Dela Cruz at Viray pasok sa FF Foxies

ni GA @Sports | January 17, 2024

Magiging malaking tulong para sa Farm Fresh Foxies ang pagpasok sa koponan nina Jolina Dela Cruz at power-lefty Caitlin Viray upang mabigyan ng karagdagang opensiba at arsenal para magamit bilang panlaban sa 7th season ng Premier Volleyball League (PVL) sa Pebrero.

Dadalhin ng all-around outside hitter mula Bulacan ang kanyang matinding kasipagan at talento sa batang koponan na isa sa mga tinitingnang paangat na koponan sa nagdaang komperensiya. Subok sa kanyang kasipagan ang 24-anyos na spiker ng maasahan ito ng F2 Logistics Cargo Movers sa lahat ng pagkakataon pagdating sa floor defense at atake, kasunod na rin ng career-high sa 30 puntos noong Nobyembre kontra Cignal HD Spikers.

Gayunpaman, pansamantalang hindi masisilayan ang 5-foot-9 wing spiker sa darating na All-Filipino Conference dahil sa patuloy itong magpapagaling sa tinamong leg injury.

Ang dating De La Salle University Lady Spiker ang isa sa mga naging malaking sandalan ng koponan upang mapanalunan ang 85th season ng University Athletic Association of the Philippines (UAAP) women’s volleyball tournament noong isang taon, bago ito tuluyang pumalo sa nabuwag na F2 Logistics sa Invitational Conference.

Nitong Sabado ay kinumpleto ni Dela Cruz ang ‘Lucky Nine’ na recruits ng Farm Fresh na kinabibilangan nina Viray mula sa Choco Mucho Flying Titans, setter Anj Legacion mula PLDT High-Speed Hitters, mga dating teammates sa F2 Logistics na sina Elaine Kasilag at Chinnie Arroyo, dating Chery Tiggo Crossover Jaycel Delos Reyes, dating University of Santo Tomas Golden Tigresses libero Janel Delerio at high-flyer Ypril Tapia, gayundin si Julia Angeles mula sa Galeries Towers.

Sunod-sunod na pagbati naman ang nakuha ni Dela Cruz sa kanyang malalapit na kaibigan sa social media kabilang si Chery Tiggo leading spiker Ejiya “Eya” Laure.                                                                                                                                         

Pablo, walang hirap sa pagbabalik sa Gazz Angels

ni GA @Sports | January 14, 2024

Hindi naging mahirap para kay 2-time pro-league MVP Myla “Bagyong” Pablo ang pagbabalik sa Petro Gazz Angels dahil sa pagiging pamilyar nito sa mga kakampi at sa pamunuan ng koponan upang dalhin ang kanyang kaalaman at karanasan sa pagbubukas ng bagong season ng Premier Volleyball League (PVL) sa susunod na buwan.

Kahit pa man kabi-kabilang manliligaw mula sa ibang koponan ang nagnanais na makuha ang serbisyo ng 5-foot-10 outside hitter mula sa National University Lady Bulldogs, mas pinili pa ring makipagbalikan ng tubong Tarlac sa Petro Gazz.

“First choice ko talaga Petro Gazz since nag-disband 'yung F2 [Logistics]. Yung Petro 'yung unang nag-message [sa 'kin]. I’m really thankful din naman talaga kasi grabe 'yung tiwala sa'kin ng Petro Gazz ulit,” pahayag ni Pablo sa panayam dito ng One Sports’ The Game nitong Miyerkules. “Kaya pinili ko 'yung Petro Gazz talaga kasi familiar na sakin ang team. Alam ko na 'yung bawat galaw ng mga teammates ko, ugali ng mga teammates [ko]. Two years din ako sa Petro Gazz, alam ko na din ugali ng mga management namin, mga boss namin.”

Muling makakasama ni Pablo sa Petro Gazz sina Aiza Maizo-Pontillas, Djanel Cheng.

Kecelyn Galdones, Mary Remy Joy Palma, Jonah Sabete, Nicole Tiamzon at Mariane Buitre, habang gagabayan ito ni headcoach Timmy Sto. Tomas.

Tumalon noong nagdaang season ang 30-anyos na dating Best Spiker ng UAAP season 75 matapos hindi mag-renew ng kontrata sa Petro Gazz upang palakasin ang noo’y matibay na puwersa ng F2 Logistics na kinabibilangan nina team captain Aby Marano, Kim Fajardo, Shola Alvarez, Ivy Lacsina, Dawn Macandili, Elaine Kasilag, Ara Galang, Iris Tolenada, Majoy Baron, Kim Kianna Dy, at Cha Cruz-Behag sa koponan.                                                                                                                                  

Spikers Reyes at Santos, sasamahan nina KKD at Kim

ni GA @Sports | January 10, 2024

Photo: PVL / FB

Muling nagsama-sama sa iisang bakuran ang mga dating De La Salle University Lady Spikers upang bumuo ng matibay na grupo para subukang dalhin sa kauna-unahang podium finish ang PLDT High Speed Hitters kasunod ng panibagong karagdagang arsenal sa katauhan ni opposite hitter Kim Kianna Dy.

Pormal na inanunsyo ng PLDT nitong Linggo ang pagtapik sa dating F2 Logistics Cargo Movers power-hitter na si Dy, upang samahan ang mga naunang kakampi na sina Kim Fajardo at Majoy Baron para makipagsanib-pwersa sa mga dating Lady Spikers na sina Mika Reyes at Erika Santos tungo sa seventh season ng Premier Volleyball League (PVL) sa susunod na buwan.

Maituturing na isa sa mga pinakamahusay na opposite hitter ang 2021 PNVF MVP, kabilang ang dekoradong karera sa balibol sa pagiging five-time pro-league at three-time collegiate champion, para maging parte ng mas matatag na sandata kasama ang powerhouse cast na kinabibilangan nina ace playmaker Rhea “DMac” Dimaculangan, Filipino-Canadian at best scorer Savannah Dawn Davison, dating national team middle blocker Dell Palomata, spikers Honey Royse Tubino, Jules Samonte at Fiola Ceballos at league best floor defender Kathleen Arado. “Stepping out of your comfort zone can be scary sometimes. But at the same time, that's when you realize that you can learn so much more from new coaches and teammates,” wika ni Dy na magiging ika-apat na koponan sa kanyang karera matapos ang pitong taong pamamalagi sa F2 Logistics.

Minsang naglaro ito sa Shopinas.com Lady Clickers at Meralco Power Spikers nung 2015 sa Pilipinas Super Liga at Shakey’s V-League. “Knowing that there’s still so much to learn inspires me to thrive and work harder. It's going to take a lot of hard work, but I hope we can meet the expectations set for us here in PLDT.”