Matamis ang unang MVP award ni Rondina sa PVL All-Pinoy Cup

ni GA @Sports | December 19, 2023

Pinatunayan ni Cherry Ann “Sisi” Rondina na kayang abutin ng kanyang mga nagtataasang lipad ang mga bituin sa langit matapos hiranging pinakamaningning na manlalaro sa 6th Premier Volleyball League 2nd All-Filipino Conference para sa kanyang unang Most Valuable Player award sa liga matapos ang matagal na paghihintay na pagbabalik sa professional league.

Dehins naging kawalan o hadlang ang katangkaran ni Rondina pagdating sa pinapasok nitong laban, bagkus ay mas lalo pang pinag-igihan ang angking kakayanan at abilidad upang mas makatulong para sa Choco Mucho Flying Titans na makamit ang kauna-unahang landas patungo sa Finals sa ikalawang komperensya lamang matapos ang ilang taon sa Philippine national Beach Volleyball team.  

Maituturing na isa sa maliliit na manlalaro ang 27-anyos na power-spiker na tubong Compostela, Cebu na kasalukuyang bumabanat sa pro-league, subalit may angkin itong taas ng talon at puwersang daig pa ang mas matatangkad na katapatan kaya’t siyang pangunahing sinasandalan ng Flying Titans sa bawat giyerang pinapasok.

“Maraming salamat po sa pumunta rito para manood ng game namin. Wala naman po akong ibang masabi kundi maraming, maraming salamat kina Sir Jonathan (Ng), Rebisco management.

Salamat po sa inyong lahat,” pahayag ni Rondina sa kanyang MVP speech sa record breaking 24,459 manonood sa Smart Araneta Coliseum. “Hindi man po namin nakuha yung gold ngayon, pero itong award para sa team po namin.”

Tumapos sa eliminasyon ang dating Santo Tomas Golden Tigresses star at multiple collegiate MVP awardee sa ikalawang pwesto sa pagtatapos ng preliminaries sa kabuuang 194 mula sa 173 spikes, 13 blocks at walong service aces, upang pumangalawa kay Filipino-Canadian Savannah Dawn Davison sa 202 total, subalit naging Top scorer sa semifinal round sa 236 puntos.          

May maaagawan ng korona o may magiging undisputed?

ni GA @Sports | December 19, 2023

Parehong gigil at matindi ang pagnanais nina unified IBF/WBA champion Marlon “Nightmare” Tapales at unbeaten WBC/WBO titlist Naoya “Monster” Inoue na makuha ang pinaka-aasam na mga titulo upang maging ‘undisputed’ super-bantamweight title holder para sa pinaka-aabangang bakbakan sa Disyembre 26 sa Ariake Arena sa Tokyo, Japan.

Todo ang pagsasanay at paghahandang ipinapakita ni Tapales (37-3, 19KOs) na ipinagpapatuloy ang lahat ng ito sa Baguio City, matapos simulan ang paghahanda sa Las Vegas, Nevada, upang maging kauna-unahang boksingerong gigiba sa undefeated Japanese champion matapos pataubin ang maraming Filipino, kabilang si four-division World titlist Nonito “The Filipino Flash” Donaire.

Aminado ang 31-anyos na tubong Tubod, Lanao del Norte na inaasahan niyang magiging mas matindi ang ipapakitang lakas at kondisyon kontra sa 30-anyos na nagmula sa Zama, Kanagawa lalo pa’t puntiya nitong maging two-division undisputed titlist tulad ni welterweight king Terence “Bud” Crawford.

Naging mas determinado ang dating WBO bantamweight titlist na makapag-ukit ng kasaysayan na hindi nagawa ng mga legendary Pinoy boxers na sina eight-division World titlist Manny “Pacman” Pacquiao, Donaire at Donnie “Ahas” Nietes. Nais pang pahabai ni Tapales ang kanyang winning streak sa lima na huling beses nabigo sa isang Hapon kay Ryosuke Iwasa sa 11th round TKO sa Barclays Center sa Brooklyn, New York nung Disyembre 7, 2019.

“I think for me it’s really important because I need to throw a lot of punches, it’s helpful for me because it’s hard here to do it like because it’s really tiring but when I’m used to it I can do whatever I need to do. I want to go down as the first undisputed Filipino world champion,” paliwanag ng 5-foot-5 boxer na lalaban sa kanyang pinakamalaking laban sa karera sa boksing na buhos ang paghahanda sa training camp.  

Rondina , Wong vs. Valdez at Carlos sa PVL finals

ni GA @Sports | December 14, 2023

Photo: PVL

Mga laro ngayon (MOA Arena)

Battle-for-3rd (best-of-three)

4 n.h. Chery Tiggo vs. Cignal

Finals (best-of-three)

6 n.h. Creamline vs Choco Mucho

Nakahanda nang magsalpukan sa unang pagkakataon sa Finals ang mag-utol na unbeaten Creamline Cool Smashers at Choco Mucho Flying Titans sa unang sultada ng best-of-three championship bout ngayong Huwebes sa 6th Premier Volleyball League (PVL) Second All-Filipino Conference sa MOA Arena sa Pasay City.

Naunang nakapasok ang Creamline para sa kanilang 10th Finals Appearance matapos padapain ang Chery Tiggo Crossovers noong Sabado,  habang natupad ang  pinaka-pangarap ng lahat ng fans at tagasubaybay nina Deanna Wong at Cherry Ann Rondina ng Choco Mucho Flying Titans na magkaharap ang utol na Cool Smashers sa isang Final matchup sa professional league.

Emosyonal na nalasap ng ace playmaker ng Flying Titans ang kauna-unahang pagpasok sa Finals matapos maglunsad ng pambihirang paggabay sa mga kakampi sa ibinahaging 24 excellent sets.

Tinapos ng Titans ang matinding pananabik ng karamihan na umusad ang mga ito sa kauna-unahang podium finish matapos ang paglahok sa liga simula noong 2019 Open Conference, kung saan limang beses ng tumapos na 7th place ang Titans kabilang ang magkasunod na komperensiya sa first All-Filipino at Invitational. Nakakuha ito ng pinakamagandang pagtatapos at malaking motibasyon sa isang torneo ng magwagi ng tansong medalya sa 2023 VTV International Womens Volleyball Cup sa Lao Cai Gymnasium sa Vietnam.

“Were just really grateful na nakapasok kami sa semis. Hindi lang naman ako, pero buong team. Hindi lang top four goal namin, hopefully we'll reach our goal talaga, humihikbing panayam ni Wong sa panayam ni Lexi Rodriguez ng One Sports matapos ang 25-20, 23-25, 26-24, 25-23 panalo kontra sa Cignal HD Spikers sa Game 3 ng PVL Second All-Filipino Conference semifinals nitong Martes. But the whole teams goal is to win the championship. We worked hard for this win and its all about teamwork.