Best Libero Cruz, hindi na maglalaro sa PVL Angels

ni GA @Sports | September 15, 2023

Nagpaalam sa koponan ng Petro Gazz Angels si 2018 professional league Best Libero Cienne Mary Arielle Cruz upang tahakin ang panibagong landas sa labas ng volleyball matapos ang anunsiyo sa social media nitong Martes.

Nagpasamalamt ang pamunuan ng Petro Gazz sa kanilang opisyal na Instagram account sa matagal na pananatili at paglalaro ng 28-anyos na dating De La Salle University Lady Spiker, upang maging pangunahing floor defender ng koponan, kung saan nakapag-ambag ito sa pagkapanalo ng dalawang kampeonato sa 2019 at 2022 Reinforced Conference sa Premier Volleyball League (PVL), gayundin ang tatlong runner-up at isang third place trophy.

“This is not goodbye, just farewell for now. It has been great working with you over these past few years as part of this team. We wish you all the very best in what’s next,” ayon sa inilabas na statement ng koponan.

Mahigit limang taong nagsilbi ang 5-foot-5 floor defender sa Petro Gazz na kamakailan lang ay na-engage na sa kanyang kasintahan na si American Peter Guenther. Naglabas na rin ito ng kanyang pahayag sa kanyang Instagram account na binigyang halaga ang paglalaro ng volleyball, anuman ang maging resulta ay patuloy na lumalaban, na isa sa mga naging batayan upang hubugin kung ano man ang kasalukuyang tinatamasa.

Hatton, isinisi kay Floyd, Sr. ang pagkatalo kay Pacman

ni GA @Sports | September 14, 2023

Hindi naiwasang maglabas ng sama ng loob si dating World champion Ricky “The Hitman” Hatton patungkol sa kanyang dating head trainer na si Floyd Mayweather Sr. matapos akusahan nitong nagkamali sa pagbibigay ng tamang paghahanda kontra kay Filipino boxing legend Manny “Pacman” Pacquiao na nauwi sa mabilis na second round knockout noong 2009.

Masama ang loob ng 44-anyos mula Stockport, Greater Manchester, England ng hindi umano umangkop ang ibinigay na training ni Mayweather Sr. dahil mas lalo itong nalubog sa hukay, kung saan inilahad niyang pinatumba siya ng kanyang sparring partner.

“It seems to me that Floyd Sr. just drove me into the ground then with his training. Eight weeks before the fight, I felt fantastic, but he drilled me and drilled me, round after round after round,” pahayag ni Hatton sa SunSport. “Then two or three weeks before the fight my sparring partner, one of them knocked me on my a**. I thought, this ain’t right.”

Nadagdagan pa umano ang sama ng loob nito ng hindi man lang siya inihanda nito sa isang southpaw boxer na kinakailangan niyang mapag-aralan dahil sa stance na mayroon si Pacquiao. Maging sa pagtuntong niya ng Las Vegas, para sa kanilang laban sa MGM Grand Garden Arena noong Mayo 2, walang ginawang hakbang si Mayweather Sr. upang sumuntok ito sa kaliwang posisyon.

Tinapik nito si Mayweather Sr. upang palitan ang dating coach na si Billy Graham matapos mabigo sa anak nitong si “The Money” Floyd Mayweather Jr. noong 2007. Nasundan ito ng dalawang panalo laban kina Juan Lozcano at Paulie Malignaggi para sa IBO at The Ring welterweight titles, subalit mas paniguradong mararamdaman nito ang matinding pagsubok laban kay Pacman na nasa 30-anyos pa lamang.

Daraan sa butas ng karayom ang Gilas para sa Olympics

ni GA @Sports | September 13, 2023

Matinding butas ng karayom ang pagdaraanan ng Gilas Pilipinas para sa nalalabing apat na pwesto para sa 2024 Paris Olympics men’s basketball tournament.

Kinumpirma ng International Basketball Association (FIBA) na mayroong nalalabing 19 national squad na naglaro sa nakalipas na 2023 FIBA World Cup sa Indonesia, Japan at Pilipinas na magsisilbing huling biyahe patungo sa tsansang makakuha ng isang slot sa qualifying tournament sa Paris Olympics sa susunod na Summer.

Inihayag ng international federation ang mga koponan mula Europa na Latvia, Lithuania, Slovenia, Italy, Montenegro, Greece, Georgia, Finland at dating World champions Spain na maaring umabante sa qualifying tournament.

Nakalinya naman para sa Americas region ang Puerto Rico, Brazil, Dominican Republic at Mexico, habang kasama ng Egypt, Angola at Ivory Coast ang mula sa Africa, and para naman sa Asia at Oceania ang mga koponan mula Lebanon, New Zealand at Pilipinas.

Kabilang rin sa mga bansang nabanggit ang iba pang koponan sa pre-qualifying tournament winners na Cameroon, Bahamas, Bahrain, Poland at Croatia na maghahangad na makasungkit ng isang pwesto sa inaasam na Summer Olympic Games.

Gaganapin ang Olympic Qualifying sa Hulyo 2-7, 2024, kung saan patuloy na inaalam ang magiging host country na idinaraan pa sa bidding.

Ang nalalabing 24 na bansa ay bubunutin sa isa sa apat na torneo na binubuo ng tig-anim na koponan kada kompetisyon. Ang apat na mananalo sa isasagawang torneo ang makakausad sa Paris Olympics, para samahan ang runner-up Serbia, France, Canada, Estados Unidos, Australia, Japan, South Sudan at World Cup champion Germany sa Olympic field.

Aalamin pa ang pinal na listahan ng Gilas Pilipinas squad sa naturang kumpetisyon na manggagaling sa Samahang Basketbol ng Pilipinas, kung saan inaasahang panibagong head coach ang tatayo rito matapos isantabi ni coach Chot Reyes ang desisyong hawakan ang national team.