Mas bigatin si Spence kaya pinili ni Pacman

ni Gerard Peter - @Sports | July 13, 2021

Sa edad na 42 ay target pa rin ang mga bigating kalaban ng 8th Division World champion na si Manny “Pacman” Pacquiao tulad nang pinili niyang makatapat na si unified IBF/WBC welterweight titlist Errol Spence, Jr. para sa unification bout sa Agosto 21 sa T-Mobile Arena sa Las Vegas, Nevada.

Pormal na nagkaharap sina Pacquiao (62-7-2, 39KOs) at Spence (27-0, 21KOs) sa kauna-unahang press conference kahapon para sa FOX pay-per-view. Nagpakita pareho ng ‘mutual respect’ na bukod sa 2 titulo ng 31-anyos na unbeaten American na nakataya ay pag-aagawan din ang bakanteng The Ring 147-pound title.

“There was a lot of opportunity to pick a — not easy fight, but a much easier fight compared to Errol Spence,” paliwanag ni Pacquiao. “But I decided to pick Errol Spence because I want to give a good fight to the fans, I want a real fight. I’m a fighter and boxing is my passion.”

Dalawang taon na natengga sa laban ang Filipino boxing legend at future Hall of Famer mula noong Hulyo 2019 nang makuha ang WBA (Super World) 147-lbs title laban kay Keith “One Time: Thurman. “It’s one of the biggest challenges in my career,” pahayag ni Pacman. “I cannot say the biggest challenge because I have been fighting the best fighters in the world — Keith Thurman, De La Hoya, Miguel Cotto, a lot of those fighters. But one of the best, I can rate (Spence).”

Aminado naman ang 2012 London Olympics quarterfinalists na si Spence na mahirap patumbahin ang Filipino boxing icon na minsan lang napatumba ni Juan Manuel Marquez sa 6th round noong 2012.

“I definitely have the ability to finish him, but for me it’s about winning the fight,” wika ni Spence. “It’s to stay focused and win the fight. When you go out there and rush it and try to go for the knockout, I feel like from my experience, even in the amateurs, you look sloppy and something goes wrong. You look like you’re trying too hard. For me it’s to go have my fight at my pace. If the knockout comes, go for it. If not, go for the victory.”

Pagadian at Roxas, nagpalakas agad sa CTG VisMin Super Cup

ni Gerard Peter - @Sports | July 09, 2021

Isang makapigil-hiningang pagtatapos ang ipinamalas ng parehong Pagadian Explorers at Roxas Vanguards sa ikalawang araw ng kompetisyon sa pagbubukas ng Mindanao division ng Chooks-to-Go Pilipinas VisMin Super Cup na nagtapos sa 82-80 pabor sa Explorers sa overtime game sa Ipil Provincial Gym sa Ipil Heights, Zamboanga Sibugay.

Isinalpak ni Von Lloyd Dechos ang isang napakalaking tres sa 25.50 segundo ng overtime upang ibigay sa Explorers ang unang panalo sa liga at iunsyami ang unang panalo ni dating PBA forward Eddie Laure na nagtitimon sa Vanguards.

May ilang pagkakataon ang Roxas na maitabla o makuha ang kalamangan mula sa 3-pt shot ni James Castro sa 8segundo at 2-pt shot ni Chito Jaime sa buzzer-beater shot, ngunit parehong pumalya.

Ito lamang ang ikalawang pagkakataon na nagkaroon ng overtime game simula ng makamit ng Dumaguete Warriors ang panalo kontra sa Tabogon Voyagers, 67-65 sa step -ladder playoffs na napagwagian ng Warriors sa Visayas leg.

Limang manlalaro ang kumamada ng double-digits para sa Explorers sa pangunguna nina John Edros Quimado at Kean Caballero na parehong nagtapos ng tig-12 puntos, habang nagbuslo ng tig-10 puntos sina Dechos, Christian Manalo, at Rich Guinitaran.

Nabalewala naman ang double-double scoring at rebounding nina dating NCAA MVP at PBA pro na si Leo Najorda na may 15pts at 11 rebounds, at Ernesto Bondoc Jr sa 15 pts at 13 rebs, 3 assts at 2 steals.

Nasayang ang pagkakataon na madala ni Manalo ang panalo sa 4th quarter ng magmintis ito sa ikalawang freethrow sa nalalabing 41.80 seconds. Parehong nabigo ang dalawang panig na maiselyo ang panalo.

Sunod na lalabanan ng Explorers ang Zamboanga City sa Martes sa first game sa ala-1:00 ng hapaon habang susubukang makabawi ng Vanguards sa darating na Linggo kontra sa Clarin Sto Nino sa 3pm game.

Samantala, binuhat ni dating Blackwater Bossing guard Renz Palma ang Kapatagan Buffalo Braves para makuha ang bwena-manong panalo kontra Iligan City Archangels, 64-56, Miyerkules ng gabi.

Pagbalasa sa larong Hockey pinalagan sa TOPS

ni Gerard Peter - @Sports | July 09, 2021

Hindi matanggap ng mga dating national team members at opisyal ng Larong Hockey sa Pilipinas (LHP) na mawawala sa kanila ang pampalakasan na minahal at pinagbuhusan ng atensyon nang mapalitan ang mga ito.

Naglabas ng sama ng loob ang mga dating national athletes na sina Denizelle Ann Rasing at Marvin Lianza, higit na si dating secretary-general ng LHP na si Jing Arroyo matapos ang umano'y ginawang hakbang ng kasalukuyang nakaupo sa puwesto na si Peping Cojuangco Jr., na sila’y palitan sa hindi maipaliwanag na kadahilanan.

“Early this month tinanggal nila ang mga players. Sila na ang nagsakripisyo at naghirap, suddenly naglagay ng players at head coach na hindi naman certified. They put new ones,” wika ni Arroyo, kahapon ng umaga sa lingguhang TOPS Usapang Sports on Air. “Ang kinakasama ng loob namin, nag-medal sa 2019 SEAG, walang formality, at pinost lang sa facebook page. Kung sino-sino na lang ang inilagay nila, parang mga anak ng kumpare, nag-jogging lang, kinuha na as national team member at balita namin ay nakakatanggap na ng allowance,” dagdag ni Arroyo. Sinubukang hingin ng Bulgar Sports ang panig ng LHP, mula sa bagong secretary-general nitong si dating Philippine Canoe Kayak-Dragon Boat Federation head Joanne Go, ngunit tumangging magbigay ng salaysay hinggil sa isyu.

Nagwagi ng bronze medal noong 2019 SEA Games ang women’s team kasama ang 22-anyos na si Rasing. “Gusto naming makabalik, kase naghirap na kami. As a team, ang dami na naming challenges and we deserve to stay dahil malaking part na ito sa amin. Gusto naming irepresent ang bansa, which is our goal is to win more medals for the country. Mahirap bitawan ang isang sport na naging part ka ng foundation,” paliwanag ni Rasing, na minsang naglaro sa NCAA women’s volleyball sa koponan ng Aguinaldo College.

“May pinasa na yung NSA nila last January pa na line up and effective na ang allowances nila last February pa which they requested,” wika ni PSC Executive Director Atty. Guillermo Iroy hinggil sa isinumiteng listahan ng LHP ng mga national team members noon pang Enero at may monthly allowance nang P10,000 sa panayam ng Bulgar Sports sa telepono.