PNP Chief Eleazar nagpaalala sa mga delivery service companies na kilatising mabuti ang iha-hire na

ni Jasmin Joy Evangelista | October 27, 2021

Nagpaalala si PNP Chief Gen. Guillermo Eleazar sa mga delivery at courier service companies na kilatisin nang mabuti ang mga iha-hire na delivery riders upang masigurong hindi magagamit ang kumpanya sa ilegal na transaksiyon o paghahatid ng mga kontrabando.

Ito ay matapos matiklo ng pulisya sa isang buy-bust operation ang isang delivery rider sa Barangay 84 Caloocan City. Kinilala ang suspek na si Arturo dela Cruz, 38-anyos. Nakumpiska sa kanya ang 500 grams na shabu na tinatayang umaabot sa halagang P3.4 M.

Inatasan na rin Eleazar ang PDEA na imbestigahan ang nasabing kaso para malaman ang operasyon ng suspek. Hinimok naman ng PNP Chief ang mga delivery at courier companies na agad ipagbigay-alam sa mga awtoridad sakaling may matunugan silang ganitong mga modus upang agad na maaksiyunan.

PNP Chief Eleazar pinaiimbestigahan na ang nangyaring pagsabog ng hand grenade sa Maguindanao

ni Jasmin Joy Evangelista | October 25, 2021

Ipinag-utos ni Philippine National Police (PNP) Chief Police Gen. Guillermo Eleazar ang Police Regional Office-Bangsamoro Autonomous Region na magsagawa ng masusing imbestigasyon sa nangyaring pagsabog ng hand grenade malapit sa convoy ni Maguindanao Rep. Esmael “Toto” Mangudadatu noong Oktubre 23.

“Our police investigators should not leave any stone unturned in determining the motive and identifying the perpetrator of the grenade blast. Lahat ng anggulo ay ating titingnan sa insidenteng ito,” ani Eleazar.

Nangyari ang pagsabog ng granada nang dumaan sa detachment ng militar sa Guindulungan, Maguindanao noong Sabado ang convoy ng 20-30 sasakyan ni Mangudadatu at ng kanyang grupo.

“Isa lang sa maraming posibleng motibo sa insidente ang sinasabing pagtarget kay Maguindanao Rep. Esmael Mangudadatu. Maaari rin kasing nagkataon lang na dumaan ang convoy niya nang naganap ang insidente,” pahayag pa ng PNP Chief.

Samantala, inatasan din ni Eleazar ang lahat ng police units at tanggapan sa rehiyon na manatiling mapagmatyag at makipagtulungan sa militar upang maiwasan ang anumang pag-atake ng mga "lawless elements," lalo na ngayong panahon ng eleksiyon.

Magulang ng mga batang susuway sa safety protocols, mananagot — Eleazar

ni Jasmin Joy Evangelista | October 23, 2021

Nagbabala si Philippine National Police (PNP) chief General Guillermo Eleazar sa mga magulang na isinasama ang anak sa mga pampublikong lugar dahil hindi pa ito pinapayagan sa alert level 3 sa NCR.

“Nilinaw na ng Metropolitan Manila Development Authority (MMDA) ang panuntunan sa paglabas ng mga kabataan. Maaari lamang silang lumabas kung sila ay magpapagamot o kaya mag-eehersisyo. Dapat din ay kasama nila ang kanilang magulang tuwing lalabas,” pahayag ni Eleazar.

Maaari umanong managot ang mga magulang ng mga bata sakaling sumuway ang mga ito sa health and safety protocol na ipinatutupad ng gobyerno.

“Maaaring kayo ang managot kung maabutan sila ng ating kapulisan na pakalat-kalat sa lansangan o kaya’y nasa galaan,” ani Eleazar.