Magkapit-bisig lamang siguradong makakaahon tayo nang sabay-sabay

ni Grace Poe - @Poesible | November 02, 2020

Hello, mga bes! Kumusta kayo at ang inyong mga mahal sa buhay ngayong araw? Sana ay ligtas ang lahat at nasa mabuting kalagayan.

Sinusubok na naman ang tatag ng ating bansa ng isa pang kalamidad, ang Bagyong Rolly. Sinasabing ito ang pinakamalakas na bagyo sa buong mundo na pumasok ngayong taon, at dito pa sa atin tumama. Sa ilang lugar, nagtaas ng Signal No. 5 kahapon, para mabigyang-babala ang mga tao sa lakas ng paparating na bagyo. Signal No. 3 nga lang, nayayanig tayo, Signal No. 5 pa!

Malaking hamon sa maraming pamahalaang lokal na apektado ng bagyo ang evacuation centers dahil karamihan sa mga ito ay ginamit nang isolation sites para sa COVID-19. Ang mga nasa baybayin na delikado sa storm surge, pinalilikas, subalit hindi malinaw kung saan naman pupunta na ligtas. Napakahirap ipatupad ang social distancing protocols sa maliit na espasyong kailangang pagkasyahan ng mga nagsilikas. Ang masakit pa rito, maraming pamahalaang lokal ang nakagamit na ng kanilang calamity fund para sa COVID-19 relief ng kanilang nasasakupan. Pahirapan ngayon ang paghuhugot ng pondo para sa pangangailangan ng mga apektado ng Bagyong Rolly.

Ito ang dahilan kung bakit natin isinusulong ang pagtatatag ng dedikadong kagawaran para lamang sa disaster risk reduction management sa ating bansa. Sa ating panukalang-batas na Philippine Disaster Risk Reduction and Management System Act, ang pagtugon sa mga panganib na kakaharapin ng ating bansa ay pagpaplanuhan at paghahandaan bago pa man may dumating sa atin. Ang nasabing departamento ay bubuuin ng Bureau of Disaster Resilience, Bureau of Disaster Preparation, at Bureau of Knowledge Management and Dissemination.

Kamakailan, nagpunta ang ating mga kasama sa Panday Bayanihan sa Lopez, Quezon para maghatid ng kaunting tulong sa mga magsasaka nating apektado ng Bagyong Pepito. Nalubog ang mga palay na aanihin na lang sana ng ating mga kababayan. Pera na, naging bato pa. Sa pamamagitan ng kaunting ayudang dinala ng ating volunteers, sana’y nakatulong tayo sa pagtatawid sa kanila patungo sa pagbangon. Pagsisikapan nating magsagawa ng iba pang relief operations para sa mga apektado naman ng Bagyong Rolly.

Habang hinihintay ng ating mga kababayan ang tulong mula sa pamahalaan, napakalaking bagay ang pagbabayanihan sa panahon ng pangangailangan. Kung sino ang may maibibigay, sana ay tumulong sa apektado ng Bagyong Rolly, sa ating sariling paraan. Ang bawat gawa ng kabutihan para sa kapwa nating sinalanta ng bagyo ay malaking bagay sa pagbubuo ng kanilang buhay. Tumulong tayo nang maluwag sa ating puso.

7.6 milyong Pilipino ang nakaranas ng pagkagutom nito lamang Setyembre, nakupo!

ni Grace Poe - @Poesible | October 19, 2020

Nadadalas ang pag-ulan ngayong mga araw na ito. Kung dati-rati ay ubo, sipon at trangkaso lang ang problema natin sa ganitong panahon, naiba ito nang dahil sa coronavirus. Ngayon, ang pagkakaroon ng ubo, lagnat at pananakit ng katawan ay itinuturing nang sintomas ng COVID-19 infection na kailangang i-deklara sa pinapasukan at pinupuntahan, at sapat na dahilan para manatili sa ating mga tahanan para hindi makahawa sa ibang tao.

Nagluluwag na ang mga restriksiyon ng quarantine. Ipinaaalala natin sa ating mga kababayan na hindi ito dahilan para ipagsawalambahala na ang ating safety protocols. Kabaligtaran pa nga. Ngayong mas marami ang lumalabas, dapat tayong maging mas maingat at maging malay sa kalinisan at social distancing. Ipinaaalala rin natin ang kahalagahan ng katapatan sa health declaration forms. Kung may mga sintomas ng COVID-19, huwag itong itago. Walang nakakahiya sa pagkakaroon ng karamdaman. Ang nakakahiya ay ang pagsisinungaling tapos ay makahahawa ka ng napakaraming tao dahil itinago mo ang iyong sintomas o exposure sa nagpositibo.

Stay safe, mga bes!

***

Sa survey ng Social Weather Stations, lumalabas na itinatayang 7.6 milyong Pilipino ang nakaranas ng pagkagutom nitong Setyembre. Katumbas ito ng mahigit 23.8 porsiyento ng ating kabuuang populasyon.

Nakababahala ang bilang na ito dahil indikasyon ito ng epekto ng COVID-19 sa ating mga kababayan. Hindi na ito numero lamang sa istatistika ng ekonomiya — bilang ito ng mga tao kumakalam ang sikmura.

Isa sa ating batas na pinagtrabahuhan, ang Kalusugan at Nutrisyon ng Mag-Nanay Act ay isinulong natin para pangalagaan ang nutrisyon ng mga ina at sanggol sa unang isang libong araw ng kanilang buhay. Ayaw nating makaranas ng gutom ang mga buntis pati ang kanilang magiging anak dahil sa malawak na epekto ng malnutrisyon. Sa pagtatapos ng budget hearings, hiniling natin ang accounting ng mga pondong inilaan para sa batas na ito para sa 2021, pati na ang naging alokasyon nitong nakaraang dalawang taon.

Ipinahayag natin ang ating pagkabahala rito dahil naglalaman ang nasabing batas ng 115 interbensiyon na nakabahagi sa sampung kagawaran. Gayunman, sa ating pagsusuri ng budget, lumalabas na dalawang component lamang ang may budget para sa 2021, ang P2.19 bilyon para sa micronutrient supplementation sa ilalim ng Department of Health (DOH) at ang P159.33-million intervention package sa ilalim ng National Nutrition Council.

Kung hindi ilalagay ng ahensiya sa kanilang panukalang budget ang kailangang pondo, mawawalan ng saysay ang batas. Hindi ito mapatutupad. Para na lamang isang sanggol ito na ipinanganak na walang buhay.

Napakahalagang protektahan natin ang kalusugan at nutrisyon ng mga ina at ng kanilang mga anak sa gitna ng pandemya. Sila ang unang-unang tinatamaan kapag naghihigpit ng sinturon ang pamilya. Kailangan nating tiyakin, lalo sa panahong ito na maraming nagugutom, na ang pondo para sa kanila ay diretso sa kanilang sikmura.

Kahalagahan ng mental health o kalusugang pang-isip, ‘wag kalilimutan!

ni Grace Poe - @Poesible | October 13, 2020

Mahalagang kumustahin natin ang ating mga mahal sa buhay at mga kaibigan. Minsan, ang napakasimpleng aksiyon ng pagtingin kung ano ang lagay ng mga tao ay nakapagpapadama sa kanila ng ating malasakit lalo na ngayong panahong ito.

Noong Sabado, ipinagdiwang ang World Mental Health Day upang bigyang-diin ang kahalagahan ng mental health o kalusugang pang-isip. Higit kailanman, napakahalagang ipaalala sa bawat isa na hindi lamang ang ilalaman sa tiyan ang dapat intindihin ng bawat isa, kung hindi kung paano mananatiling panatag ang pag-iisip at ang ating mga emosyon sa gitna ng pandemya.

Napakaraming hamon ang hinarap nating lahat nitong nagdaang mga buwan: mula sa ating healthcare workers na kailangang magtrabaho kahit may panganib na makapag-uwi sila ng impeksiyon sa kanilang pamilya; mga guro na nag-aadjust sa pagtuturo na walang kaharap na mag-aaral at kinakailangang magdoble-kayod sa paggawa ng modules at iba pang materyales sa pagtuturo; mga estudyanteng nangangapa sa online schooling at ang kanilang mga magulang o bantay na tila nagbabalik-paaralan at lalo na ang mga manggagawa na nawalan ng trabaho dahil sa hagupit sa ekonomiya ng COVID-19.

Ang matagal na lockdown na nagdulot ng isolasyon sa maraming tao ay may epekto sa kalusugang pang-isip ng maraming kababayan natin. Walang katumbas ang sakit ng mga naulila dahil sa impeksiyon sa COVID-19 na hindi man lamang nahawakan o nakita ang kanilang mahal sa buhay sa huling sandali ng kanilang buhay. Marami ang nakaranas ng depresyon at matinding pagkabalisa, mga bagay na kailangan nating agapayan lalo na sa panahong ito.

Ipinapaalala natin sa ating mga kababayan: “It’s okay not to be okay.” Huwag mawawalan ng pag-asa. Kung kailangan ng kausap, puwede kayong tumawag sa National Center for Mental Health Crisis Hotline sa 09178998727 o kaya ay sa landline na (02) 79898727. Meron ring e-konsultasyon sa <bit.ly/ncmhkonsulta> kung gusto na online.

Walang nakakahiya sa paghingi ng tulong. Kung nanghihingi tayo ng tulong kapag nagugutom at walang makain, bakit hindi kapag magulung-magulo ang isip at kailangan ng tulong sa pagproseso nito nang walang takot na mahusgahan?

Hindi pa natin natatanaw ang dulo ng pandemya. Marami pang pagdadaanan ang bawat isa. Kailangan nating manatiling malusog, hindi lang sa pangangatawan, kundi pati sa isipan.