangyari sa Fairview, QC nitong May.

Ayon kay PDEA Director General Wilkins Villanueva, ang unified operational guidelines ay makukumpleto bago matapos ang buwan.

Nagbigay na rin ng direktiba si Eleazar sa mga police unit commanders na siguruhing naipaliwanag nang mabuti sa mga tauhan at dapat na magkaroon ng epektibong superbisyon upang matiyak na ang kanilang personnel ay masusunod ang naturang guidelines.

“Once these unified operating guidelines are finalized and released to our men on the ground, I need the efficient supervision by our ground commanders to ensure that the rules are strictly followed by our operatives,” sabi ni Eleazar.