Brownlee at 6 pa sa Gilas kasama sa sasabak sa ASIAD

ni Clyde Mariano / GA @Sports | September 6, 2023

Pitong manlalaro mula sa katatapos lang na 2023 FIBA World Cup ang kabilang sa listahan ng mga manlalarong isinumite ng Philippine Olympic Committee (POC) para sa 19th Asian Games sa Hangzhou, China habang kabilang ang dalawang naturalized players na sina Ange Kouame at Justin Brownlee.

Inilabas ni POC President Abraham 'Bambol' Tolentino ang pinal na listahan ng mga atleta para sa 39 sports na isasabak sa Asiad meet na nakatakdang simulan sa Set. 23 hanggang Oktubre 8.

Gayunpaman, inanunsiyo ng Philippine Basketball Association (PBA) na magkakaroon ng pinal na listahan at coaching staff nito sa Huwebes, kasunod na rin ng resignasyon ni coach Chot Reyes at pagtanggi ni Brgy. Ginebra coach Tim Cone na humalili sa bakanteng pwesto. “The deadline for the Entry by Names [EBN] was last July 25 and whatever list a national Olympic committee submitted is deemed official,” pahayag ni Tolentino, na sinabing isasangguni pa sa Hangzhou Asian Games Organizing Committee ang mga gagawing pagbabago sa kanilang line-up.

Pareho namang maaaring ilagay sina Kouame at Brownlee sa listahan dahil parehong pinapayagan ng Asian Games ang mga ito sa kadahilanang may lehitimong Philippine Passport na tinataglay.

Dito tinitingnan ngayon kung maaaring maisama ang ibang Filipino-Foreign players na hindi kuwalipikado sa mahigpit na FIBA rules tulad nina Ginebra forward Christian Standhardinger at TT scorer Mikey Williams.

Parte rin ng koponan ang mga World Cup veterans na sina veterans Kiefer Ravena, Scottie Thompson, Roger Pogoy, June Mar Fajardo, CJ Perez, Japeth Aguilar at Jamie Malonzo na ipinasa ng Samahang Basketbol ng Pilipinas (SBP), maging sina Chris Newsome, Calvin Oftana, at Brandon Ganuelas-Rosser.

Hindi naman kasama sa pinal na listahan ng Asian Games sina Filipino Asian-imports Dwight Ramos, Rhenz Abando, Kai Sotto, AJ Edu at naturalized player Jordan Clarkson.

Phl Women's Volley Team, baba pa sa 76th place ng FIVB

ni GA @Sports | September 5, 2023

Lalo pang lumala ang puwestuhan ng Philippine women’s volleyball team International Volleyball Confederation (FIVB) women's World rankings matapos masadsad sa ika-apat na sunod na pagkatalo kontra Iran nitong Linggo ng gabi sa pamamagitan ng 25-22, 22-25, 21-25, 26-24, 12-15 upang lumaban para lamang sa ika-13th place ng classification round ng 22nd Asian Seniors Women’s Volleyball Championships sa Chartchai Hall of The Mall sa Nakhon Ratchasima sa Thailand.

Nalasap ng bansa ang pagbaba lalo ng puwesto nito sa FIVB women's World rankings mula sa malaking pagtalon galing sa 63rd place patungong 72nd ay lalo pang sumadsad ito sa 76th place matapos mahirapang maiahon ng malaking grupo ng National University Lady Bulldogs na pinagbidahan ni Alyssa Solomon na tumapos ng 19 pts mula sa 16 atake, dalawang blocks at isang ace, habang sumegunda si Mhicaela Belen sa 14pts mula lahat sa atake at Vange Alinsug na tumapos ng 11pts galing sa 10 kills at isang ace.

Nanatiling bokya sa panalo ang Philippine-NU squad sa nagdaang apat na laro kasunod ng pagbagsak sa group classification nang ma-olats sa Pool D kontra sa Kazakhstan, China at Hong Kong sa ligang inorganisa ng Asian Volleyball Confederation (AVC) katulong ang Thailand Volleyball Association.

Matapos makuha ang unang panalo sa first set ay mas tumindi ang laro ng World no.67 upang masungkit ang set 2 at 3, subalit kinailangang lumaban ng 'Pinas-NU squad upang maitulak ang deciding set kasunod ng 6-1 run mula sa 20-23 iskor pabor sa Iran.Nanatiling dikitan ang laban pagdating ng fifth set, kung saan nagawang makalamang ng 'Pinas. Subalit hindi pa rin pumabor ang tadhana para sa bansa upang lumagpak sa 0-4 kartada sa kabuuan ng liga at lumaban para sa 13th place kontra Uzbekistan ngayong Martes ng 9 a.m.

Ravena pambanat ng NXLeD sa PVL All-Filipino

ni GA @Sports | September 4, 2023

Handang-handa nang saluhin ni libero Dani Ravena ang mga atake at hambalos ng mga makakatunggali ng bagong sibol na koponang NXLed Chameleons na naghahandang maigi para sa paglahok sa panibagong kumperensya ng Premier Volleyball League (PVL) na All-Filipino Conference na sisimulan sa darating na Oktubre.

Ang Chameleons ang ikalawang koponan na pag-aari ng Carlson Group of Companies matapos buuin nito ang Akari Chargers, na inaasahang pagkukunan din ng mga manlalaro patungo sa bagong koponan, kung saan galing rin mismo si Ravena.

“Bringing that fighting spirit to Nxled! Our first Chameleon is none other than fiery libero, Dani Ravena! Whatever it takes, wherever she goes, the former team captain of the Lady Eagles will give her 110% to win,” ayon sa kanilang Instagram account.

Wala pang pinal na listahan ng coaching staff ng koponan na sasalang sa unang pagkakataon bilang ika-10th koponan matapos mapabalitang magpapahinga muna ang Gerflor Defenders at Foton Tornadoes sa liga.

Matatandaang naging kauna-unahang liberong kapitana sa kasaysayan ng University Athletic Association of the Philippines (UAAP) ang 5-foot-5 na dating Ateneo Lady Blue Eagles, kung saan naging minsan na itong naging parte ng Ateneo-Motolite team na nakakuha ng second place sa 2018 Open Conference ng PVL.

Sunod na ipikilala si dating University of Santo Tomas Golden Tigresses at Akari spiker at middle blocker Camille Victoria bilang parte ng bagong koponan.