Palarong pambansa, 95% ready na sa Cebu City

ni Gerard Arce @Sports | June 23, 2024

Photo: Amper Campaña / FB

Halos kumpleto na ang pagsasa-ayos ng mga pasilidad na paggagamitan at lalaruan ng mga atletang Pinoy mula sa iba’t ibang rehiyon sa bansa sa 2024 edisyon ng taunang grassroots sports program na Palarong Pambansa na nakatakdang simulan sa Hulyo 6-17 na gaganapin sa Cebu City Sports Center sa Cebu City.

Posibleng matapos na ang mga ginagawang rehabilitasyon sa CCSC na nakatakdang bigyan ng ceremonial pre-opening sa Hunyo 27, kung saan ayon sa mga contractor’s ng naturang palaro ay nasa 90 hanggang 96 porsiyento na makukumpleto ang pagsasa-ayos. Inaasahang maipapasa ang kabuuang palaruan sa unang linggo ng Hulyo, na lalahukan ng halos lahat ng nakalinyang pampalakasan.

Ayon sa inilabas na ulat ng pampahayagan sa Cebu City, nagpahayag ng kaluguran si Acting Mayor Raymond Alvin Garcia sa patuloy na pagsulong ng rehabilitasyon na maisaayos ang mga sports equipment sa tamang lugar, habang nakahanda siyang siyasatin ang buong pasilidad upang masiguro ang kahandaan at kasiguruhan ng Palaro. “I will personally check the rooms to ensure everything is ready…On June 27, we will hold a ceremonial pre-opening of the CCSC,” saad ni Garcia sa isang report.

Nabanggit din niya ang lahat ng paghahanda sa pambansang antas ay nasa kaayusan at walang nakikitang anumang problema na maaaring makaapekto sa buong kaganapan. Kumpiyansa siya na ang mga pagbabago sa CCSC ang magpapabilib sa mga bisita, dahil sa mga malalaking pagpapahusay na ginawa.

Inanunsiyo naman ni Department of Education (DepEd) assistant superintendent Adolf Aguilar na sisimulan ang Media accreditation sa Hunyo 27, lalo na sa mga Cebu media na nangangailangang dumalo sa face-to-face applications, habang lilimitahan ang mga dadalo sa opening ceremonies, gayundin ang pagbibigay ng mga ID para sa mahigpit na seguridad. 

Pinatibay ng Lady Blazers ang dynasty, champ pa rin

ni Gerard Arce @Sports | May 27, 2024

File photo: JN enterprises / FB

Lumikha ng dinastiya ang College of Saint Benilde Lady Blazers nang itala ang kanilang ikatlong sunod na kampeonato kabilang ang makasaysayang 40th straight na panalo matapos walisin ang katunggaling Letran Lady Knights sa bisa ng 25-18, 25-`7, 25-18 sa women’s volleyball, habang nakamit ng University of Perpetual Help System Dalta Altas ang pambihirang four-peat na korona para sa 25-14, 25-22, 29-27 straight set laban sa Aguinaldo College sa men’s class sa pagtatapos ng 99th  NCAA volleyball tournament kahapon sa FilOil EcoOil Centre sa San Juan City.

Rumatsada para sa bagong 11-0 rekord ngayong season si Gayle Pascual sa 15 puntos upang hiranging  two-time Finals MVP kasunod ng naitalang 135.83 statistical points, habang sumegunda ang bagong sasandalan ng koponan na si Wielyn Estoque sa 11 puntos. 

Nag-ambag din sa CSB Lady Blazers sina last season Finals MVP Jade Gentapa at Michelle Gamit na may tig-8 puntos, middle blocker Zamantha Nolasco sa 7 puntos, floor defender Fional Getigan sa 10 excellent digs at 7 excellent receptions at season Best Setter at season MVP Cloanne Mondonedo na may 16 excellent sets.  “The seniors eager silang tapusin yung sinimulan nilang trabaho and they want to go out with a bang at yung mga bata gusto nilang sundan 'yung yapak ng mga seniors nila,” pahayag ni season Best Coach Jerry Yee matapos ang laro. 

Lubos naman ang pasasalamat ni outgoing ace playmaker Mondonedo sa parangal bilang kauna-unahang setter na nagwagi ng MVP plum at ang Best Setter award.  “Sobrang overwhelmed and excited akong maglaro kanina kase andito sila (Family). Every year naman iba’t iba yung pinagdadaanan namin kada season eh, may mga lapses every season, may mga nawawala kada season, pero napupunan naman ng bawat isa sa amin,” wika ni Mondonedo na iiwanang kampeon ang koponan kasama sina Pascual, Gamit, at Gentapa kaantabay ang malinis na kartada.     

3RD CROWN ASAM NG BLAZERS ALTAS, AALPAS SA 4TH TITLE

ni Gerard Arce @Sports | May 26, 2024

File photo: Shakey's Super League

Mga laro ngayong araw (Linggo)

(Filoil EcoOil Arena)

10 a.m.- Individual Awarding Ceremonies

Game 2: Best-of-Three Finals

11:30 a.m.- EAC vs UPHSD (men)

2 p.m.- Letran vs CSB (women) 

Paliliyabin ng College of Saint Benilde Lady Blazers ang pagtala sa kasaysayan sa kanilang ika-40 sunod na panalo tungo sa ikatlong diretsong korona laban sa manlalabang  Letran Lady Knights, habang planong itala ng University of Perpetual Help System Dalta spikers ang kanilang ika-apat na sunod na titulo kontra sa Emilio Aguinaldo College Generals, ngayong Linggo ng hapon sa kapwa Game 2 ng best-of-three Finals ng 99th NCAA women’s and men’s volleyball tournament sa FilOil EcoOil Center sa San Juan City.

Madaling tinapos ng Lady Blazers ang Muralla-based lady spikers sa pamamagitan ng straight set panalo na nasubukan lamang sa unang set, subalit madaling dinomina ang ikalawa at ikatlong set noong isang linggo tungo sa 25-21, 25-15, 25-14 panalo.

Nakatakdang tapusin ng Lady Blazers ang laro sa alas-2:00 ng hapon, habang puntiryang tuldukan ng Perpetual ang laban kontra EAC sa unang laro sa alas-11:30 ng umaga.

Nagtulong-tulong sina Michele Gamit, Gayle Pascual at Zamantha Nolasco upang paslangin ang pag-asa ng Lady Knights sa pagtala ng mga scoring na 14, 14 at 12 points, ayon sa pagkakasunod sa Game 1 upang makuha ang lopsided na 1-0 kalamangan at lumapit muli sa panibagong pangwawalis sa serye, maging sa kabuuang liga, na tatlong sunod na season ng ginagawa ng Lady Blazers.

“May isang game pa, trabaho pa rin,” wika ni CSB head coach Jerry Yee na  handang tapusin ng maaga ang serye tungo sa ika-apat na kabuuang titulo ng Taft-based squad. “Bahala kayo kung sabihin nyo boring, mismatch or whatever, but we have to work and secure this.”