Talino sa programa ng Rugby haharaping Challenge ni Milby

ni Gerard Peter - @Sports | April 30, 2021

Masusubok ang talino sa paggawa ng programa sa sport na Rugby sa buong mundo si Philippine Rugby Union President Ada Milby sa pagtakbo nito bilang miyembro ng Executive Committee ng World Rugby Federation sa Mayo 12.

Makakatapat ng 37-anyos na US Army staff sergeant sina Cristina Flores ng Rugby Americas North at Jonathan Webb ng Rugby Football Union ng Europa para sa bakanteng puwestong iniwan ni Gareth Davies.

Sakaling palarin ang Filipino-American at dating rugby player, palalakasin niya pagpapalawak ng sports sa Asya, higit na sa Pilipinas, na bansang hindi tradisyonal na naglalaro ng Rugby sports, ngunit malaki ang potensyal na kinakailangan lamang ng tamang gabay at exposure para mas lalo pang umangat sa buong mundo. “We know that in order to continue growing and developing world wide, we really need to have a focus effort in Asia, which means focusing on countries that are not traditionally rugby nation, countries like Philippines and India, China, Mongolia and all this nations that have huge populations and we have a great opportunity to grow the game through this population that been exposed to the sport yet so my priorities will be,” pahayag ni Milby, Huwebes ng umaga sa lingguhang TOPS: Usapang Sports live via zoom online.

Nais din ni Milby na madagdagan ng babaeng kinatawan sa World Rugby Executive Committee, kung saan tanging nag-iisang babae lamang ang naka-upo at kasalukuyang may 10 lalaki ang namumuno. “It’s really an exciting time. I am one of two female candidates that standing for the first time in the history of the organization of the international federation. And if I’m successful in my bid, I would be the first female elected to the position and I will be the first representative for Asia, male or female to hold the position,” paliwanag ni Milby. “It’s really a tight race for the moment, there are 3 of us in total running, and we’re a vying for the same position, to make sure that we’re strategically guide the global game of rugby which of course include racing a profile in the Philippines.”

Petsa ng PBA opening lilinawin na para sa fans

ni Gerard Peter - @Sports | April 29, 2021

Maaaring magkaroon na ng kalinawan sa mga darating na araw kung kailan pormal na bubuksan ang pinaka-aabangan at pinakananabikang 46th season ng Philippine Basketball Association (PBA).

Dahil ito sa kabi-kabilang mga kahilingan ng fans ng 12 koponan, na nais nang mapanood muli ang mga iniidolong manlalaro at coaches sa kauna-unahang professional league sa Asya.

Magdedepende pa rin sa magiging desisyon at napag-uusapan sa pagitan nina PBA commissioner Willie Marcial, kasama si San Miguel Corporation (SMC) sports director at Baranggay Ginebra Board Governor at Team Manager Al Francis Chua kina Executive Secretary Salvador Midialdea at Senator Christopher “Bong” Go, kahapon ng hapon sa Malacanang hinggil sa magiging plano at estado sa muling pagbabalik aksyon ng liga ng Filipino basketball superstars.

“Yung mga pinag-aaralan namin, siguro after ng usapan namin sa Malacanang siguro after 1 or 2 days may kaunting liwanag na saan ang direksyon natin,” pahayag ni Martes ng umaga sa weekly PSA Forum webcast

Ikinuwento ng 59-anyos na Batangas-native ang patuloy na pangungulit at pagtatanong ng mga tagahanga kung kailan magbubukas ang PBA. “Nangungulit na yung mga fans kung kailan magsisimula kung papaano na, kung matutuloy ang PBA. May tumawag sa direct line ko, nagtatanong kung kailan mag-start ang PBA, gaya rin nu'ng isang araw may nakausap akong fans, pareho rin ang tinatanong, sinagot ko na lang na ginagawa at minamadali na namin ang lahat ng paraan kung papaano,” kwento ni Marcial “May isa ring lumapit sa akin ang sabi niya namimiss ko na at nakakatanggal ng mental health (problem), sagot ko, sige po kaya, minamadali rin namin, ginagawa natin ang paraan,” wika ng dating statistician ng PBA.

Sinabi ni Marcial na hindi nila inaalis ang opsyong ilagay muli sa isang ‘bubble’ ang mga laro gaya ng ginawa sa matagumpay na Angeles University Foundation Sports Arena and Cultural Center sa Clark, Pampanga. Patuloy pa rin itong nakikipag-usap sa gobernador ng Ilocos Norte at Mayor Jun-Jun Ynares ng Antipolo, Rizal sakaling ganapin sa kani-kanilang lugar ang ‘PBA bubble.’

Wilson, pambato ng Ozamiz sa Mindanao Division ng Super Cup

ni Gerard Peter - @Sports | April 28, 2021

Sasabak na rin ang premyado at beteranong shooting guard na si John Wilson upang pangunahan ang bagong koponan na Ozamiz Cotto sa Mindanao division ng Chooks-to-Go Pilipinas Vis-Min Super Cup na sisimulan sa Mayo 25.

Ang 34-anyos na journeyman na hinirang na MVP r ng 2019 Lakan Cup season ng Maharlika Pilipinas Basketball League (MPBL) at 7th pick ng Barangay Ginebra Gin Kings noong 2010 sa PBA ay magpapamalas ng kahusayan at leadership sa Super Cup kasunod ng runner-up finish ng koponang Go-for-Gold San Juan Knights laban sa Davao Occidental Tigers sa Lakan Cup.

Rumerehistro ng 19.3 puntos, 6.5 rebounds, 2.5 assists at 2,4 steals ang Datu Cup champion sa 41 laro sa semi-professional commercial league.

Makakasama ng dating JRU Heavy Bombers standout sa Ozamiz sina dating San Sebastian College playmaker at PBA, ABL, MPBL veteran na si Pamboy, Raymundo, Columbian Dyip at Manila Stars shooting guard Carlo Lastimosa, dating PBA at Sarangani Marlins player Marvin Hayes, at Fil-Nigerian at Hong Kong Eastern forward Joseph Eriobu.

Kabilang din sa koponan sina Jayvee Marcelino, Monching Talisayon, Jaie Berdan, Jay-ar Pagente, Kris Lucernas, Jay-r Jalem, MJ Casanova, Rey De Mesa, VJ Santos, Chris Santos, at Brent Palattao.

Sa pangangasiwa nina team owner Monching Talisayon at Wesley Sun, ang head coach ay si Miguel Borilla Jr. kasama ang coaching staff na sina Donald Ronquillo, Mark Joseph Casanova, Ian Dungca, at Aldo Panlilio.

Makakasalpukan ng Ozamiz sa Mindanao division ang Basilan Peace Riders, Cagayan De Oro Rafters, Zamboanga Los Valientes, Pagadian Explorers, Roxas Vanguards, Sindagan Saints, Tawi-Tawi; Valencia City at Bukidnon.