Crossovers sinagasaan ang Chameleons, Galang bumida

ni Gerard Arce @Sports | July 21, 2024

Photo: PVL / FB

Mga laro sa Martes

(Philsports Arena)

1 n.h. – Zus Coffee vs Cignal

3 n.h. – Choco Mucho vs Akari

5 n.h. – Capital1 vs Petro Gazz 

Hindi hinayaang nag-iisang puputok sa opensa ni dating collegiate at professional MVP Ara Galang ang kanilang import para maniobrahin ang takbo ng laro ng Chery Tiggo Crossovers at kunin ang ikalawang sunod na panalo sa Pool A laban sa NXLed Chameleons sa 25-16, 25-20, 25-23 kahapon sa pambungad na laro ng 2024 Premier Volleyball League (PVL) Reinforced Conference sa Philsports Arena sa Pasig City.

Matapos na madaling makuha ang dalawang unang sets sa loob ng 29 minuto, sinandalan ng Crossovers ang 29-anyos na beteranong spiker upang bumira ng mga importanteng iskor, na tumapos ng double-double sa kabuuang 11 puntos mula sa pitong atake at apat na blocks at 11 excellent digs para segundahan si dating PSL Best Outside Spiker Katherine Bell na tumapos ng 21 puntos mula sa 19 kills at dalawang aces at 10 excellent digs.

“Mindset ko lang ay tulungan si kath, [kase] ‘di pwedeng umasa lang kami sa import namin, kailangan mag-contribute as much as we can,” pahayag ni Galang, para pangunahan ang lokal players sa kawalan nina power hitter Eya Laure at ace libero Jennifer Nierva na kumakampanya para sa Alas Pilipinas national team. “Mag-stick lang kami sa kakayanan namin at magtrabaho ng maayos at magwork as a team. Expect na pagbutihan lalo at magwork pa as a team.”

Nag-ambag rin para sa Crossovers si Shaya Adorador sa anim na puntos kasama ang pitong excellent receptions, gayundin ang 12 excellent sets at tatlong puntos ni Jasmine Nabor at 10 excellent receptions ni rookie floor defender Karen Verdeflor.

Ika-2 sunod na panalo pakay ng NXLed at Tiggo

ni Gerard Arce @Sports | July 20, 2024

Photo: PVL / FB

Mga laro ngayong araw

(Philsports Arena)

2 n.h. – NXLed vs Chery Tiggo

4 n.h. – PLDT vs Galeries

6 n.g. – Farm Fresh vs Creamline

Hangad ng Nxled Chameleons at Chery Tiggo Crossovers na makuha ang kanilang ikalawang sunod na panalo sa pambungad na tapatan ngayong araw, habang susubukan ng PLDT High Speed Hitters na maipagpatuloy ang mainit na simula kontra sa Galeries Tower Highrisers, samantalang kapwa magbabawi ang 8th-time champions na Creamline Cool Smashers at Farm Fresh Foxies sa tampok na laro sa pagpapatuloy ng opening week ng Premier Volleyball League (PVL) Reinforced Conference sa Philsports Arena sa Pasig City.

Kapwa naghangad sa magkahiwalay na laro ang Chameleons at Crossovers, kung saan madibdiban ang pinagdaanang panalo ng Nxled laban sa Galeries sa 5th set, habang madaling kinaldag ng Chery Tiggo ang Farm Fresh sa bisa ng straight set sa 25-13, 27-25, 25-22, habang wala ang mga pambatong manlalaro na sina Eya Laure at Jen Nierva dulot ng naunang pangako sa Alas Pilipinas, patuloy na naipakita ng Chery ang lalim ng bench na nakatakdang sandalan ng kanilang import na si Kath Bell para sagasaan ang Foxies.

Susubukang makakuha ng ibang paraan si NXLed head coach Cheng Gang para mahanapan ng paraan ang harurot ng Chery Tiggo sa unang laro ng 2 p.m. na susundan ng hambalos ni PLDT import Elena Samoilenko laban sa Galeries sa 4 p.m.

Hahanapin naman ng Creamline ang tamang timpla at tamis ng laro kasama ang import na si Erica Staunton laban sa Farm Fresh sa main game  para kumpletuhin ang triple-header ng two-pool tournament single-round robin format. Makakatulong ni Staunton sina Michele Gumabao, Bernadeth Pons, Pangs Panaga at Bea de Leon, na hinihintay ang pagbabalik sa koponan nina Jema Galanza at Jia De Guzman mula sa Alas Pilipinas.

3rd title target ni Sydney Sy sa Asia-Ociania Sambo c'ship

ni Gerard Arce @Sports | June 30, 2024

Photo: Sydney Sy / IG

Macau, China - Mananatiling malaking hadlang para sa pagpuntirya ng ikatlong titulo sa Asya ni two-time champion at six-time World medalist Sydney Sy-Tancontian ang mahigpit na katunggaling si World No.1 Arailyn Abenova ng Kazakhstan sa women's +80kgs division, habang sasalang din sa mabigat na laban si dating Southeast Asian Games titlist Chino Sy-Tancontian sa men's under-98kgs division sa 2024 Asia-Oceania Sambo Championship sa Forum de Macau Stadium. 

Magbabalik sa prestihiyosong kompetisyon ang Davaoena multi-medalist para pangunahan ang Philippine national squad na layong buhatin ang bandila ng bansa sa pinakamataas na torneo sa Asian Region matapos pagreynahan ang 2019 New Delhi, India at 2022 Jouneih, Lebanon edisyon. Muling makakatapat ng 24-anyos na three-time SEA Games medalist ang Kazakh samboist na makailang beses nakatapat sa iba't ibang torneo. 

Matagal mang nabakante sa balibagan ang dating two-time UAAP gold medalist at Rookie of the Year mula sa University of Santo Tomas matapos maging abala sa mga gawain ng International Sambo Federation (FIAS) bilang chairperson ng FIAS Athletes Commission. "It's always an honor and privilege to serve our country in all types of combat sports, especially in what I love truly most. We're hoping and looking up to deliver and produce what the country is expecting on us ," pahayag ni Sy-Tancontian, na lubos ang pasasalamat sa Philippine Sports Commission (PSC), Philippine Olympic Committee (POC) at sa international at local federation. 

Nakatakda namang sumabak sa unang laban si Chino kontra kay Bolat Sapar ng Kazakhstan, habang maaaring makatapat nito ang dating Japanese Samboist na si Kenichi Nakayama. 

Sasabak din si Paris champion Aislinn Yap sa women's under-80kgs class na layong mahigitan ang tansong medalya noong isang taon sa Kazakhstan.