Pag-iingay sa PMVIC, nagbunga!

ni Grace Poe - @Poesible | February 15, 2021

Hello, mga bes! Kumusta kayo at ang inyong mga mahal sa buhay? Sana’y naramdaman pa rin ninyo ang ispiritu ng Araw ng mga Puso kahit may pandemya tayo. Wala naman sa garbo ng regalo o bulaklak `yan kung hindi nasa kadalisayan ng pagmamahal. Dagdag-kilig na lamang kung may handog ang ating minamahal.

Nagpahayag kailan lamang ang Malacañang ng atas nito sa Land Transportation Office (LTO) na suspendihin ang inspection fees sa Private Motor Vehicle Inspection System (PMVIS) ng mga sasakyang kailangang magparehistro. Matapos itong magpatawag ng pagdinig ng Committee on Public Services ng Senado, sa pangangalampag na rin ng ating concerned citizens, sa usaping ito. Natutuwa tayong nakuha natin ang atensiyon ng Palasyo para pakinggan ang hinaing ng ating mamamayang maaapektuhan ng karagdagang gastos na ito.

Kaugnay nito, patuloy tayong nananawagan sa pamunuan ng Department of Transportation na suspendihin ang implementasyon ng kanilang issuances hinggil sa privatized MVIS hanggang hindi pa nakapagsasagawa ng maigting na pagsusuri at konsultasyon sa mga apektadong sektor. Dahil magpapataw ito ng singil sa ating mga motorista, kailangang bigyan ito ng buong konsiderasyon. Mismong issuance ng DoTr tungkol rito, nagsasaad na magsasagawa ng pampublikong konsultasyon bago ipatupad ang PMVIS inspection at magpataw ng inspection fees.

Naniniwala tayo sa layuning gawing roadworthy o karapat-dapat na tunakbo sa kalsada ang ating mga sasakyan. Suportado natin ang pagkakaroon ng mga ligtas na sasakyan para sa ating mamamayan. Gayunman, maisasagawa ito sa makatuwirang paraan na hindi naman magiging pabigat sa publiko. Kailangang sundin ang proseso para matiyak na hindi ninenegosyo at pinagkakakitaan lamang ang PMVIS na magpapayaman sa iilan pero magpapahirap sa taumbayan.

Ito ang isa sa mga pagkakataong nagbubunga ang pangangalampag para magkaroon ng pagbabago. Hindi natin dapat tanggapin lang kung mali ang ipinatutupad ng pamahalaan. Kailangan nating makisangkot kapag may hinaing tayo, kung may karapatan tayong natatapakan, kung mayroong nalalamangan. Ito ang esensiya ng demokrasya, ang maging bahagi ang tinig ng taumbayan sa mga polisiya at batas na makaaapekto sa kanila.

Face mask sa loob ng pribadong sasakyan, pag-isipan

ni Grace Poe - @Poesible | February 8, 2021

Isang taon na nating kinahaharap ang coronavirus at wala pa tayong natatanaw na wakas sa pandemyang ito. Bagama’t nagkakaroon tayo ng pag-asa dahil may nagawa nang bakuna, wala pa rin tayong katiyakan kung kailan ba makararating ito sa ating bansa at kung kailan makatatanggap ang mamamayan. Nariyan rin ang agam-agam dala ng patuloy na mutasyon ng virus. Dahil dito, patuloy na pag-iingat ang inirerekomenda para sa ating kaligtasan.

Isa sa mga natutunan na nating gawin ay ang pagsusuot ng face masks. Nakita sa mga pag-aaral na epektibo ito sa pagpapababa ng transmisyon ng impeksiyon kaya hinihikayat tayong patuloy na gawin ito. Ang tamang pagsusuot ng face mask, na nakatatakip sa bibig at ilong ay inirerekomenda ng mga awtoridad kapag lumalabas ng bahay.

Bagama’t naniniwala tayo sa pagsusuot ng face masks sa labas ng bahay, hiningi natin sa Inter Agency Task Force (IATF) on COVID-19 na bigyan ng rekonsiderasyon ang direktiba nito na kailangang magsuot ng face mask sa loob ng pribadong sasakyan kahit pa mula sa iisang bahay ang mga pasahero. Kung galing sa iisang tirahan ang laman ng sasakyan, ekstensiyon na lamang ng kanilang bahay ang sasakyan. Kalabisan na ang pagsusuot ng face mask dahil sila-sila rin naman ang magkakasama sa bahay.

Kasama ito sa mga usaping tatalakayin sa pagdinig na ating ipinatawag bilang tagapangulo ng Committee on Public Services ng isang pagdinig sa Martes tungkol sa Private Motor Vehicle Inspection Centers at sa child seat law. Katuwang rin natin dito ang Committee on Women, Children, Family Relations and Gender Equality.

Tatalakayin natin sa nasabing pagdinig ang mga isyung kaugnay ng PMVICs. Bagama’t maganda ang intensiyon ng batas, mahirap sa panahong ito na magdagdag ng gastos para sa mga motorista lalo pa at pandemya.

Ganito rin ang ating sentimiyento sa Child Seat Law. Naniniwala tayong kailangan natin ito para sa kaligtasan ng ating mga bata, pero hindi tamang ngayon natin simulan ang implementasyon nito kung kailan marami sa mga kababayan natin ang nakakaranas ng kagipitang pinansiyal dahil sa pandemya. Isa pa, ni hindi nga pinapayagang makalabas ang mga bata kaya hindi kailangang madaliin ang pagpapatupad nito.

Sa panahong ito, binabalanse natin ang kaligtasan at praktikalidad. Ang mga batas, gaano kaganda man ang intensyon, hindi dapat makadagdag sa paghihirap ng taumbayang nais nating paglingkuran.

Maaari ninyong mapanood ang ating pagdinig sa ating Facebook page (Grace Poe) at sa website ng Senate of the Philippines.

Bago sabihang gumastos, magbigay ng panggastos!

ni Grace Poe - @Poesible | February 1, 2021

Hello, mga bes! Kumusta kayo ngayong mga araw na ito? Nailabas na ba sa taguan ang mga pangginaw ninyo? Ang sarap ng lamig tuwing umaga nitong nakaraang mga araw, nakakagana lalo magkape.

Nabahala tayo sa pahayag ng ilang opisyal ng pamahalaan na lumabas ang mga tao at mamili sa pamilihan para sumigla ang ating ekonomiya. Pambihira naman! Tama, makakatulong para makabangon ang mga negosyo ang pagtangkilik ng mga tao. Pero mga bes, paano naman gagastos ang mga tao kung wala silang panggastos? Napakaraming nawalan ng trabaho dahil nagsara ang kanilang pinapasukan, bukod pa sa mga nagnegosyong nalugi dahil sa pandemya. Para sa atin, insensitibo naman na sabihan silang gumastos kung kailan namamaluktot sila para manatiling buhay sa mga panahong ito.

Sa pagpapalagay ng ating economic planners, ang paggasta ng mga consumer ang susi sa pagbangon ng ekonomiya. Tama ito sa teorya. Pero ang katotohanan, saan huhugot ang mga tao ng gagastahin? Manhid naman na sabihan natin ang mga taong nawalan ng trabaho na gumastos sila, lalo pa at napakamahal ng mga bilihin ngayon. Sa mahal ng bilihin, lalo na ng pagkain, hindi natin maasahan ang mga kababayan nating maglalabas.

Nagbigay ang pamahalaan ng ayuda noong kasagsagan ng paghihigpit ng lockdown. Ngayong sampung buwan na tayong naka-quarantine, marami ang nakakaramdam na mas kailangan nila ngayon ang tulong, pero wala nang dumarating.

Kailangang tutukan ng National Economic Development Authority (NEDA) ang employment dahil ito ang sektor na lubhang apektado ng pandemya. Noong isang taon pa dumadaing ang mga negosyo sa pamahalaan na bigyan sila ng tulong. Kailangan nating kilalanin na kung hindi natin bibigyan ng financial stimulus ang mga negosyo, magsasara ang mga iyan, na siyang nangyayari nga. Kapag nalugi at nawala ang mga negosyo, kasabay nitong malulugmok ang mga trabahador at empleyadong umaasa sa mga establisimiyento para mabuhay.

Isa ang mga Pilipinas sa may pinakamahabang quarantine sa buong mundo. Totoo, mahalaga ang buhay at kaligtasan kaysa pera. Pero katotohanan ring kailangang harapin natin na kailangan ng ilalaman sa sikmura at pangtustos sa gastos para magkaroon ng ligtas na tirahan ang ating mga mamamayan.

Sinusubukan ng pandemyang ito ang talas ng isip ng mga nagpaplano at nagpapatakbo ng ating ekonomiya. Ang hamon ay balansehin ito sa malasakit sa ating mga kababayang higit na nakakadama ng epekto ng pandemya sa kanilang araw-araw na pamumuhay.