Malixi 5th place sa World Amateur Ranking

ni Eddie M. Paez Jr. @Sports | August 16, 2024

Photo: Rianne Mikhaella Malixi / United States Golf Association - USGA

Lalo pang tiningala ng buong daigdig ang dalagitang si Rianne Mikhaella Malixi matapos sumibad ang alas ng Pilipinas sa panglimang puwesto ng Women's World Amateur Golf Ranking base sa pinakahuling talaan na ipinalabas noong Miyerkules.

Umangat ng limang baytang ang 17-taong-gulang na bituin ng bansa mula sa pag-okupa sa pang-10 puwesto. Dalawa lang ang kinatawan ng Asya sa Top 10. Bukod kay Malixi, pumapangatlo naman si South Korean Minsol Kim.

Maliban sa dalawang lady parbusters mula sa Asya, pinutakte ng mga amateur golfers ng Estados Unidos at Europe ang talaan. Nasa natatanging hanay sina Lottie Woad (1st, England), Julia Lopez Ramirez (2nd, Spain), Zoe Campos (4th, USA), Jasmine Koo (6th, USA), Catherine Park (7th, USA), Adela Cernousek (8th, France), Andrea Revuelta Goicoechea (9th, Spain) at Rachel Kuehn (10th, USA).

Matatandaang kumislap nang husto ang pangalan ni Malixi dahil sa pangingibabaw sa katatapos na U.S. Women's Amateur Tournament (Tulsa, Oklahoma) nitong Agosto at sa U.S. Girls Championships (California) noong Hulyo. Hinirang din siyang reyna sa Women's Australian Masters of the Amateurs noong Enero. 

Sumegunda rin siya sa dalawang iba pang mga paligsahan bukod pa sa pagkuha ng pang-apat na posisyon sa European Ladies Amateur Championships sa Finland. Nakatakda siyang sumabak ngayong buwan sa Korean Ladies Professional Golf Association.

Malixi nagreyna sa U.S. Amateur Tournament

ni Eddie M. Paez Jr. @Sports | August 14, 2024

Photo: Rianne Mikhaella Malixi / United States Golf Association - USGA

Muling umukit ng kasaysayan ang pambato ng Pilipinas na si Rianne Mikhaella Malixi sa pamamagitan ng paghablot sa korona ng prestihiyosong U.S. Women's Amateur Tournament sa Tulsa, Oklahoma.

Ito pa lang ang pangalawang beses sa nakalipas na walong taon na isang tao lang ang nangibabaw kapwa sa U.S. Women's Amateur at sa U.S. Girls Championships (California) sa magkaparehong taon.

Tinalo ni Malixi si Asterisk Talley ng USA sa isang dikitang duwelo sa loob ng dalawang araw at inilatag na 36 holes. Isang matinding sipa sa homestretch kung saan umangat siya sa hole nos. 31, 32 at 33 bago tumabla sa pang-34 na butas ang tuluyang nagbigay sa kanya ng 3 & 2 na tagumpay kahit na may natitira pang 2 butas.

Ang tagumpay ng 17-taong-gulang na Pinay sa fairways at greens ng Country Hills Country Club ay pangatlo na niya ngayong 2024 dahil bukod sa kambal na korona sa Estados Unidos ay hinirang din siyang reyna sa Women's Australian Masters of the Amateurs noong Enero. Sumegunda rin siya sa dalawang iba pang mga paligsahan.

Sa Oklahoma pa rin, sinagasaan ni Malixi, kasalukuyang no. 10 sa Women's World Amateur Golf Rankings, patungo sa pangkampeonatong duwelo sina Annabelle Pancake (2 & 1, USA, Round-of-64,), Anna Huang (2 & 1, Canada, Round-of-32), Scarlett Schremmer (3 & 2, USA, Round-of-16), Catherine Rao (2 & 1, USA, Quarterfinals) at USA bet Kendall Todd (1 up) noong semifinals ng kaganapang isinaayos ng U.S. Golf Association.

Pagdanganan 4th place sa Paris Olympics golf

ni Eddie M. Paez Jr. @Sports | August 12, 2024

Photo: Dottie Ardina at Bianca Pagdanganan / Dottie Ardina / LPGA Tour

Tinuldukan nina Pinay parbusters Bianca Pagdanganan at Dottie Ardina ang kanilang kampanya sa women's golf ng  2024 Paris Olympics sa pamamagitan ng mga nagbabagang rounds sa palaruan ng Le Golf National sa France. 

Kapwa kumamada ng palabang 4-under-par 68 sa huling 18 butas ng Olimpiyada ang dalawang pambato ng bansa para sa pinakamainit na laro nila sa nakalipas na apat na araw ng prestihiyosong kompetisyon. Pareho rin silang nakapagposte ng dalawang malulupit na birdies sa huling dalawang holes.

Pero naubusan na ng butas ang mga sinasandalan ng Pilipinas kaya nakuntento na lang si Pagdanganan (72-69-73-68) sa pang-apat na puwesto habang napunta naman si Ardina (76-72-69-68) sa pang-13 baytang. 

Sa kaso ni Pagdanganan na umiskor ng kabuuang 6-under-par 282 strokes, isang palo lang ang naging agwat sa kanya ni bronze medalist Xi Yu Lin (281) ng China. Sa kasamaang palad, ang kalamangang nabanggit kontra sa 26-taong-gulang na bituin ng Bulacan ay pahabol lang dahil nairehistro ito matapos maisalpak ng Intsik ang birdie sa huling butas.

Kay New Zealand ace Lydia Ko (278) isinabit ang gintong medalya habang nakuha naman ni Esther Henseleit (280) ng Germany ang pilak. Ang gold ni Ko ay pangatlo na niya sa kasaysayan ng Olympics. Nakapodium din siya noong 2016 at 2020.

Bagamat kinapos sa paghabol sa podium, taas-noong naipakita ng dalawang Pinay ang palabang porma at ang hataw hanggang sa dulo ng 72-hole na kompetisyon kontra sa pinakamalulupit na lady golfers ng buong mundo. Kapwa rin nagtapos sina

Pagdanganan at Ardina na angat kay 2020 Tokyo Olympics champion at world no. 1 Nelly Korda (22nd) ng Estados Unidos.