Pag-demote kay CGMA, normal lang — P-BBM

ni Mylene Alfonso | May 20, 2023

Naniniwala si Pangulong Ferdinand “Bongbong” Marcos, Jr., na bahagi ng "reorganization" ang desisyon ng House of Representatives makaraang i-demote si

Pampanga 2nd District Rep. Gloria Macapagal-Arroyo bilang deputy speaker.

Ayon kay Marcos, ang reorganisasyon ay bahagi lamang ng mga proseso sa gobyerno, na aniya ay "darating paminsan-minsan".

"I really see it as just a run of the mill comes once in while, run of the mill na ginagawa sa House," reaksyon ni Marcos sa isang panayam sa Pagudpud, Ilocos Norte.

"If you're in government long enough, you have seen many of this. In my time as congressman, I had two terms as congressman, nakatatlo yata kaming ganyan eh and this is is just part of reorganization," paliwanag ni Marcos.

Idinagdag din ng Punong Ehekutibo na kapangyarihan ng House Speaker na ayusin ang mga hanay sa Mababang Kapulungan ng Kongreso.

"The Speaker, it's his prerogative as to how he feels the House should be reorganized," saad ni Marcos.

"I don't think not any of us know what it all means, where the chips will fall after all of this reorganization. I think we should also be careful to not read too much into it," hirit pa ng Chief Executive.

Nabatid na si Arroyo ang chairperson emeritus ng Lakas habang si House Speaker Ferdinand Martin Romualdez ang presidente ng partido.

Marijuana, payagan na — GMA

ni BRT | May 13, 2023

Inihain ni Senior Deputy Speaker at Pampanga 2nd district Representative Gloria Macapagal-Arroyo ang panukalang batas na naglalayong payagang gamitin ang marijuana bilang gamot.

Sa ilalim ng House Bill 7817 tanging ang mga “debilitating medical conditions” tulad ng cancer, glaucoma, multiple sclerosis, epilepsy, HIV/AIDS, post-traumatic stress disorder, at rheumatoid arthritis ang papayagang makagamit ng gamot na marijuana.

Gayunman, hindi umano sila papayagang magkaroon nito o gawin itong panigarilyo.

Para naman maiwasan ang pag-abuso, ang mga physicians na nakarehistro lamang sa DOH ang maaaring mag-issue ng certificate para sa paggamit nito ng isang pasyente.

Hindi naman puwedeng mag-issue ang physician sa kanyang sarili maging sa mga kamag-anak hanggang sa fourth civil degree of consanguinity o affinity.

Arroyo hiling sa mga Kapampangan ang landslide win para kay Inday Sara

ni Jasmin Joy Evangelista | April 5, 2022

Isang araw bago ang kanyang ika-75 kaarawan, hiniling ni dating pangulong Gloria Macapagal-Arroyo sa mga kapwa-Kapampangan ang landslide win para kay vice presidential candidate Inday Sara Duterte-Carpio.

“For Bong Bong Marcos to be a good president, he needs a vice president like Sara. So let’s make her win by a landslide in Pampanga,” ani Arroyo sa wikang Kapampangan.

Ito ay kahalintulad ng kanilang apela sa publiko nang suportahan nila ang dating running mate ni Arroyo sa 2004 elections na si Noli de Castro.

Parehong nagwagi sina Macapagal-Arroyo at De Castro sa naturang eleksiyon.

“Kaya ngayon naman, tiyakin natin na UniTeam ang tutulungan natin. Kailangan ni BBM (Bongbong Marcos), kahit matalino siya, para maging magaling na presidente, kailangan niya si Mayor Inday Sara Duterte bilang bise presidente,” ani Macapagal-Arroyo.

Sinabi pa ni Arroyo na ang kanyang pahayag ay base sa kanyang karanasan. Masuwerte umano siya na naging vice president niya si Noli de Castro.

“It is difficult to serve as President but I got big help from Noli,” aniya.

Ayon pa rito, ang pagboto ng mga Kapampangan kay Duterte-Carpio ay pagbabalik lamang ng malaking suporta ni P-Duterte sa development ng Pampanga.

Inihayag naman ni Duterte-Carpio na malaki ang naging tulong sa kanya ni Arroyo nang magsilbi itong head ng Lakas-CMD. Hiling daw niya ang good health, happiness at long life para kay Arroyo.

Bukod pa rito, ibinahagi ni Macapagal-Arroyo na tinulungan ni Pangulong Rodrigo Duterte, ama ni Duterte-Carpio, ang lalawigan ng Pampanga.

“Pangalawa, sa laki ng tulong naman ni Presidente Rody Duterte dito sa atin sa Pampanga,” aniya.

“Kaya suklian natin siya… Dapat landslide si Inday Sara,” dagdag niya.

Si Macapagal-Arroyo ay ang president emeritus ng Lakas-CMD, ang partido kung saan tumatakbo si Duterte-Carpio bilang vice president.