150 katao, na-trap sa nasusunog na gusali sa Hong Kong

ni Lolet Abania | December 15, 2021

Nasa tinatayang 150 indibidwal ang na-trap sa bubong ng World Trade Centre ng Hong Kong ngayong Miyerkules, matapos sumiklab ang sunog sa gusali sa mataong lugar ng Causeway Bay commercial at shopping district, ayon sa mga awtoridad.

Sa ulat ng pulisya sa Reuters, 13 katao ang agad na dinala sa ospital, kung saan isa sa kanila ay semi-conscious o bahagyang nawalan ng malay.

Ayon sa city authorities, gamit ng mga bumbero habang inaapula ang apoy ang dalawang high-powered hose, gayundin ng mga hagdan at breathing apparatus upang i-rescue ang mga nata-trap sa sunog.

Agad naman ang mga shoppers at office workers na lumabas ng gusali habang unti-unting napupuno ng matinding usok dito.

Pinahinto na rin ng pulisya ang trapiko sa ilang pangunahing kalsada sa paligid ng 39-floor World Trade Centre, kung saan maraming mga restaurants, shops at mga opisina.

Ayon sa broadcaster RTHK na batay sa pulisya, nasa 100 katao naman ang pinalikas mula sa isang restaurant patungo sa itaas ng 39th floor nang sumiklab ang sunog habang napupuno ng usok ang dining area.

Batay sa media, ang sunog ay nagsimula sa isang utility room sa lower level ng shopping mall bandang tanghali, bago kumalat sa bamboo scaffolding na nakapalibot sa block.

Hindi naman malinaw ang naging dahilan ng sunog. Patuloy na ring inaalam ng mga awtoridad ang pinagmula ng apoy.

8 patay sa music festival sa Houston, USA

ni Lolet Abania | November 6, 2021

Nasa walo ang nasawi habang marami ang nasaktan nang dumugin ng mga tao ang ginanap na Astroworld musical festival sa Houston, Texas, USA nitong Biyernes, ayon sa mga awtoridad.

“The crowd began to compress towards the front of the stage and that caused some panic and it started causing some injuries,” pahayag ni Houston fire chief Samuel Pena sa isang press conference.

Batay sa ulat, tinatayang 50,000 indibidwal ang dumalo sa Astroworld Festival sa NRG Park ng nasabing siyudad, nang ilan sa mga audience ay biglang nagpuntahan sa stage.

Nagsimulang dumagsa ang mga tao, bandang alas-9:00 ng gabi ng Biyernes local time (0200 UTC Sabado) sa event.

Ayon pa sa mga awtoridad, kitang bumagsak na walang malay ang mga biktima at lumala pa ang kaguluhan sa festival ng alas-9:38 ng gabi, habang nagkaroon na ng mass casualty o namatay sa insidente.

“We had at least eight confirmed fatalities tonight and scores of individuals that were injured,” sabi ni Pena, subalit hindi pa nila makumpirma ang sanhi ng pagkamatay ng mga biktima dahil aniya, hinihintay pa nilang makumpleto ang medical examinations ng mga ito.

Sinabi rin ni Pena kung paano nag-umpisang mag-crush o magsiksikan ang mga tao patungo sa stage nang ang rapper na si Travis Scott ay nagpe-perform na.

“We transported 17 patients to the hospital... 11 of those that were transported were in cardiac arrest,” saad pa ni Pena.

Pulis, 9 pa patay sa pamamaril sa Colorado, USA

ni Lolet Abania | March 23, 2021

Patay ang 10 katao, kabilang ang isang police officer, matapos na pagbabarilin ng isang lalaki sa supermarket sa Boulder, Colorado, USA kahapon.

Naaresto naman ang suspek ng mga awtoridad matapos ang insidente habang naiulat na ito ang ikalawang mass shooting na nangyari sa US sa loob ng isang linggo.

Sa inisyal na imbestigasyon ng pulisya, naganap ang pamamaril ng suspek bandang alas-3:00 ng hapon nu'ng Lunes sa isang King Soopers grocery store sa Boulder na matatagpuan sa north-central Colorado City sa silangang bahagi ng Rockies, 28 miles (45 km) hilagang kanluran ng Denver.

Gayundin, ayon sa mga awtoridad, wala silang alam na motibo ng suspek sa pamamaril. Agad na nagsilabasan ang mga namimili at mga empleyado ng supermarket, kung saan rumesponde ang mga law enforcement officers habang namatay ang isang pulis na unang dumating sa lugar.

Isang customer at residente ng Boulder na si Sarah Moonshadow, 42-anyos, kasama ang kanyang anak na si Nicholas, ang nagsabing sunud-sunod na putok ang narinig nila sa loob ng supermarket.

"We were at the checkout, and shots just started going off," ani Moonshadow sa Reuters. "And I said, 'Nicholas get down.' And Nicholas ducked. And we just started listening and there, just repetitive shots ... and I just said, 'Nicholas, run,'" sabi pa ng ginang.

Sinubukan pang tulungan ni Moonshadow ang isang biktimang duguan na nakahandusay na sa sahig subalit hinila na siya ng kanyang anak palabas ng supermarket habang sinabihan siyang tumakbo na silang mag-ina.

Matatandaang noong Martes, anim na araw pa lang ang nakakalipas, 8 katao ang namatay, kabilang ang 6 Asian women, dahil din sa gun violence sa isang spa na sakop ng Atlanta.

Naaresto at kinasuhan na ang 21-anyos na lalaking suspek na responsable sa pamamaril.