NU nadale sa straight sets ng China sa ASWVC Prelims

ni GA @Sports | September 2, 2023

Tuluyang nalaglag sa preliminaries ang Philippine Team-National University Lady Bulldogs matapos walisin ng multi-time champion na China sa bisa ng straight set 15-25, 20-25, 17-25 para sa ikalawang sunod na pagkatalo noong Huwebes ng gabi sa 22nd Asian Seniors Women’s Volleyball Championships sa Chartchai Hall of The Mall sa Nakhon Ratchasima sa Thailand.

Hindi umubra ang mga banat ni international Best Opposite spiker Alyssa Solomon sa mga nagtatangkarang manlalaro ng Chinese squad matapos mahirapang mapigilan ng Philippine national squad na binubuo ng karamihan sa NU Lady Bulldogs ang mga atake ng Chinese volleybelles na pinangunahan ni Wu Mengjie, habang palyado rin sa mga atake ang national squad dahil sa matitinding butata na inaabot sa mahahabang galamay ng Chinese blockers.

Naging madali para sa China na tapusin ang first set, subalit pilit na nakipagsabayan ang NU-Phils sa second set nang madala pa nila 16-16 ang laro. Gayunpaman, nahirapan pa ring maiahon ng 6-foot-1 na best opposite hitter ng 2023 Southeast Asian Women’s V-League ang koponan upang muling bumagsak sa second set.

Patuloy na naramdaman ng Pilipinas ang hagupit na atake ng China nang magpakawala ito ng 16 puntos mula sa atake kumpara sa 10 lang ng NU-laden squad, habang mas marami itong errors sa lima laban sa tatlo ng China at muling nakalamang sa blocking department sa 4-3.

Nabulilyaso sa opening game ng national squad ang panalo kontra Kazakhstan ng madale sila ng come-from-behind pagkatalo sa 25-21, 17-25, 24-26, 27-25, 15-6 nitong Miyerkules ng gabi para mabalewala ang 30 puntos na ginawa ni Evangeline Alinsug mula sa 28 atake at tig-isang ace at block, habang may 20 puntos si Mhicaela Belen at 14pts si Solomon.

Lady Bulldogs nabigo sa Kazakhstan sa ASWVC

ni GA @Sports | September 1, 2023

Nabulilyaso ang inaasam na unang panalo ng National University Lady Bulldogs-Philippine team na pinagbibidahan ni Mhicaela “Bella” Belen matapos ihambalos ng Kazakhstan ang isang come-from-behind panalo sa 25-21, 17-25, 24-26, 27-25, 15-6, Miyerkules ng gabi sa 22nd Asian Seniors Women’s Volleyball Championships sa Chartchai Hall of The Mall sa Nakhon Ratchasima sa Thailand.

Nahirapang makabangon ng national squad pagtuntong ng 5th set matapos maunahan ito sa 1-6 kalamangan kasunod ng magandang depensa at opensiba ng Kazakhs nationals upang malasap ang unang pagkatalo sa Pool D.

Nahirapang buhatin ng dating University Athletic Association of the Philippines (UAAP) Rookie/MVP na si Belen na tumapos ng 20 puntos mula sa 18 atake at dalawang blocks, habang nanguna sa scoring si Vangie Alinsug na may 30 puntos mula sa 28 atake at tig-isang ace at block na nasayang ang 2-1 na kalamangang sets.

Nag-ambag din si Alyssa Solomon ng 14pts sa 10 atake at apat na service ace, gayundin ang 5 puntos ni Minierva Maaya at 3 puntos na ambag ni Adamson University Lady Falcons Lorene Toring.

Apat na mahahalagang puntos ang magkakasunod na itinala ng Kazakhstan mula sa 18-16 na bentahe ng Pilipinas ay inagaw ito sa 18-20 kasunod kasunod ng magagandang atake at depensa na sinabayan ng error ng national squad.

Pilit na inahon ni Belen ang NU-led sa matinding atake para sa 19-20, subalit magkasunod na mahuhusay na atake ang ibinaon ng Kazakhs para sa 19-22. Muling naka-iskor si Belen sa 20-22, subalit nahirapan ng makabangon sa kalamangan ng Kazakhs para sa 21-25.

Apat na sunod na atake naman ang inihambalos ng dating University Athletic Association of the Philippines (UAAP) Rookie/MVP na si Belen sa huling bahagi ng second set.

Pacman lumapit sa POC, gustong mag-Olympics

ni GA @Sports | August 31, 2023

Mukhang tutuparin ni 8th-division World champion na si Manny “Pacman” Pacquiao ang pangarap na makasabak sa Summer Olympic Games matapos sumangguni kay Philippine Olympic Committee (POC) president Mayor Abraham “Bambol” Tolentino patungkol sa posibilidad na sumabak sa 2024 Paris Games.

Inilahad ni Tolentino ang naging pag-uusap nila ng Filipino boxing legend at nakipag-ugnayan na umano ang Tagaytay City chief sa Association of Boxing Alliances in the Philippines (ABAP) at the International Olympic Committee (IOC). “Senator Pacquiao’s camp reached out saying our Filipino ring idol wants to fight in Paris,” wika ni Tolentino. “But the Senator can no longer vie for qualification in the Asian Games in Hangzhou next month.”

Ayon sa alituntunin ng Asian Games, na isa rin sa mga gagawing Olympic Qualifying Tournament, nililimitahan sa 40-anyos ang lahat ng atleta sa naturang palaro, subalit maaari pang makuwalipika si Pacman sa Paris sa dalawang nalalabing Olympic Qualifying na gaganapin sa first at 2nd quarter ng 2024.

Ani Tolenitno, posibleng idaan sa ‘Universality Rule’ ang estado ni Pacquiao ayon sa IOC. Ngunit tanging siyam na posisyon lang ang nakasaad ayon sa Universality Rule, at ito ang lima para sa babae at apat sa mga lalaki.

Si Pacquiao umano ay nakahanda nang lumaban sa Olympics pero isasalang siya sa national team qualification. Tumitimbang si Pacman ng 66kgs na maaaring piliin ang 63.5kgs o 71kgs sa Paris boxing program, kung saan pinapayagan ng sumabak ang mga professional boxers sa Olympics tulad ni Eumir Felix Marcial.

Matatandaang muntik sumabak si Pacman noong 2016 Rio Games, pero nagwagi bilang Senador ng bansa. Hawak na rin noon ni Pacquiao ang titulo ng WBO International welterweight title at sumunod ang WBO 147-lbs belt. Tatlong professional boxers ang sumabak sa Rio Games na sina Hassan N’Dam N’Jikam ng Cameroon sa Light-Heavyweight; lightweight Carmine Tommasone ng Italy; at Amnat Ruenroeng ng Thailand sa 132-lbs (60kgs) division – lahat ng mga ito ay pawang natalo sa quadrennial meet.