HD Spikers, kumumpleto sa semis cast ng PVL All-Pinoy

ni GA @Sports | December 6, 2023

Mga laro bukas (Huwebes)

(Philsports Arena)

Best-of-3 Semis

4 n.h. – Creamline vs Chery Tiggo

6 n.g. – Choco Mucho vs Cignal

Kumunekta ng mahusay na atake ang Cignal HD Spikers upang matagumpay na maselyuhan ang ikatlong pwesto sa semifinals matapos madaling walisin ang kulelat na Gerflor Defenders sa straight set 25-22, 25-11, 25-10 upang pormal na kumpletuhin ang semifinal cast sa pagtatapos ng preliminary round ng 6th Premier Volleyball League (PVL) second All-Filipino Conference kahapon sa Philsports Arena sa Pasig City.

Nagpamalas ng mahusay na pagmamando sa opensa si Gel Cayuna, habang nanguna sa atake si last conference MVP Frances Molina upang makuha ang 8-3 kartada at mahigitan sa ikatlong pwesto ang katablahang Chery Tiggo Crossovers at kaharapin ang No.2 Choco Mucho Flying Titans simula sa Huwebes, habang makakatapat ng Crossovers ang No.1 Creamline Cool Smashers.

Ipinadama ng HD Spikers ang mahusay na takbo ng opensa sa paggabay ng two-time Best Setter mula Dapitan City, Zamboanga del Norte nang mamahagi ng 16 excellent sets kasama ang 5 puntos mula sa 3 aces at tig-isang atake at block upang tulungan ang koponan na makabalik sa semis para kaharapin ang mataas na lipad ng Titans sa best-of-3 semis sa 6 p.m.

“Dami pa naming pagtatrabahuhan talaga para sa semis at du'n na kami pupukpok talaga.

Sina coach na bahala talaga, tiwala naman kami sa sistema nila,” pahayag ng 25-anyos na dating FEU Lady Tamaraws na nalampasan ang pagsubok na hatid ng Gerflor sa first set ng makipagsabayan sa atake at depensa. “Communication talaga kase parang hindi bumabagsak 'yung mga bola namin, yun ang pinag-usapan namin para mas makaangat pa sa second at third set.”

Bumida sa scoring para sa Cignal si last conference MVP Frances Molina sa 9 na puntos mula sa 8 atake.

'Pinas lulusot sa MLBB kung may Esports sa Olympics

ni GA @Sports | December 5, 2023

Lumaki ang posibilidad na makapasok sa Summer Olympic Games ang Esports matapos na paboran ni International Olympic Committee (IOC) President Thomas Bach na makapagbuo ng Esports Games sa prestihiyosong sports event, matapos ang matagumpay na pagdaraos nito sa Southeast Asian Games at Asian Games.

Hindi maipagkakaila ang pag-angat ng mga Filipino online gamers sa pandaigdigang kumpetisyon kabilang ang paboritong Mobile Legends: Bang Bang, kung saan kasalukuyang ginaganap sa Pilipinas ang M5 World Championships sa EVM Convention Center sa Quezon City.

Ayon kay Bach, inatasan na nito ang IOC Esports Commission na pag-aralan ang pagsasagawa ng Olympic Esports Games kasunod umano ng mas lalo pang lumalaking popularidad ng Esports sa buong mundo, na inaasahang aabot sa tatlong bilyon ang maaaring lumahok mula sa iba’t ibang bansa. “What is even more relevant to us, a majority of them are under the age of 34,” pahayag ni Bach.

Wala pang inilalabas na tugon at kumento rito ang International Esports Federation, ang opisyal na samahang pandaigdigan ng Esports, patungkol sa inilabas na pahayag ni Bach, na isang dating Olympic Fencing medalist.

Naging maganda naman ang simula ng Pilipinas mula sa M2 champion na AP Bren ng talunin ang Burmese Ghouls ng Myanmar sa iskor na 2-0 na binubuo nina Angelo Kyle "Pheww" Arcangel, Marco "Super Marco" Requitano, Michael "KyleTzy" Sayson, Rowgien "Owgwen" Unigo, David “Flap Tzy” Canon, Vincent “Pandora” Unigo sa pagmamando ni Francis “Ducky” Glindro, gayundin ang M3 champions na Blacklist International na ipinahinga ang top-two players na sina Johnmar “OhMyv33nus” Villaluna at Danerie “Wise” Rosario, ngunit ipaparada nina Stephen “Sensui” Castillo, Edward “Edward” Dapadap, Salic “Hadji” Imam, Kiel “Oheb” Soriano, Renejay “Renejay” Barcase, Lee “Owl” Gonzales, Kenneth “Yue” Tadeo na kino-coach ni Ariel “Master the Basics” Jiandani.

PVL semis: sukatan na ng husay at diskarte

ni GA @Sports | November 28, 2023

Mga laro ngayon (Martes)

(Philsports Arena)

2 n.h. – Farm Fresh vs Galeries

4 n.h. – Choco Mucho vs Gerflor

6 n.g. – Creamline vs Chery Tiggo

Magkakasukatan ng husay, galing at diskarte ang mga semifinalists na Creamline Cool Smashers at Chery Tiggo Crossovers na planong ibigay ang unang pagkatalo sa una sa pinakatampok na laro, habang iaangat pa lalo ng Choco Mucho Flying Titans sa siyam na sunod na panalo ang laro kontra kulelat na Gerflor Defenders sa nakahandang triple-header matches ngayong araw sa 6th Premier Volleyball League (PVL) 2nd All-Filipino Conference sa Philsports Arena sa Pasig City.

Tatangkain ng Creamline na pahabain ang unbeaten winning streak sa siyam na pagbibidahan nina Jema Galanza, Alyssa Valdez, Tots Carlos, Michele Gumabao, Jeanette Panaga, Kyle Negrito at Kyla Atienza kontra sa mga batang grupo na pinamumunuan ni Ejiya “Eya” Laure.

“Para sa akin, wala sa akin 'yun depende sa naglalaro, para sa amin point by point, set-by set yun ang iniintindi namin so kung may ganung mga hype, wala naman sa'min 'yan, basta kami maglalaro kami point by point, kung ano 'yung result accept lang talaga,” wika ni Creamline head coach Sherwin Meneses. “Bata rin at matatangkad at malakas mamalo, tingnan naming mabuti kung anong advantage sa kanila.”

Inaasahang susundan ng 5-foot-7 na dating pambato ng Adamson Lady Falcons na si Galanza ang pagbibida sa nagdaan nilang pangwawalis kontra NXLed Chameleons noong Huwebes patungo sa unang silya sa semifinals.

Diniskarga ng Chery Tiggo ang F2 Logistics Cargo Movers sa come-from-behind sa 27-25, 11-25, 17-25, 25-22, 15-10 noong Sabado sa pangunguna nina Mylene Paat at Eya Laure para masungkit ang ika-anim na sunod na panalo.

Susubukan namang panatilihin ng Titans ang winning streak upang mapatibay ang pagkakahawak sa solo second.