605 lugar sa bansa, naka-granular lockdown — PNP

ni Jasmin Joy Evangelista | February 7, 2022

Sa kabila ng pagbaba ng bilang ng kaso ng COVID-19 sa bansa, nadagdagan pa ang mga lugar na isinailalim sa granular lockdown batay sa datos ng Philippine National Police nitong Lunes.

Mula 489 noong Sabado, umangat ito sa 590 nitong Linggo at ngayong Lunes ay 605 na ang naitalang bilang ng mga lugar na naka-granular lockdown.

Ang granular lockdown ay ang localized community lockdowns sa mga lugar kung saan hindi papayagang lumabas o pumasok ang mga residente sa loob ng 14 araw o higit pa.

Base sa tala nitong Linggo, 384 dito ay mula sa Cordillera, 130 sa Ilocos, 77 sa Cagayan, 8 sa Mimaropa, at 6 sa National Capital Region, ayon sa PNP.

Samantala nitong Linggo, kabilang din sa naka-granular lockdown ang 105 lugar na ini-report ng Ilocos Region Police Regional Office (PRO), 81 lugar batay sa report ng Ilocos Region Police Regional Office (PRO), 7 mula sa report ng PRO Mimaropa, at isa mula sa report ng PRO Zamboanga Peninsula.

Ayon pa sa PNP, may kabuuang 1,233 indibidwal ang apekto ng mga naturang lockdown.

Batay sa tala nitong Linggo, Feb. 6, ang bansa ay mayroong 126,227 active COVID-19 cases.

Granular lockdowns sa NCR, epektib — OCTA

ni Jasmin Joy Evangelista | September 24, 2021

Mayroon daw nakikitang epekto sa ngayon ang granular lockdowns na ipinapatupad sa Metro Manila.

"So although nagsimula ang pagbaba ng bilang ng kaso under MECQ, ngayon wala pa tayong nakikitang spike so maaari nating masabing effective naman ang ipinatutupad nilang granular lockdown, effective so far," ani OCTA Research Fellow Guido David.

Para naman kay MMDA Chairman Benhur Abalos, "maganda" ang mga nagiging resulta nito.

"So far, ang masasabi ko po personally talagang maganda po ang naging resulta. In fact, ang ating mga kaso ay tuloy po sa pagbaba dito 'no, halos nagpa-plateau na. Sinasabi ng DOH from 19.83 percent 'yung growth rate, naging 12.88 na lang po," ani Abalos.

Pero dagdag niya, “Baka mamaya mag-enjoy tayong masyado it goes without saying importante pa rin ang granular lockdown, of course importante ang minimum health protocols because we must learn how to live with the virus."

Umaasa naman ang Malacañang makabalik na ang lahat sa dati nating buhay at maging maligaya ang darating na Pasko dahil sa dami ng nabakunahan sa Metro Manila.

"So ako naman po'y umaasa na as we hit 70 percent at soon 80 percent 'no, 'yan naman po talaga iyong target population na proteksiyon natin eh baka naman makabalik tayo nang kaunti sa dating mga buhay natin. Sa tingin ko po, talagang mas magiging maligaya ang Pasko ngayong 80 porsiyento na halos ang bakunado sa Metro Manila," ani Presidential Spokesperson Harry Roque.

Samantala, nagpaalala naman ang Department of Interior and Local Government na hindi ito mangyayari kung hindi ipapares sa pagsunod sa protocols.

Napapansin daw kasi ng ahensiya na may mga apektadong residente na tumangging magpa-test.

Kaya nagpaalala ang kalihim na may batas laban sa hindi pagre-report kung nahawahan ng COVID-19 at may kulong at multa para sa mga lalabag nito.

Kahit Alert Level 4... Putol-kuryente uli sa NCR – Meralco

ni Lolet Abania | September 23, 2021

Inianunsiyo ng Manila Electric Company (Meralco) ngayong Huwebes na muli nilang ipagpapatuloy ang pagpuputol ng serbisyo ng kuryente sa National Capital Region (NCR) sa kabila ng ipinatutupad na Alert Level 4 status sa rehiyon.

Matatandaang sinuspinde ng Meralco ang service disconnection activities sa Metro Manila simula nang muling ipatupad ang enhanced community quarantine (ECQ) noong Agosto 6 hanggang 20 at hanggang sa pinalawig pang modified ECQ mula Agosto 21 hanggang Setyembre 15.

“With the NCR placed under the new GCQ (general community quarantine) with Alert Level 4 beginning September 16… disconnection activities will resume in NCR,” pahayag ng Meralco.

Ayon sa Meralco, ang service disconnection activities sa NCR ay ibabalik habang ide-deliver naman ang mga disconnection notices sa mga kustomer sa hindi pa nabayarang overdue bills sa susunod na linggo.

Paliwanag ng kumpanya na sa service disconnection notices, magkakaroon ng sapat na panahon ang mga kustomer para ma-settle ang kanilang mga unpaid bills at mabibigyan din ng assistance.

Samantala, ayon sa Meralco, ang service disconnection activities sa mga probinsiya ng Bulacan, Cavite, Laguna, Rizal, at Lucena City sa Quezon ay nananatiling suspendido hanggang Setyembre 30, 2021, habang ang mga naturang lugar ay nasa ilalim ng MECQ hanggang katapusan ng buwan.

Gayunman, tiniyak ng kumpanya sa mga kustomer na ang disconnection activities ay mananatiling suspendido sa mga lugar na isinailalim sa granular lockdown ng local government units (LGUs).

“We encourage customers with billing concerns to reach out, so we can assist them and even come up with payment terms if needed. We will continue to be very considerate of the challenges our customers are facing amid these difficult times,” paliwanag ni Ferdinand Geluz, first vice president at chief commercial officer ng Meralco.