Ballungay nilisan ang Ateneo, Oczon maglalaro na sa Japan

ni GA @Sports | December 10, 2023

Parehong nilisan nina Kai Ballungay ang pugad ng Ateneo Blue Eagles at si Miguel Oczon ng College of Saint Benilde Blazers upang maghanap ng panibagong landas na tatahakin patungo sa propesyunal na karera sa anumang dako ng mundo.

Nagpaalam ang high-flying forward na si Ballungay sa isang mahabang pagpupugay at pasasalamat na buod ng mensahe sa kanyang social media patungkol sa Ateneo Blue Eagles at kay coach Tab Baldwin matapos ang dalawang taong paglalaro kabilang ang kampeonato sa 85th season at Final Four run sa 86th season. “With strong feelings of excitement, I wish to share that I will be embarking on the next chapter of my journey—transitioning to the world of professional basketball,” pahayag ni Ballungay sa kanyang Instagram post. “The decision to pursue this path was not made lightly whatsoever, and I am glad to bring with me the invaluable experiences and lessons I have gained during my time at Ateneo.”

Pinangunahan ng 6-foot-7 Filipino-American ang Blue Eagles pagdating sa iskoring sa paglista ng 11 puntos kada laro, kasama ang mahigit pitong rebounds, dalawang assists at 0.75 steals sa kanyan sophomore year sa Ateneo na tinapos ang paghahari ng University of the Philippines Fighting Maroons na kasalukuyang lumalaban kontra De La Salle University Green Archers sa best-of-three Finals

Nagpaalam na rin si Oczon sa Taft-based squad sa social media nitong Miyerkules upang sumali sa Korean Basketball League na Ulsan Hyundai upang tapusin ang nalalabing dalawang taon na nalalabi sa Blazers, para samahan sa Korea sina Rhenz Abando (Anyang KGC), Juan Gomez de Liano (Seoul SK), Dave Ildefonso (Suwon KT), Calvin Epistola (Busan KCC) at Ethan Alvano (Wonju DB).

2nd World Title, pangarap ni Ancajas kontra Inoue

ni GA @Sports | December 8, 2023

Hindi papaawat sa pangarap na makamtan ang ikalawang World title ni dating long-time super-flyweight champion Jerwin “Pretty Boy” Ancajas na mapagtagumpayan ang nakalinyang title fight laban kay World Boxing Association (WBA) bantamweight Japanese titlist Takuma Inoue kasunod ng pag-uwi sa Pilipinas upang ipagpatuloy ang kanyang paghahanda para sa banatan sa main event sa Pebrero 24 sa Ryogoku Kokugikan National Sumo Arena sa Tokyo, Japan.

Gaya ng nakagawian, walang humpay sa pagsasanay ang 31-anyos na tubong Davao City na lubos pa ang gagawing paghahanda habang papalapit ang araw ng laban matapos siguraduhin ni MP Promotions President Sean Gibbons na maipadala sa Survival Camp sina dating World challengers Vincent “Asero” Astrolabio at Mike “Magic Plania upang makatulong sa preparasyon ng mga Pinoy boxers.

“Dadalhin ni sir Sean dito si Astrolabio at Mike Plania. [Ready] rin daw kumuha sa iba [ng ka-sparring],” paglalahad ni Jimenez.

Bukod umano kina Astrolabio at Plania, hahanap din umano ng ilang mga ka-sparring na itatapat kay Ancajas na kahalintulad ng estilo ni Inoue, na idedepensa sa unang pagkakataon ang korona matapos mapanalunan kontra Liborio Solis nitong Abril 8 sa Ariake Arena sa bisa ng unanimous decision kasunod ng pagbakante ng nakatatandang kapatid na si Naoya matapos maging undisputed titlist sa 118-lbs division.

Magsisilbi ring malaking karagdagang inspirasyon at motibasyon ang pag-uwi sa Pilipinas nina Ancajas, Jimenez at dating World challenger Jonas “Zorro” Sultan nitong Sabado upang ipagpatuloy ang pagsasanay sa Magallanes, Cavite, matapos ianunsiyo ang pagkansela ng laban nitong nagdaang Nob. 15, para samahan ang amang may karamdaman sa Survival Camp, gayundin ang kani-kanilang pamilya. “Dito muna kami mag-training sa survival camp. May sakit kase 'yung papa ni Jerwin, kailangan niya masamahan kaya nandito kami sa camp ngayon,” pahayag ni Jimenez.

Cool Smashers namumuro sa c'ship round ng PVL

ni GA @Sports | December 8, 2023

Mga laro sa Sabado

(Philsports Arena)

Game 2: Best-of-3 semifinals

4 n.h. – Choco Mucho vs Cignal HD

6 n.h. – Creamline vs Chery Tiggo

Namumurong makabalik muli sa championship round ang Creamline Cool Smashers matapos walisin ang Chery Tiggo Crossovers sa bisa ng straight set sa 25-18, 27-25, 25-22 upang masungkit ang Game 1 ng best-of-three semifinal series kagabi sa 6th Premier Volleyball League (PVL) Second All-Filipino Conference sa Philsports Arena sa Pasig City.

Bumanat ng husto sa third set si 2019 Open Conference MVP Jessica Margaret “Jema” Galanza na tumapos ng kabuuang 17 puntos mula sa 16 atake at isang block, kasama ang siyam na excellent receptions at 7 excellent digs, upang pahabain sa 12 sunod na panalo ang Cool Smashers sapol ng preliminary round na nangangailangan ng isang panalo sa nakatakdang laro sa Sabado sa ikalawang laro sa alas-6:00 ng gabi.

“During games tinitignan ko lang yung team mates ko kung gaano sila ka-eager manalo, so sino ba naman ako para sumuko, syempre ilalaban talaga [which is] yung ang goal namin sa game,” pahayag ng 27-anyos na tubong San Pedro, Laguna matapos ang laro, na lubusang nahamon ng husto laban sa mas batang manlalaro.

“Grabe sila maglaro yung mga bata, grabe yung energy, so masayang sabayan din.”

Maagang rumatsada ng puntos galing sa atake ang Cool Smashers sa unang set nang bumitaw ito ng 17 kills laban sa 10 lamang ng Chery Tiggo upang maging pangunahing arsenal ng defending champions sa panibagong paghaharap.

Naging sandalan ng naman Cool Smashers ang three-time conference MVP na si Alyssa Valdez, na tumapos ng 12 puntos, sa mga huling bahagi ng second set ng iniskor nito ang huling 3 puntos kabilang ang magkasunod na hambalos at service ace.