Fencer Catantan asam ang kuwalipikasyon sa Olympics

ni Gerard Arce @Sports | April 17, 2024

Sentro ng atensyon ng Philippine national fencing team ang magawang makapagkuwalipika sa 2024 Paris Olympics na ibabandera ni dating Southeast Asian Games champion at Penn State University captain Samantha Catantan para sa darating na Asia-Oceania Olympic Qualification Tournament simula Abril 27-28 sa Zayed Sports Complex sa Fujairah, United Arab Emirates.  

Tutusok sa ikalawang pagkakataon ang 22-anyos na Pinay fencer na minsang sumubok na makapasok sa 2020+1 Tokyo Olympics, subalit bahagyang kinapos ng makuha ng mahigpit na karibal nito sa Timog Silangang Asya na si Amita Berthier ng Singapore ang isang silya sa Olympiad para sa Asian spot.

Makakasamang susubok ng 31st Hanoi SEAG meet ang mga dating kakampi sa University of the East na sina Nathaniel Perez ng men’s foil at Hanniel Abella ng women’s epee, habang lalaban rin para makapasok sa Summer Olympic Games si Noelito Jose sa men’s epee.

Itinuturing na No.1 foil fencer ng bansa si Catantann a kasalukuyang kumukuha ng kursong Accountancy sa Penn State Nittany Lions, kung saan hindi masyadong pinalad ito sa nagdaang US National Collegiate Athletic Association (NCAA) Fencing Tournament na ginanap nung Marso 22 sa French Field House sa Columbus, Ohio, kung saan tunapos lamang ito sa ika-10th place sa paboritong event kontra sa 24 fencers.

Mabigat ang kakaharaping pagsubok ng dating UAAP juniors MVP dahil kinakailangan nitong magwagi ng ginto sa naturang kategorya matapos pumalyang makapaglaro sa mga nagdaang kwalipikasyon dulot ng tinamong injuries.

Nitong nagdaang 2023 biennial meet na ginanap sa Phnom Penh, Cambodia, nagawang tumapos ni Catantan ng runner-up finish matapos hindi na magawang makalaban pa sa finals kontra kay Maxine Wong ng Singapore dulot ng injury.  

Suarez nagwagi sa UD, unbeaten sa Jr. L'Weight

ni Gerard Arce @Sports | April 16, 2024

Matagumpay  na sinuntok ni 2016 Rio Olympian Charly “The King’s Warrior” Suarez ang kanyang ika-17 panalo upang manatiling unbeaten at mas lalo pang palakasin ang tsansa sa World title matapos higitan si American Luis Coria sa 8th-round unanimous decision ng super-featherweight bout, Linggo ng umaga (oras sa Pilipinas) sa American Bank Center, Corpus Cristi, Texas sa Amerika.

Pinaboran ng tatlong hurado ang three-time Southeast Asian Games champion at 2014 Incheon Asian Games silver medalist nang panigan ito sa iskor na 77-74, 77-74 at 76-75 para sa kanyang ikalawang sabak sa Amerika. Nakatakda sanang makaharap ni Suarez si dating World Boxing Organization (WBO) Latino super-featherweight titlist Henry “Moncho” Lebron ng Puerto Rico, ngunit umatras ito dalawang linggo bago ang laban para sa Top Rank promoted card na pagbibidahan ng pagbabalik ni heavyweight prospect Jared Anderson kontra kay Ryad Merhy.

Naging agresibo sa kabuuang laban si Suarez (17-0, 9KOs) nang mahigitan sa bawat pagkakataon ang American boxer mula sa mga mahuhusay na kontra-atake ng Pinoy boxer sa kanyang ulo at katawang kombinasyon. Sa kagustuhan namang makahabol sa laban ay sinikap ni Coria na magpaulan ng mas maraming banat dahilan upang matiyempuhan si Suarez sa panga upang makaiskor ng knockdown. Gayunman, hindi sapat ang nakuhang knockdown sa 8th round upang mabaligtad pa ang desisyon ng mga hurado.

Pagdating sa preparasyon ay nakahanap ang  35-anyos na tubong San Isidro sa Davao del Norte ng mga pamalit na orthodox boxer  mula sa kaliweteng boxer na si Lebron sa Top Rank Boxing Gym sa Las Vegas, Nevada, kung saan ilang buwan na itong nagsasanay na inaalalayan ng pinsan at dating Olympian na si Mark Anthony Barriga.        

CSB Lady blazers, pinaliyab ang JRU Bombers sa women's volley

ni Gerard Arce @Sports | April 15, 2024

Mga laro bukas (Martes)

(Filoil EcoOil Arena)

7:30 a.m.- LPU vs AU (men)

10 a.m.- LPU vs AU (women)

2 p.m.- Letran vs EAC (women)

4 p.m.- Letran vs EAC (men)

Pinaliyab ng College of St. Benilde Lady Blazers ang koponan ng Jose Rizal University sa iskor na 25-13, 25-12, 25-20, kahapon upang kunin ang solong liderato at pahabain ang winning streak sa 32 sunod sa 99th season ng  NCAA Season 99 women’s volleyball Filoil EcoOil Arena sa San Juan City.

Nailista ng Lady Blazers ang ikatlong sunod na panalo ngayong season na nabalasa ng husto ang mga manlalaro para walang tumapos ng doble pigura na pinagbidahan nina middle blocker Michelle Gamit at spiker Wielyn Estoque na may tig-walong puntos.

Lahat ng manlalaro ng CSB ay nakapagtala ng iskor bukod lamang sa kanilang kapitan na si Jessa Dorog at dalawang liberos.

Nagpatuloy ang magandang panalo mg CSB na hanap ang ikatlong sunod na kampeonato matapos walisin ang dalawang nagdaang season, habang may naputol ang kumpetisyon dahil sa COVID-19 pandemic.

Gayunman, ayaw magpakampante ni coach Jerry Yee sa mga nakukuha nilang winning streak at mga panalo dahil pangunahing puntirya pa rin ang makuha ang kanilang layunin.

“We try not to mind those, we don’t even count,” wika ni Yee, na sinabing may binabantayan nito ang mas ikauunlad pa ng koponan. “Kulang pa sa execution, dami pa kulang, dami pa aayusin. Hopefully, maayos naman.”

Inihahanda na ni Yee ang mga susunod sa yapak ng mga beteranong manlalarong parte ng starting lineup na aalis ng koponan na kinabibipangan nina Jade Gentapa, Cloanne Mondonedo, Michelle Gamit and Gayle Pascual. “Meron na naman apat na aalis and we try to train yung mga papasok a year ahead to prepare,” ani Yee.