Maagap na paghahanda ang mas kailangan sa disaster preparedness

ni Grace Poe - @Poesible | November 23, 2020

Maaraw na sa maraming bahagi ng bansa, subalit marami sa ating mga kababayan ang patuloy pa ring dumaranas ng epekto ng nagdaang mga bagyo sa ating bansa. Ang mga binaha, naglilinis pa rin ng kanilang mga bahay na pinasok ng tubig na may putik. Wala pa ring kuryente sa ilang bayan. May mga kababayan tayong nasa evacuation centers pa rin dahil nasira talaga ang kanilang tahanan.

Nitong nakaraang mga linggo, nagsama-sama ang ating volunteers sa Panday Bayanihan para mag-repack at magpahatid ng ating tulong sa mga kababayan natin sa Albay, Camarines Sur, Catanduanes, Cagayan Valley, Marikina, at Quezon. Sa pamamagitan ng relief goods, umaasa tayong naramdaman ng ating mga kababayan ang malasakit sa kanila. Ganito rin ang ginagawa ng napakarami nating kababayan na nagtulung-tulong magsagawa ng donation drives at relief operations para sa mga sinalanta ng bagyo.

Bagama’t napakagandang tingnan ang pagbabayanihan ng ating mga kababayan, hindi natin dapat iasa sa pribadong sektor ang pagtugon sa pangangailangan ng mga nasalanta ng kalamidad. Kailangan nating agapan ang trahedya bago pa ito mangyari. Hindi uubrang reaksiyon lamang tayo: mahalagang maging maagap. Ang paghahanda sa bawat sakuna ay kailangang isagawa sa sistematikong paraan para mabawasan, kung hindi man maiwasan, ang pinsala ng kalamidad.

Ang ating ipinapanukalang Department of Disaster Resilience sa ilalim ng Senate Bill No. 124 ay inihain natin dahil ang mga kalamidad ay realidad ng ating bansa. Hindi tayo nawawalan ng bagyo kada taon. Nakararanas tayo ng mga lindol, at hindi natin alam kung kailan darating ang kinatatakutan nating “The Big One.” Kailangan natin ng kagawaran na ang trabaho lamang ay magplano, maghanda, at magsaayos ng mga polisiya at plano para sa mitigasyon at pagtugon sa mga kalamidad.

Naniniwala tayo sa “rightsizing” sa pamahalaan. Puwedeng magkaroon ng reorganisasyon para sa mga ahensiyang nakumpleto na ang dapat nilang gawin sa ilalim ng batas para mabigyan ng puwang ang mga bagong kagawaran base sa pangangailangan ng ating bansa.

Bigyan natin ng prayoridad ang komprehensibong paghahanda at pagtugon sa mga kalamidad para hindi paulit-ulit ang ating problema.

Ahensiya na tutugon sa malawak na epekto ng mga sakuna at trahedya, oks!

ni Grace Poe - @Poesible | November 16, 2020

Hindi pa man natatapos ang problema natin sa coronavirus, narito at ayaw yata tayong tigilan ng pagsubok ngayong 2020. Sunud-sunod na sinalanta ng mga bagyo ang ating bansa. Hindi pa man nakababangon mula sa pananalasa ng isa, hindi pa man nakapagpapagawa ng mga tinangay na bubong at nakapagbabalik ng kuryente sa maraming bayang apektado, may bagong malakas na bagyo na namang pumasok. Kumbaga sa pelikula, back-to-back ang bagyong tumama sa atin.

Kung Storm Signal No. 5 ang Rolly, matinding pagbaha naman ang dala ni “Ulysses”. Naririnig at nababasa natin na para itong “Ondoy” — napakalawak ng sakop ng pagkawasak. Mula Bicol hanggang Cagayan, pinahirapan at patuloy na pinahihirapan ang ating mga kababayan. Hanggang ngayon, nakalubog pa rin sa tubig ang maraming komunidad.

Bagama’t may ayudang inihahanda ang pamahalaan, hindi maikakaila ang kahalagahan ng tulong ng pribadong sektor sa pagsaklolo sa mga biktima ng kalamidad. Ang espiritu ng bayanihan ay buhay na buhay. Maraming Pilipino ang nagkukusang magsagawa ng relief operations para sa mga apektado ng bagyo sa iba’t ibang lugar sa bansa.

Bukod sa pagre-repack ng relief goods na dinala at dadalhin pa sa iba’t ibang probinsiya, ang ating volunteers sa Panday Bayanihan ay nagkusang pumunta sa Marikina para maglagay ng food station upang makapagbigay ng mainit na lugaw sa mga apektadong residente ng Tumana. Sa bawat mangkok ng lugaw na nagpainit ng sikmura ng mga nilalamig dahil sa bagyo at baha, naipadama natin sa ating mga kababayan na hindi sila nalimutan sa panahong ito.

Gayunman, kailangan nating aminin sa ating sarili na ang relief operations, bagama’t napakahalaga ay panandaliang solusyon lamang. Higit kailanman, nakikita natin ang problema ng ating bansa sa disaster risk and reduction management. Kailangan natin ng malawakang kalibrasyon at pagsusuri sa sistema ng pagpaplano at pagtugon natin sa bawat kalamidad na darating at dumarating sa ating bansa. Kailangan natin ng dedikadong ahensiya na ito talaga ang magiging tugon para maiwasan ang ganito kalawak na trahedya.

Inihain natin ang Senate Bill No. 124 o ang panukalang “Philippine Disaster Risk Reduction and Management System Act” para sa pagbubuo ng disaster risk reduction management department na paglalaanan ng pamahalaan ng tatlong porsiyento ng kabuuang pondo nito. Sa dalas magkaroon ng kalamidad, lalong nakikita ang pangangailangan sa masusi at sistematikong paghahanda.

Hindi natin mababago na ang Pilipinas ay nasa daanan ng bagyo, pero mapagpaplanuhan at magagawan ng sistema ang paghahanda para sa kaligtasan ng ating mga kababayan, pati na ang pondo para sa pangangailangan ng mga maaapektuhan. Maaayos natin ang koordinasyon sa mismong mga sangay ng gobyerno para sa pamamahala ng mga dam, kasama na ang pagbibigay-babala kapag magpapawala ito ng tubig at ang posibleng epekto nito sa bawat komunidad.

Hindi huling bagyong dadanasin ng Pilipinas ang “Rolly” at “Ulysses”. Tutukan natin ang disaster risk reduction and management para hindi maulit ang lawak ng pagkawasak sa ating mga komunidad.

Mga motorista, umaaray sa naglalahong load at wa’ ‘wentang minimum load value ng RFID!

ni Grace Poe - @Poesible | November 9, 2020

Magandang araw, mga bes! Kumusta kayo at ang inyong pamilya? Sana ay ligtas at nasa mabuting kalagayan at kalusugan ang lahat.

Noong isang linggo, sinalanta ng Bagyong Rolly ang ating bansa at winasak ang maraming lugar sa Bicol, partikular na sa Albay at Catanduanes. Hanggang ngayon, wala pa ring kuryente ang maraming lugar at may mga ulat na Disyembre pa ito maibabalik. Marami sa mga apektado ang muling nagtatayo ng kanilang bahay o nagkukumpuni ng mga bubong at dingding. Dagdag-pahirap pa sa ilang bayan ang baha na may putik mula sa Bulkang Mayon.

Bukod sa ayuda mula sa pamahalaan, marami sa ating mga kababayan ang nagsasagawa ng kani-kanilang relief operations para tulungan ang ating mga kababayan. Kahanga-hanga ang espiritu ng bayanihan ng mga Pilipino sa panahon ng kalamidad. Kahit may pandemya at lahat ay nakararanas ng paghihirap, nananaig pa rin ang kagandahang-loob at malasakit para sa mga nangangailangan.

Ipagpatuloy natin ang pagtulong. Ibabalik ng Diyos ang pagpapalang ito sa ibang paraan.

***

Samantala, ibang pahirap naman ang kinahaharap ng mga kababayan nating nagbibiyahe papunta at palabas ng Metro Manila dahil sa implementasyon ng mandatoryong paggamit ng RFID sa ating expressways. Bukod sa mahabang pila na sumasayang ng malaking oras para sa rehistrasyon nito, marami sa ating mga kababayan ang umaaray dahil sa di-umano’y naglalahong load at sa pagkakaroon ng minimum na load value na hindi mapakikinabangan.

Sa panahong gasgas na, kung hindi man butas, ang bulsa ng ating mga kababayan, huwag na sanang gumawa ng mga imposisyon na babawas pa sa perang puwede sanang hawak nila. Halimbawa, kailangang may minimum na 100 load sa RFID ang mga sasakyang papasok sa Cavitex. Kung galing ang motorista sa Roxas Boulevard at papasok sa Cavitex at ang load niya ay P99 na lang, kailangan pang mag-load bago makapasok kahit P25 lang naman ang toll fee. Sa ibang tao, maliit na bagay lamang ito, pero sa mga naghahanapbuhay na bawat piso ay binibilang, dagdag-pabigat ito.

Kailangan ring tingnan ang mga ulat ng nawawala o nagkukulang na load dahil pera ng mga kababayan natin ang pinag-uusapan natin dito. Kung dati ay load sa cellphone lang ang inirereklamo ng mga tao, marami tayong nababasa sa social media na nagsasabing nauubos agad ang kanilang ikinarga.

Suportado natin ang Department of Transportation sa kanilang direktiba para sa contactless transactions sa ating mga expressway. Gayunman, kailangang suriin ng pamahalaan ang kabuuang sistema nito. Kailangang busisiin ang pagpasok at paglabas ng bayad sa dulo ng proseso para matiyak ang integridad nito.