F2 Cargo at Speed Hitters, ambilis ng delivery at signal

ni GA @Sports | November 10, 2023

Mga laro sa Sabado

(Philsports Arena)

2 n.h. – Cignal vs Petro Gazz

4 n.h. – Akari vs Choco Mucho

6 n.g. – PLDT vs Chery Tiggo

Naging madali ang nakuhang mga panalo ng parehong F2 Logistics Cargo Movers at PLDT High Speed Hitters nang kapwa walisin ang Quezon City Gerflor Defenders 25-10, 25-16, 25-14 at Galeries Tower High Risers sa 29-27, 25-14, 25-18 sa magkasunod na mga laro ng nakalinyang quadruple-header kahapon sa 6th Premier Volleyball League (PVL) second All-Filipino Conference sa Philsports Arena sa Pasig City.

Sinandalan ng Cargo Movers ang 30-anyos na middle blocker na si Aby Marano na tumapos ng 10 puntos mula sa anim na atake, dalawang blocks at dalawang aces upang makamit ang unang winning streak sa komperensya sa 4-2 kartada katabla ang Cignal HD Spikers.

“Yung pagka-slow sa start ng game at latter part, usually kase nagstart kami aarangkada kami tapos pagdating sa gitna magstop kami until na short kami sad ulo, kaming this game, talagang we see to it na dapat kapag naglaro tayo from the start hanggang dulo ipakita natin na strong talaga tayo,” pahayag ni Marano patungkol sa ipinakitang laro ng kanilang koponan kasunod ng natikmang dalawang pagkatalo.

Nagawang manguna sa iskoring ng isa pang La Salle alumna na si Victoria “Ara” Galang na tumapos ng double-double sa 11 puntos kasama ang 11 excellent digs at tatlong receptions, gayundin sina Ivy Keith Lacsina sa inambag na 10 puntos mula sa lahat ng atake at Jolina Dela Cruz sa siyam puntos at tatlong receptions na sunod na makakatapat ang Creamline Cool Smashers sa Martes.

Pacman gustong tapatan ang knockout puncher na si Davis

ni GA @Sports | November 7, 2023

Sa edad na 44 ay hindi pa rin nawawala ang kagustuhang sumabak sa mas mataas na kalidad ng upakan ang nag-iisang 8th-division World champion na si Manny “Pacman” Pacquiao na maluwag sa kaloobang makasagupa ang matitinding katapat kabilang ang undefeated at knockout-puncher na si Gervonta “Tank” Davis sa hinaharap.

Buong tapang na sinagot ng future international boxing Hall of Famer ang katanungan ng posibilidad na makaharap nito ang World Boxing Association (WBA) Regular lightweight titlist sakaling umakyat ito sa kategorya nitong welterweight division.

“Davis is a good fighter, a good fighter, [but] If he wants [to] and comes up to 147, then we can fight. 145, maybe,” pahayag ni Pacquiao sa panayam ng FightHub TV ng bumisita ito sa Riyadh, Saudi Arabia matapos dumalo sa isang imbitasyon. “It’s not a problem for me, I’m an experienced fighter.”

Huling beses sumabak sa professional bout ang tubong Kibawe, Bukidnon at ipinagmamalaki ng General Santos City laban kay Yordenis “54 Milagros” Ugas ng Cuba noong Agosto 21, 2021 na nagresulta sa 12-round unanimous decision pabor sa 2008 Beijing Olympics bronze medalist para sa WBA (Super) 147-pound title belt.

Simula nito ay inanunsiyo ni Pacquiao ang kanyang pagreretiro upang tumutok sa pinakamataas na puwesto sa pulitika, subalit muling hindi pinalad sa 2022 Presidential Election.

Muling nagbalik sa salpukan si Pacman nang sumabak ito sa exhibition match noong Dis. 11, 2022 kontra kay South Korean fighter DK Yoo sa Korea International Exhibition Center na nagtapos sa unanimous decision sa kanilang 6-round bout. Nakahanda ring humarap sa isa pang exhibition match kontra kay Muay Thai at Kickboxing icon Sombat “Buakaw” Banchamek ng Thailand sa Enero 2024.

Kinumpirma rin ni Pacquiao ang nilulutong laban kay dating undefeated at retired Future Hall of Famer Floyd “Money” Mayweather Jr. para sa pinaka-aasam na Pac-May 2 rematch na plano sa Disyembre sa Tokyo.

Angels target ang liderato, F2, Hitters at Titans, uusad

ni GA @Sports | November 2, 2023

Mga laro ngayong Huwebes

(Santa Rosa Sports Complex)

2 n.h. – PLDT vs NXLed

4 n.h. – Choco Mucho vs Galeries

6 n.g. – F2 Logistics vs Petro Gazz

Puntirya ng Petro Gazz Angels na sumosyo sa liderato, habang pilit na maghihiwalay ng landas ang F2 Logistics Cargo Movers, PLDT High Speed Hitters at Choco Mucho Flying Titans sa pagkakatabla sa nakalinyang triple-header na bakbakan ng 6th Premier Volleyball League (PVL) 2nd All-Filipino Conference ngayong araw sa pagdayo ng liga sa Santa Rosa Sports Complex sa Laguna.

Paniguradong magtutulungan muli para sa Petro Gazz sina Aiza Maizo-Pontillas, Gretchel Soltones, Jonah Sabete, Remy Joy Palma at ace playmaker Djanel Cheng na makatabla sa Creamline Cool Smashers na nananatiling walang talo sa liga sa 4-0 kartada, laban sa mas pinalakas na hambalos ni Ivy Lacsina na suportado nina Majoy Baron, Jolina Dela Cruz, Ara Galang, Aby Marano, at Kim Fajardo para pilit takpan ang kawalan nina Kim Kianna Dy at Myla Pablo mula sa injury sa tampok na laro ng 6 p.m.

Kasalukuyang tabla sa 2-1 marka ang Cargo Movers, PLDT at Choco Mucho, kung saan nakahandang makipagharap ang PLDT laban sa NXLed sa pambungad na laro ng 2 p.m. na susundan ng tapatan ng Flying Titans at Galeries sa ikalawang laro sa 4 p.m.

Galing sa pangwawalis na panalo ang Petro Gazz kontra Chameleons sa 25-23, 25-21, 25-22 nitong nagdaang Sabado sa Candon City Arena sa Ilocos Sur, gayundin ang F2 Logistics laban sa Galeries na madaling dinispatya sa 25-15, 25-22, 25-17. Galing din sa panalo ang Choco Mucho nang walisin ang Cignal HD Spikers sa 25-21, 25-19, 25-18, habang mataas ang sagap ng laro ng PLDT ng dominahin ang Farm Fresh Foxies sa 25-17, 25-17, 25-20 noong Oktubre 24 sa Ynares Center sa Antipolo City.