Shopping center, gagawing vaccination center

ni Lolet Abania | May 26, 2021

Isang mall ang gagawing vaccination center ng lokal na pamahalaan ng San Juan City para ihanda sa pagbabakuna ng mga A4 priority list o economic frontliners at mga indigent na magsisimula sa Hunyo.

Ayon kay Mayor Francis Zamora, ang mga sinehan at iba pang stall sa Greenhills Shopping Center ang gagamitin para mas malaking lugar habang marami ang mababakunahan araw-araw.

“Ang Greenhills Shopping Center ang ating main commercial area sa ating lungsod at marami po sa A4 economic frontliners ay dito nagtatrabaho,” ani Zamora. Umaabot na sa 1,800 kada araw ang natuturukang indibidwal ng COVID-19 vaccines sa lungsod.

“They will simply walk dito sa ating Theater Mall, gagamitin natin ‘yung mga movie theaters, ‘yung mga areas ng shopping center na pinabakante muna natin for a while upang magsilbi bilang vaccination center,” sabi ni Zamora.

Ayon sa alkalde, dahil sapat pa hanggang sa loob ng 8 araw ang supply ng bakuna, tiwala siya na agad mabibigyan ng Department of Health ang San Juan City government ng karagdagang COVID-19 vaccines sakaling maubos na ito.

Matatandaang inanunsiyo ng Inter-Agency Task Force on COVID-19 response na magsisimula ang pagbabakuna ng mga nasa A4 at A5 category o ang economic frontliners at mga mahihirap sa Hunyo.

Samantala, nasa 4,305,575 mamamayan na ang nabakunahan kontra-COVID-19. Sa bilang na ito, 3,318,646 ang naturukan ng first dose habang 986,929 ang nabakunahan ng second dose. Target ng pamahalaan na mabakunahan ang 58 milyong Pilipino para makamit ang herd immunity ng bansa.

Commercial-residential building sa Greenhills, nasunog

ni Ronalyn Seminiano Reonico | February 28, 2021

Nasunog ang isang commercial-residential building sa Greenhills, San Juan ngayong Linggo nang umaga.

Ayon sa ulat, nagsimula ang sunog bandang alas-9:45 AM kung saan naapektuhan ang ikalawang palapag ng Annapolis Tower sa Annapolis Street.

Itinaas ang second alarm sa insidente at gumamit ng aerial ladder ang mga bumbero at rescuers upang masagip ang mga residenteng na-trap sa six-storey building.

Bandang alas-10:50 AM nang ideklarang under control na ang apoy.

Kasalukuyan na ring nagsasagawa ng imbestigasyon ang Bureau of Fire Protection upang malaman ang dahilan ng sunog.

Dumating din si Mayor Francis Zamora sa insidente at aniya sa Facebook Live, “Sa mga minamahal ko pong San Juaneño, nandito po tayo sa Annapolis Street sa Greenhills.

“Kaka-declare lang po ng ating city fire marshall na fire out na po ang sunog dito kung kaya’t sinusuyod na lang ang ibang lugar upang siguruhin na maayos ang lahat. Pero nag-declare na po na fire out.”

Pinasalamatan din ni Zamora ang lahat ng mga rumesponde lalo na ang mga bumbero at rescuers.

Aniya, “Wala po tayong casualties kung kaya ako’y nagpapasalamat sa Diyos, wala pong nasaktan sa araw na ito rito po sa sunog sa Greenhills.”