Spikers Reyes at Santos, sasamahan nina KKD at Kim

ni GA @Sports | January 10, 2024

Photo: PVL / FB

Muling nagsama-sama sa iisang bakuran ang mga dating De La Salle University Lady Spikers upang bumuo ng matibay na grupo para subukang dalhin sa kauna-unahang podium finish ang PLDT High Speed Hitters kasunod ng panibagong karagdagang arsenal sa katauhan ni opposite hitter Kim Kianna Dy.

Pormal na inanunsyo ng PLDT nitong Linggo ang pagtapik sa dating F2 Logistics Cargo Movers power-hitter na si Dy, upang samahan ang mga naunang kakampi na sina Kim Fajardo at Majoy Baron para makipagsanib-pwersa sa mga dating Lady Spikers na sina Mika Reyes at Erika Santos tungo sa seventh season ng Premier Volleyball League (PVL) sa susunod na buwan.

Maituturing na isa sa mga pinakamahusay na opposite hitter ang 2021 PNVF MVP, kabilang ang dekoradong karera sa balibol sa pagiging five-time pro-league at three-time collegiate champion, para maging parte ng mas matatag na sandata kasama ang powerhouse cast na kinabibilangan nina ace playmaker Rhea “DMac” Dimaculangan, Filipino-Canadian at best scorer Savannah Dawn Davison, dating national team middle blocker Dell Palomata, spikers Honey Royse Tubino, Jules Samonte at Fiola Ceballos at league best floor defender Kathleen Arado. “Stepping out of your comfort zone can be scary sometimes. But at the same time, that's when you realize that you can learn so much more from new coaches and teammates,” wika ni Dy na magiging ika-apat na koponan sa kanyang karera matapos ang pitong taong pamamalagi sa F2 Logistics.

Minsang naglaro ito sa Shopinas.com Lady Clickers at Meralco Power Spikers nung 2015 sa Pilipinas Super Liga at Shakey’s V-League. “Knowing that there’s still so much to learn inspires me to thrive and work harder. It's going to take a lot of hard work, but I hope we can meet the expectations set for us here in PLDT.”                                              

Tapales ibinulgar ang kahinaan ni Inoue

ni GA @Sports | January 8, 2024

Napurnada man ang pinupuntiryang game plan ni dating IBF at WBA junior-featherweight champion Marlon “Nightmare” Tapales kontra kay two-time undisputed at super-bantamweight titlist Naoya “Monster” Inoue, subalit nasilip nito ang kahinaan sa bodega ng undefeated Japanese Pound-for-Pound star sa kanilang unified bout nitong nagdaang Disyembre 26 sa Ariake Arena sa Tokyo, Japan.

Maituturing ni Tapales (37-4, 19KOs) na isa sa pinakamahuhusay at pinakamagaling na boksingero ang Japanese boxer na sinubukan niyang sabayan at matumbahin para sa pangarap na maging kauna-unahang Filipino na nag-uwi ng undisputed titles sa four-belt era. Ngunit sadya umanong mabilis at mataas ang Intelligent Quotient (IQ) ni Inoue (26-0, 23KOs) kaya’t nahirapan rin itong sabayan sa banatan sa 12-round battle na nagtapos sa 10th round technical knockout.

“Magaling at mataas ang IQ, yung footwork at bilis niya at madaling maka-adjust sa laban. Yung suntok kaya naman, kaso sa dami na rin ng suntok na pumasok, talagang mahihilo ka talaga,” eksplika ni Tapales sa programang Power N’ Play ni dating PBA commissioner at PSC chairman Noli Eala. “Talagang tinamaan talaga ako tsaka nahirapan ako sa style niya, kase mabilis siya pero ‘di ko masabayan, gusto ko sabayan pero di ko makuha.”

Pangunahing target ng kanilang kampo na masabayan sa suntukan ang 30-anyos mula Zama, Kanagawa upang makatyempo ng knockout, subalit matibay umano ang four-division World titlist. “Ang game plan namin ay sabayan yung suntok ni Inoue para makatama kami ng clean shot at may tsansang mapabagsak siya. Eh matibay rin yung hapon,” pahayag ng 31-anyos mula Tubod, Lanao del Norte.   

Subalit napansin nitong may kahinaan ang unbeaten boxer, na nagpatulog sa maraming Pinoy boxers, sa kasagsagan ng kanilang upakan, kaya’t sinubukan nitong bumitaw ng mga patama katawan nito. “Kapag sinusuntok rin siya sa katawan, tumatakbo rin siya, nasasaktan rin siya,” pagbubunyag ni Tapales. “Sinubukan ko na, gusto kong pasukin na makasuntok at makatama ng maganda sa bodega niya pero sabi ko nga mabilis si Inoue, nahihirapan ako.” 

Pacman kinumpirma ang Mayweather Fight 2024

ni GA @Sports | January 3, 2024

Kinumpirma ni 8th division world champion Manny “Pacman” Pacquiao ang posibleng ikalawang bakbakan kay dating undefeated at retired Future Hall of Famer Floyd “Money” Mayweather Jr. ngayong taon para sa pinaka-aasam na Pac-May 2 rematch kasunod ng anunsiyo nito sa RIZIN 45 fight New Year’s event.

Itinuturing na pinakamalaking boxing event ang salpukan nina Pacquiao at Mayweather na tumabo ng husto sa kita na tinaguriang “The Fight of the Century” at “Battle for Greatness” noong Mayo 2, 2015 na nagresulta sa 12-round unanimous decision panalo sa American boxer upang mapanatili ang WBA (unified), WBC, The Ring welterweight title at maagaw ang WBO belt na ginanap sa sold-out MGM Grand Garden Arena sa Las Vegas, Nevada.

Lumikom ito ng limpak-limpak na kita na umabot umano sa mahigit sa $400 million at PPV viewership na 4.6 million na pagbili upang tanghaling pinaka-pinanood na sporting event sa kasaysayan ng telebisyon at pay-per-view.

Sa kabila ng nakuhang tagumpay ng naturang bakbakan ay hindi na muling naulit ang kanilang rematch, kung saan nagtamo ng injury ang 45-anyos na Filipino boxing legend sa kanyang balikat upang hindi makalaban ng akma sa kanilang plano. Gayunpaman, maaaring maisakatuparan ang ikalawang paghaharap sa mungkahi ni Pacman na muli silang magharap.

Nauna ng inihayag ni Pacquiao sa isang boxing event sa Riyadh, Saudi Arabia na nakikipag-negosasyon ang kanilang kampo na maitulak ang laban sa Tokyo, Japan para umano sa isang exhibition match. “Thank you so much for inviting me here again. I’m sorry for the last time I promise that we’re going to fight this year, but [as they explain], but next year I hope to see you here in Japan with a big fight against Floyd Mayweather, I thought you wouldn't want me to say that. I am excited for that. Thank you for always supporting RIZIN promotions,” pahayag ni Pacquiao.