Iwasan nating madagdagan pa ang mawawalan ng trabaho, plis lang!

ni Grace Poe - @Poesible | October 5, 2020

Hello, mga bes! Kumusta kayo at ang inyong pamilya? Sana ay malusog, walang sakit, at nasa mabuting kalagayan ang lahat.

Oktubre na, halos kalahating taon nang naka-quarantine ang ating bansa dahil sa COVID-19. Isa ang ating bansa sa may pinakamahabang lockdown sa buong mundo. Sa kabila nito, malayo pa tayo sa sinasabing “flattening the curve”. Nananatiling mataas ang bilang ng ating COVID-19 cases at sa kabila nito, napipilitan tayong lumabas pa rin dahil kailangang mabuhay ng mga tao. Nakikita natin ngayon ang malakas na hagupit ng pandemya sa ating ekonomiya: maraming negosyo ang nagsasara, maraming kabuhayan ang bumabagsak at kasabay ng mga ito, maraming manggagawa ang nawawalan ng trabaho.

Dahil rito, mahalagang mapangalagaan kung anumang trabaho ang mayroon pa sa kasalukuyan. Lahat ng suportang puwedeng ibigay natin sa industriya at negosyong nagbibigay ng empleyo sa mga tao, gawin sa abot ng makakaya. Kung magsasara pa ang mga kumpanyang nakatayo pa, mas marami ang masasadlak sa kahirapan.

Sa budget deliberations ngayong taon, pinaalalahanan natin ang ecozones sa bansa na tiyaking hindi na mababawasan pa ang mga trabaho. Inatasan natin ang pamunuan ng Cagayan Economic Zone Authority (CEZA) at Zamboanga City Special Economic Zone Authority (ZCEZA) na alamin kung bakit umaalis ang locators sa nasabing ecozones.

Nabahala tayo dahil sa ulat ng CEZA na nangalahati ang bilang ng trabaho sa CEZA. Mula sa 2,880 noong 2018, 1,555 na lamang ang mayroon sa unang quarter ng 2020. Samantala, ang dating 1,467 ng ZCEZA, 998 na trabaho na lamang ngayon.

Nabanggit na isa sa mga nagsarang negosyo ay ang malaking wig manufacturing company. Nang tinanong natin kung bakit ito umalis sa ecozone, hindi tayo mabigyan ng tiyak na sagot. Lalo na sa panahong ito, kailangang alamin natin kung ano ang naging problema para masolusyonan ito at di mag-alisan ang mga namumuhunan dito. Sa ganitong paraan, maisasalba natin ang trabaho ng mga empleyadong nakaasa sa mga negosyong ito.

Kung ang dahilan ng pag-alis ng mga negosyo sa ecozone ay buwis, puwedeng ilapit ang isyung ito sa Department of Finance o sa National Economic Development Authority (NEDA) para magawaan ng paraan. Koordinasyon ito sa pagitan ng mga ahensiya ng pamahalaan na kayang-kayang gawin ng mga tagapamahala ng ating ecozones.

Naniniwala tayong sa panahong ito, kailangan nating maging mas proaktibo para mailigtas ang kabuhayan ng ating mga kababayan. Iwasan nating madagdagan pa ang mawawalan ng trabaho. Para hindi umasa ang mga tao sa ayuda ng pamahalaan, tiyakin nating may kabuhayan silang masasandigan.

Hindi madaling timbangin ang kaligtasan at kabuhayan, kaya palaging mag-ingat!

ni Grace Poe - @Poesible | October 1, 2020

Hello, mga bes! Nagpahayag ang Pangulo na nananatiling nasa ilalim ng General Community Quarantine (GCQ) ang Metro Manila, kasama ang Batangas, Tacloban City, Iloilo City, Bacolod City, at Iligan City at mananatiling nasa Modified Enhanced Community Quarantine (MECQ) ang Lanao del Sur. Samantala, ang ibang lalawigan at siyudad sa bansa ay nasa Modified General Community Quarantine na.

Kasabay nito, lalarga nang muli ang provincial buses ngayong araw. Napapanahon ito dahil kailangan talaga ng ating mga kababayan, lalo na ng mga nagtatrabaho sa ibang lugar ng pampublikong transportasyon. Mas marami tayong kababayan na walang pribadong sasakyan at sila ang lubhang apektado ang mobilidad ngayong pandemya.

Pinaaalalahanan natin ang ating mga driver at pasahero na kailangan nating sundin ang safety protocols tulad ng pagsusuot ng face masks at face shields, pagsasagawa ng social distancing, at pagseryoso sa pagbibigay ng impormasyon sa contact tracing. Dahil sa dagdag na mobilidad, kailangang doblehin natin ang pag-iingat para hindi mahawa at makahawa ng COVID-19. Malaking problema kung ang isang may impeksiyon ay magkakalat pa nito sa ibang lugar.

Dapat ring magsagawa ang transport operators at mga awtoridad ng regular na paglilinis at disinfection ng mga sasakyan at istasyon. Mahalaga ito para mapangalagaan ang ating mga pasahero sa coronavirus at iba pang karamdaman.

Mahalaga ang provincial buses sa paghahatid ng mga tao at bilihin mula Maynila at mga karatig-rehiyon. Nagbibigay din ito ng trabaho at pagkakakitaan sa mga driver at konduktor na matagal na natengga dahil sa pandemyang kinahaharap ng bansa.

Gayunman, kailangang tiyakin ang kaligtasan ng publiko, at magagawa lamang ito kung magiging mahigpit ang pagpapatupad ng mga alituntuning pangkaligtasan sa transportasyon.

Kailangan ng monitoring sa ating bus stops at terminals para masigurong ipinatutupad ang social distancing. Para maisagawa ito, kailangang tiyakin ang maayos na sistema ng pag-schedule sa alis ng mga bus para maiwasan ang pagsisiksikan sa mga terminal at sa mismong mga sasakyan. Mahalaga na palaging malinis ang mga pasilidad at may disinfectant at sanitizer na magagamit ng libre ng mga pasahero.

Mahalaga ang mobilidad ng mga tao sa ating ekonomiya. Hindi lahat ay maaaring manatili lamang sa loob ng bahay. Mas marami sa atin ang kailangang makipagsapalaran sa labas para magkaroon ng pagkain sa mesa para sa ating pamilya.

Sa panahong ito na palaging naninimbang sa pagitan ng kaligtasan at kabuhayan, obligasyon ng bawat isa ang sumunod sa mga panuntunang inilatag para sa kaligtasan ng lahat.

Manatiling ligtas, mga bes!

Feeding program para sa estudyante, tuloy pa rin!

ni Grace Poe - @Poesible | September 21, 2020

Panahon na naman sa Kamara at Senado ng pagrerebisa ng budget ng mga sangay at ahensiya ng pamahalaan. Isa-isang sumasalang ang mga bawat tanggapan para i-presenta ang planong paggugol nila sa darating na taon, at ipaliwanag sa mga mambabatas kapag may tanong tungkol dito. Bahagi ito ng tungkulin ng Kongreso na magpasa ng national budget para sa bansa matapos suriin ang hinihingi ng mga opisina ng pamahalaan.

Pagkakataon ito para sa mga mambabatas tulad ng inyong lingkod na maisulong ang aming mga adbokasiya. Tulad ng dati, tiniyak natin na ang mga bata ay makatatanggap ng kinakailangan nilang suporta mula sa ating pamahalaan. Pinagtuunan natin ng pansin ang pagpopondo sa school-based feeding program sa ilalim ng national budget kahit pa walang pisikal na klase ang mga mag-aaral.

Pinaglaanan ng P5.97 bilyong pisong budget ang school-based feeding program sa ilalim ng Department of Education. Kasalukuyang itong tinatalakay sa budget deliberations sa Kongreso.

Suportado natin ang naisip ng DepEd na magrasyon ng masustansiyang pagkain sa mga estudyante na maaaring ihatid ng guro sa bahay ng mag-aaral o kaya naman ay kunin ng mga magulang sa paaralan. Kasabay itong dadalhin ng modules ng mga bata. Naniniwala tayong malaking tulong ito para sa ating mga mag-aaral na apektado ng pandemya. Sa gitna ng kinahaharap natin, walang batang nag-aalala dapat kung kailan siya susunod na kakain. Gawan natin ng paraan para lamanan ang kanilang tiyan para maging alerto ang kanilang isipan.

Kabilang na sa target beneficiaries ang mga papasok na kindergarten learners at ang mga mag-aaral mula Grade 1 hanggang Grade 6 na wasted at severely wasted base sa 2019-2020 School-Based Feeding Program report. Gayunman, hindi na kasama rito ang umabante na sa Grade 7.

Ang magandang nutrisyon ay may malaking kaugnayan sa maayos na paglaki ng isang bata. Ang pag-intindi natin sa nutrisyon nila hangga’t maaga ay magbibigay sa ating kabataan ng mas malaking tsansa na labanan ang mga nakamamatay na karamdaman at makatutulong sa kanilang pag-unlad na pisikal, intelektuwal, sosyal, emosyunal at moral.

Katuwang na programa ng national feeding program ang kampanya para sa public health nutrition at values transformation para sa mas buong lapit sa edukasyong pangkalusugan at nutrisyon.

Sa panahong marami sa ating mga kababayan ang nawawalan ng trabaho at pagkakakitaan dahil sa epekto ng COVID-19 sa ating ekonomiya, ang feeding program para sa mga bata ay isang malaking bagay para pangalagaan ang kanilang kalusugan. Ang programang ito ay para sa kapakinabangan ng higit na nangangailangan sa ating lipunan na pinakaapektado ng pandemya. Umaasa tayong maaaprubahan sa Kongreso ang budget nito at maipatutupad ng maayos para makarating ang tulong sa dapat makatanggap nito.