PBA players, best influencer sa fans para magpabakuna

ni Gerard Peter - @Sports | May 30, 2021

Mga manlalaro ng Philippine Basketball Association (PBA) ang kayang para makapagbigay ng tulong sa pamahalaan na mas mapahatid sa publiko ng kamalayan sa isinusulong na pagpapabakuna.

Binigyang halaga ng 58-anyos na si Metro Manila Development Authority (MMDA) chairman Benhur Abalos na ang impluwensiya ng mga basketball players ng kauna-unahang professional league sa Asya ang makatutulong sa kampanya na himukin ang mga Filipino na magpabakuna upang makamit ng bansa ang herd immunity kontra sa mapaminsalang coronavirus disease (Covid-19).

“We need media influencers, athletes for example, PBA players,” pahayag ni Abalos sa panayam ng ABS-CBN News Channel hinggil sa kung papaano matatanggal sa publiko ang pagpili ng mga brand ng bakuna. “We need media influencers to explain these things. I'll raise this up. PBA, the players, and the national athletes could really help here.”

Hinimok ni Abalos na makipagtulungan na ang publiko sa pamahalaan para mas maiusad ang vaccination drive, na binigyang halaga ang ginagawa ng medical frontliners at mga punong tagapamahala ng lokal na pamahalaan upang matuldukan ang pakikipaglaban sa Covid-19 pandemic na mahigit isang taon ng nilalabanan sa buong mundo.

“You know, our doctors, nurses, our mayors have been working for so long, seven days a week. They are very tired,” wika ni Abalos. “We do not really know what type of vaccines will come in. So in order for us to reach that herd immunity, we must all work together.”

“Bagsak na lang kami ng bagsak ng bakuna, trabaho na lang kami ng trabaho, 'yung mga tao, please just cooperate. Pumunta kayo, and whatever [vaccine] we have right there, sasabihin naman namin sa inyo,” paliwanag ng dating representatibo ng lone district ng Mandaluyong.

Samantala, nagpaplanong pahabain pa ng Blackwater ang kanilang training camp sa Tagaytay City matapos ang isang linggong pagsasanay sa Batangas City Sports Center para sa pagbubukas ng scrimmages at training na pinayagan ng Inter Agency Task Force on Emerging Infectious Disease (IATF-EID).

Gabuco, sure na sa bronze; Marcial, susubok sa gold

ni Gerard Peter - @Sports | May 29, 2021

Tatlong Filipino national boxers na lamang sa pangunguna ni Tokyo Olympics bound Eumir Felix Marcial ang natitirang may tsansang makakopo ng gintong medalya sa 2021 ASBC Asian Elite Men and Women’s Boxing Championships sa Grand Ballroom ng Le Meridien Hotel sa Dubai, United Arab Emirates, matapos malaglag sa kanyang semifinal battle si dating AIBA world champion Josie Gabuco.

Nabigo ang 34-anyos na five-time Southeast Asian Games gold medalist na makalusot sa kanyang laban kay Gulasal Sultonalieva ng Uzbekistan, 1-4, Huwebes ng gabi, gayunpaman, nakasisiguguro na ito ng tansong medalya sa women’s light-flyweight category.

Isa sa mga paborito ang 2012 Qinhunagdao World championships titlist na makakapasok sa finals match ng under48kgs, ngunit pumalya itong maidepensa ang 2019 edisyon na ginanap sa Bangkok, Thailand, habang naputol ang winning run nito kasunod ng gold winning performance sa nakaraang 2019 Manila SEA Games.

Susubukang makamit ng 25-anyos na si Marcial ang titulo para sa kanyang unang gintong medalya ngayong taon sa amateur fight, matapos magwagi sa kanyang unang professional bout noong isang taon kay Andrew Whitfield via 4-round unanimous decision sa middleweight class.

Huling beses nagkampeon si Marcial sa amateur ranks noong Asia-Oceania Olympic Qualifying Tournament sa Amman, Jordan nung Marso, 2020. Ngunit kinakailangan munang talunin ng Lunzuran, Zamboanga City native si Jafarov Saidjamshid ng Uzbekistan, na nagawa namang gulatin si no. 4 seed Omurbek Bekzhigit Uulu ng Krygyzstan sa quarterfinals.

Sasabak din sina light-flyweight Mark Lester Durens at bantamweight Junmilardo Ogayre sa kani-kanilang semifinal duel upang maitulak ang gold medal na kampanya.

Tatapatan ng 20-anyos na si Durens na sasabak sa unang overseas fight si Daniyal Sabit ng Kazakhstan sa 48 kgs division, habang makikipagbuntalan si Ogayre sa men’s 56 kg class kay top seed Mirazizbek Mirzahalilov ng Uzbekistan.

Vis-Min Super Cup, malaking tulong sa Sports Development

ni Gerard Peter - @Sports | May 29, 2021

Magsisilbing daan ang kauna-unahang professional league sa katimugan na Chooks-to-Go Pilipinas VisMin Super Cup upang mas maipamalas at maipakita ng mga kabataan at homegrown talents mula Mindanao ang kanilang matayog na kaalaman pagdating sa pampalakasan.

Tatlong team owners mula sa Mindanao division ang nakakita ng pagkakataon upang maitulak pa rin ang larong basketball sa kanilang lugar, kahit na may nagaganap na krisis ng COVID-19 pandemic – na siya ring pamamaraan upang mas simulang palakasin at patatagin ang sports development sa kani-kanilang nasasakupan.

“I have no second thought. When the VisMin organizers presented to me the program, I immediately sought an audience with our Governor (Roberto Uy), then approved agad,” pahayag ni Roxas, Zamboanga del Norte May Jan Hendrick Vallecer sa weekly TOPS ‘Usapang Sports’ On Air. “Napakaganda ng programa. I also love and played basketball, pero hindi ko na itinuloy yung passion ko. Right now, nakikita ko maraming bata dito sa amin ang mahuhusay and through VisMin Cup, hopefully ito ang maging tuntungan nila para matupad yung pangarap nilang makalaro sa mataas na level ng kompetisyon,” ani Vallecer sa sports forum na itinataguyod ng Philippine Sports Commission (PSC), PAGCOR at Games and Amusements Board (GAB).

Ganito rin ang paniniwala ni Iligan City Sports Director at team manager Amador Baller na iginiit na malaki ang maitutulong ng liga para higit na magpursige ang mga kabataan na ibalik ang kanilang atensyon sa sports.

“We’re proud of our team. Except on one player, lahat ng kinuha namin tagarito sa Iligan City. Maraming gustong makapaglaro ng high-level competition sa basketball pero walang mapaglaruan. With this VisMin Cup, tiyak marami tayong madidiskubre na talento rito,” sambit ni Baller.

Para naman kay Lance Samuel Co, team consultant ng Pagadian City Explorers, hindi pahuhuli sa talento sa aspeto ng sports ang Mindanao at napapanahon ang VisMin Cup para sa kanilang layuning maipakita ang galing ng Mindanaoan.

“Also, malaki ang maitutulong ng liga para maexposed ng Mindanao, lalo na dito sa amin sa Pagadian ang magagandang tanawin at world-class tourist destination.,” wika ni Co.